1-2 Izar warrada Core abadjid̶aa. Idjira Levi warra Coád̶eba yõna basía. Corera dewara ẽberãrã ũbea panʌ ume bed̶ea ausid̶aa Moise ãyã b̶ʌd̶i carea. Maʌ̃ ũbeabemara Rubeʌ̃neba yõped̶ad̶a basía; ab̶a Eliá warra Dataʌ̃ basía, ab̶a idji warra Abiraʌ̃ basía, idjab̶a ab̶a Pele warra Oʌ̃ basía. Ãdjirãare israelerã bororãda 250 panasid̶aa. Maʌ̃ bororãra dji biara b̶eada puruba edad̶a basía. 3 Jũma maʌ̃ ẽberãrãra Moisemaa Aaroʌ̃maa bid̶a wãnaped̶a nãwã jarasid̶aa:

–¡Ab̶a id̶ibe bãrãra dairã boro bad̶ia! Purura jũmaena Ãcõrẽba idji itea edasia. Idjira dairã ume bid̶a b̶ʌa. Mãwã b̶ʌ bẽrã ¿cãrẽ cãrẽã jũma Ãcõrẽ puru cãyãbara bãrãra dji dromaara panʌda crĩcha panʌ?–

4 Maʌ̃ ũrĩsid̶e Moisera chĩrãborod̶e b̶arru cob̶esia Ãcõrẽa bed̶ea djuburiai carea.[a] 5 Maʌ̃be Corea, idjiare panʌrãa bid̶a jarasia:

–Nu diaped̶a Ãcõrẽba cawabiya caida idjid̶eda idjab̶a caida edasida idji sacerdote bamãrẽã. Idjia edad̶a ẽberãdrʌ idji caita idu wãbiya. 6-7 Core, bʌa, bʌare panʌrã bid̶a nãwã od̶adua: bãdjiza quera babada eped̶ecoda edad̶aped̶a nu tʌbʌdauda, quera bad̶i careabema sid̶a maʌ̃ eped̶ecod̶e b̶ʌd̶adua. Maʌ̃da Ãcõrẽ quĩrãpita b̶ʌd̶e wãnadua. Maʌ̃ne Ãcõrẽba cawabiya caida edasida idji sacerdote bamãrẽã. ¡Bãrã levitarãra jũmawãyã bed̶ea panʌa. Ya b̶esia!–

8 Moiseba Corea idjab̶a jarasia:

–Bãrã levitarã, ũrĩnadua. 9 Dadji israelerã Ãcõrẽba bãrãdrʌ awara b̶ʌsia idji caita poya wãnamãrẽã. Mãwã israelerãba Ãcõrẽa animarã babue diad̶e wãbʌdad̶e bãrãbʌrʌ ãdjirãra carebabadaa idjab̶a dadjirã nocod̶aa wãbʌdad̶e Ãcõrẽ wua dera edebadaa. ¿Ara maʌ̃ba bia b̶ʌẽ́ca? 10 Core, Ãcõrẽba bʌra, waabema levitarã sid̶a idji caita idu wãbibaria mãwã od̶amãrẽã. Baribʌrʌ bãrãmaarã maʌ̃gʌra bia b̶ʌẽ́a ãtebʌrʌ Ãcõrẽ sacerdoterã ba quĩrĩã panʌa. 11 Maʌ̃ bẽrã bʌa, bʌare b̶ea bid̶a Ãcõrẽra igara panʌa. ¿Cãrẽ cãrẽã Aaroʌ̃ra biẽ́ jara panʌ? ¿Aaroʌ̃ra bed̶ead̶e b̶ʌca Ãcõrẽba idji sacerdote bamãrẽã b̶ʌd̶a bẽrã?–

12 Maʌ̃be Moiseba Eliá warrarã Dataʌ̃da, Abiraʌ̃ sid̶a trʌ̃bisia. Baribʌrʌ ãdjia jarabisid̶aa:

–Daira bʌmaa wãnaẽ́a. 13 Bʌa daira drua biad̶eba ẽdrʌ enesia. Maʌ̃ druad̶ebʌrʌ baridua ne uped̶ad̶ara bia zaubaria. Bʌa daira naʌ̃ ẽjũã põãsa ewaraga b̶ʌd̶e jũma quinibibʌrʌa. Maʌ̃da ¿bʌra wad̶ibid̶a dai boroda b̶a quĩrĩã b̶ʌca? 14 Bʌa drua biad̶aa edeyad̶a asia. Maʌ̃ druad̶e baridua ne uped̶ad̶ara bia zaubariad̶a asia. Baribʌrʌ bʌa daira mamaa edeẽ́ tab̶ʌa. Ẽjũãda, uva bara b̶ʌ ẽjũã sid̶a diaẽ́ tab̶ʌa. ¿Bʌa wad̶ibid̶a daira cũrũga quĩrĩã b̶ʌca?[b] Daira bʌmaa wãnaẽ́a.–

15 Mãwã jara panʌ carea Moisera bio quĩrũped̶a Ãcõrẽa jarasia:

–Ãdjia bʌ́a diabʌdara bia unurãdua. Mʌ̃ra ãdji boromĩna ãdji burroda, ni cãrẽ sid̶a ãdjid̶era jãrĩẽ́ b̶ʌa. Mʌ̃a ãdjira ni ab̶a bid̶a biẽ́ oẽ́ b̶ʌa.–

16 Maʌ̃be Moiseba Corea jarasia:

–Nu bʌra, bʌare panʌrã sid̶a Ãcõrẽ quĩrãpita wãnadua idji wua demaa. Aaroʌ̃ sid̶a mama b̶aya. 17 Bʌare panʌ 250 ẽberãrãba ãdji quera babada eped̶ecora edad̶aped̶a querara coa nũmʌnadua. Maʌ̃gʌra Ãcõrẽ wua demaa idji quĩrãpita eded̶adua. Bʌa, Aaroʌ̃ bid̶a bãrã quera babada eped̶ecora eded̶adua.–

18 Nurẽma ãdjirãza quera babada eped̶ecoda edad̶aped̶a tʌbʌdauda ed̶a b̶ʌd̶aped̶a querada coa nũmʌsid̶aa. Ãdjirãra, Moisera, Aaroʌ̃ sid̶a Ãcõrẽ wua ded̶e ed̶a wãbada caita duanasid̶aa. 19 Coreba jũma Israel purura Ãcõrẽ wua ded̶e ed̶a wãbadamaa zebisia Moise, Aaroʌ̃ sid̶a ãyã b̶ʌd̶i carea. Cawaẽ́ne Ãcõrẽ quĩrãwãrẽã dorrodorroada ãdjirã quĩrãpita ʌ̃naga dogosia. 20 Maʌ̃ne Ãcõrẽba Moisea, Aaroʌ̃a bid̶a jarasia:

21 –Naʌ̃ ẽberãrã caitabemada ãyã wãnadua. Mʌ̃a ãdjirãra ab̶ed̶a jũma quinibiya.–

22 Baribʌrʌ Moisera Aaroʌ̃ sid̶a chĩrãborod̶e b̶arru copanenaped̶a Ãcõrẽa nãwã bed̶ea djuburiasid̶aa:

–Ãcõrẽ, bʌd̶eba ẽberãrãra jũma zocai b̶eaa. ¿Ab̶aʌba cadjirua od̶a carea bʌra jũma naʌ̃ puru ume quĩrũ b̶aica?–

23 Ãcõrẽba Moisea jarasia:

24 –Purua jaradua Core wua de caitabemada, Dataʌ̃ wua de caitabemada, idjab̶a Abiraʌ̃ wua de caitabemada ãyã wãnamãrẽã.–

25 Ara maʌ̃da Moisera piradrʌped̶a Dataʌ̃ b̶ʌmaa idjab̶a Abiraʌ̃maa bid̶a wãsia. Israelerã bororã sid̶a Moise caid̶u wãsid̶aa. 26 Maʌ̃ne Moiseba purua jarasia:

–Jãʌ̃ cadjirua obadarã wua de caitabemada ãyã wãnadua. Ãdjia eropanʌnebemada tãrãnadua. Tãnibʌrʌ bãrã sid̶a beud̶ia jũma ãdjia cadjirua oped̶ad̶a carea.–

27 Ara maʌ̃da israelerãra Core wua de caitabemada, Dataʌ̃ wua de caitabemada idjab̶a Abiraʌ̃ wua de caitabemada ãyã wãsid̶aa. Maʌ̃ne Dataʌ̃ra, Abiraʌ̃ sid̶a ãdji wua de dajada zed̶aped̶a ãdji ded̶e ed̶a wãbada caita ʌ̃ta nũmeasia. Ãdji ume dji quimada, jũma ãdji warrarã sid̶a nũpanasid̶aa. 28 Maʌ̃ne Moiseba jarasia:

–Nãwã bãrãba cawad̶ia ara mʌ̃djia quĩrĩã b̶ʌd̶eba bãrã boroda b̶eẽ́ basida, ãtebʌrʌ Ãcõrẽbʌrʌ mʌ̃ra b̶ʌsida: 29 naʌ̃ ẽberãrãda dadji beubada quĩrãca beud̶ibʌrʌ, bãrãba cawad̶ia Ãcõrẽba mʌ̃ra b̶ʌẽ́ basida bãrã boro bamãrẽã. 30 Baribʌrʌ Ãcõrẽba egoroda cawaẽ́ne yã dogobiped̶a ãdjira, jũma ãdjia eropanʌ sid̶a egoroba mĩbʌrʌ, ãdjirã zocai panʌne beud̶arã jaure panabadamaa wãnibʌrʌ, bãrãba cawad̶ia ãdjiabʌrʌ Ãcõrẽda igarasid̶ada. Mãwã cawad̶ia, ẽberãrã maʌ̃ quĩrãca beubʌdada dadjirãba wad̶ibid̶a ununaca bẽrã.

31 Moiseba mãwã jarabʌrʌd̶e Dataʌ̃ b̶ʌmaʌba ab̶a Abiraʌ̃ b̶ʌmaa egorora yã dogosia. 32 Maʌ̃ne egoroba ãdjira, ãdji ẽberãrãra, Corera, idji ẽberãrãra, idjab̶a jũma ãdjia eropanana sid̶a mĩsia. 33 Ãdjirã mĩped̶a egorora wayacusa araa catʌ dogosia. Mãwã zocai panʌne maʌ̃ ẽberãrãra jũma ãdjia eropanana sid̶a beud̶arã jaure panabadamaa wãsid̶aa. Israelerã tãẽnabemada nẽbasid̶aa. 34 Egoroba mĩbʌrʌd̶e maʌ̃ ẽberãrã b̶iabʌda carea ãdjirã caita duanʌra ãyã pira wãsid̶aa. Maʌ̃ne nãwã b̶iasid̶aa:

–¡Egoroba dadjirã sid̶a mĩcuaya!–

35 Maʌ̃ awara Ãcõrẽba tʌbʌ uruada idji b̶ʌmaʌba quera bá dia panʌ ẽberãrãmaa eradrʌbisia. Mãwã eradrʌbʌrʌba maʌ̃ 250 ẽberãrãra jũma bá quenasia.

36 Maʌ̃be Ãcõrẽba Moisea jarasia:

37-38 –Sacerdote Aaroʌ̃ warra Eleazaa jaradua quera babada eped̶ecora tʌbʌ cowa nũmʌnebemada jʌrʌ pemãrẽã. Tʌbʌdau eped̶ecod̶e wad̶i b̶ʌra ãyã tʌmʌ peabueida b̶ʌa. Maʌ̃ eped̶ecod̶e mʌ̃́a querada bá diasid̶a bẽrã eped̶ecora mʌ̃ itea b̶esia. Jãʌ̃ ẽberãrãba cadjiruada oped̶ad̶a bẽrã beusid̶aa. Maʌ̃ bẽrã ãdji eped̶ecora pewed̶ea berrachid̶aped̶a animarã babue diabadad̶e cara b̶ʌd̶adua israelerãba quĩrãnebad̶amãrẽã baridua ẽberãba querada mʌ̃́a bá diacara b̶ʌda.–

39 Ara maʌ̃da sacerdote Eleazaba ẽberãrã tʌbʌba bá beuped̶ad̶a quera babada eped̶ecora jʌrʌ pesia. Jʌrʌ peped̶a maʌ̃ eped̶eco bronce od̶ara pewed̶ea berrachibisia animarã babue diabadad̶e cara b̶ʌi carea. 40 Maʌ̃ra cara b̶ʌsia israelerãba quĩrãnebad̶amãrẽã Aaroʌ̃ idjab̶a idjid̶eba yõbʌdarã awara ni ab̶aʌba querada Ãcõrẽa bá diacara b̶ʌda Ãcõrẽba Moisea jarad̶a quĩrãca. Ãdjirã awara bariduaba Ãcõrẽa querada bá diaibʌrʌ, maʌ̃ ẽberã sid̶a beuya, Core, idjiare panana sid̶a beuped̶ad̶a quĩrãca.

41 Nurẽma jũma israelerãba wayacusa Moiseda Aaroʌ̃ sid̶a nãwã biẽ́ jara duanesid̶aa:

–¡Bãrãba Ãcõrẽ ẽberãrãra beasid̶aa!–

42 Mãwã biẽ́ jara panʌra Moisema, Aaroʌ̃ma bid̶a powua nũmasia. Maʌ̃ne Ãcõrẽ wua demaa acʌbʌd̶ad̶e cawaẽ́ne jʌ̃rãrãba dera ãnã edaped̶a Ãcõrẽ quĩrãwãrẽã dorrodorroada ʌ̃naga dogosia. 43 Ara maʌ̃da Moisera Aaroʌ̃ sid̶a Ãcõrẽ wua de quĩrãpe wãsid̶aa. 44 Maʌ̃ne Ãcõrẽba Moisea jarasia:

45 –¡Naʌ̃ puru caitabemada ãyã wãnadua! ¡Mʌ̃a ãdjirãra ab̶ed̶a jũma quinibiya!–

Ara maʌ̃da Moisera Aaroʌ̃ sid̶a chĩrãborod̶e b̶arru copanesid̶aa. 46 Moiseba Aaroʌ̃a jarasia:

–Bʌ quera babada eped̶ecora isabe enedua. Animarã babue diabadad̶e b̶ʌ tʌbʌdauda ed̶a b̶ʌped̶a incienso querada coa nũmʌdua. Maʌ̃be israelerã duanʌmaa isabe wãped̶a Ãcõrẽa diadua ãdjirãba cadjirua oped̶ad̶ara quĩrãdoamãrẽã. Ãcõrẽra bio quĩrũ b̶ʌ bẽrã ãdjirãra quinibʌdaa.–

47 Ara maʌ̃da Aaroʌ̃ba osia Moiseba jarad̶a quĩrãca. Idji quera babada eped̶ecora edaped̶a israelerã duanʌmaa pira wãsia. Jũẽbʌrʌbara israelerãra ʌ̃cʌrʌ beucuad̶oasia. Maʌ̃ne idjia querada coa nũmʌsia ãdjirãba cadjirua oped̶ad̶ara Ãcõrẽba quĩrãdoamãrẽã. 48 Idjira nũmesia dji quiniped̶ad̶a tab̶ea, dji zocai panʌ ẽsi. Mãwã ãdjirãra waa quininaẽ́ basía. 49 Maʌ̃ ewarid̶e 14,700 ẽberãrãra quinisid̶aa Coreare b̶ead̶a naẽna quiniped̶ad̶a juachad̶aẽ́. 50 Ẽberãrãra waa quininaẽ́ bẽrã Aaroʌ̃ra Moisemaa wãsia Ãcõrẽ wua ded̶e ed̶a wãbada caita.

<- NUMERO 15NUMERO 17 ->