1-2 Naʌ̃ ẽjũã ũ nũmasid̶e Ãcõrẽba Noéra jũma animarã jãba dromane duanʌ sid̶a quĩrãdoaẽ́ b̶asia. Maʌ̃ bẽrã Ãcõrẽba nãũrãda jũma naʌ̃ ẽjũãne tʌbisia, pusa edrebema baidora tʌdrʌbisia, idjab̶a cue sid̶a poabisia. 3-4 Maʌ̃ bẽrã dora pĩãca ed̶aa erru wãsia. Cue zesi ewarid̶eba ciento cincuenta ewari bad̶acarea jãba dromara Ararat eyaid̶a b̶ʌ druad̶e poa b̶esia. Cue zesi poad̶e sei jed̶eco aud̶u diecisiete ewari b̶ʌd̶e mãwã poasia. 5 Baribʌrʌ wad̶ibid̶a dora erru b̶asia. Pĩãca erru wãne diebema jed̶eco nabema ewarid̶e waabema eya borora odjacuasia.

6 Cuarenta ewari bad̶acarea Noéba jãba dromane dajadaa acʌbada od̶ara ewasia. 7 Ewaped̶a ĩbana ne mĩguia cobarida ẽdrʌbisia egoro põãsada unui cawaya.[a] Maʌ̃ ĩbanara wãped̶a waa zeẽ́ basía, ãtebʌrʌ pʌrrʌa wãb̶ari nĩbabadjia do errubʌrʌmisa. 8 Mãwã b̶ʌd̶e Noéba puchirãda wãbisia dora errusi cawaya. 9 Maʌ̃ puchirãra jãba dromanaa waya jẽda zesia sãma b̶arida unuẽ́ bẽrã. Maʌ̃be Noéba puchirãra idji jʌwaba edaped̶a jãba dromane ed̶a b̶ʌsia.

10 Siete ewari jʌ̃ãped̶a Noéba wayacusa puchirãra jãba dromaneba wãbisia. 11 Queubʌrʌd̶e puchirãra waya jẽda zesia. Maʌ̃ne dji quid̶ad̶e olivo bacuru queduada enesia. Maʌ̃neba Noéba cawasia ẽjũã ũ nũmanara wãrãda errubʌrʌda. 12 Waya siete ewari jʌ̃ãped̶a Noéba wayacusa puchirãra wãbisia. Maʌ̃ne puchirãra waa Noémaa zeẽ́ basía.

13 Noé 601 poa b̶asid̶e naʌ̃ ẽjũãne dora jũma errusia. Ara maʌ̃ poad̶e dji nabema jed̶ecod̶e nabema ewarid̶e Noéba jãba droma de ẽcarrara ogapetasia. Maʌ̃ne ẽjũãra põãsa b̶ʌda unusia. 14 Jed̶eco ab̶a aud̶u veintisiete ewari b̶ʌd̶e ẽjũãra wãrãda bio põãsa b̶asia. 15 Maʌ̃bebʌrʌ Ãcõrẽba Noéa jarasia:

16 –Bʌra, bʌ quima, bʌ warrarã, bʌ ãĩgurã sid̶a jãba dromaneba ẽdrʌd̶adua. 17 Idjab̶a ẽdrʌbigadua jũma animarã bʌ ume duanʌra: ĩbanada, animarã daupẽbadada, animarã ãdji jãne wãbada sid̶a jũma naʌ̃ ẽjũãne wãnaped̶a yõnamãrẽã.–

18 Ara maʌ̃da Noéra, dji quima, dji warrarã, dji ãĩgurã sid̶a ẽdrʌsid̶aa. 19 Idjab̶a jãba dromaneba ẽdrʌsid̶aa jũma animarã daupẽbadada, mẽãbemada, ãdji jãne wãbadada idjab̶a wãb̶aribada sid̶a. 20 Maʌ̃be Noéba mõgarada ʌ̃tʌ pã buesia animarã Ãcõrẽa babue diai carea. Mãwã oped̶a Ãcõrẽa babue diaida b̶ʌ animarãda, ĩbana sid̶a ab̶a ab̶a beacuasia. Beacuaped̶a mõgara ʌ̃tʌ pã bued̶a ʌ̃rʌ̃ Ãcõrẽa babue diasia. 21 Maʌ̃ babue diad̶ara Ãcõrẽba bia unusia. Maʌ̃ne jarasia:

–Id̶iba ʌ̃taa mʌ̃a naʌ̃ ẽjũãra waa biẽ́ b̶ʌẽ́a, ẽberãrãba caibe ed̶aʌba ãdji sod̶e cadjirua od̶idrʌ crĩcha b̶eamĩna. Idjab̶a mʌ̃a jũma zocai b̶eara waa quinibiẽ́a mʌ̃a od̶a quĩrãca. 22 Naʌ̃ ẽjũã b̶ʌmisa ẽberãrãra ne u panania, ne ewa panania. Ewari jʌ̃wʌ̃rʌ̃ãra, ewari cũrãsa sid̶a b̶aya. Doid̶aada, poa sid̶a b̶aya. Ãsa, diamasi sid̶a b̶aya.–

<- GENESI 7GENESI 9 ->