1 Mãwãnacarea Joseba idji nezocarã boroa jarasia:

–Naʌ̃ ẽberãrã sacora trigoba biracuadua. Ãdji parata sid̶a ãdji sacoza ed̶a b̶ʌcuadua. 2 Maʌ̃be mʌ̃ taza parata od̶ada dji tẽãbema sacod̶e trigo nẽdod̶a parata ume b̶ʌdua.–

Ara maʌ̃da dji nezocarã boroba Joseba jarad̶a quĩrãca osia. 3 Nurẽma ãsabod̶od̶e Jose djabarãra ãdji burrod̶e idu wãbisid̶aa. 4 Ãdjira purud̶eba wad̶i tʌmʌ wãẽ́ panʌne Joseba idji nezocarã boroa jarasia:

–Jãʌ̃ ẽberãrã caid̶u wãdua. Jidad̶e wãsira nãwã jaradua: “¿Cãrẽneba mʌ̃ boroba bãrãra biẽ́ od̶a bẽrã bãrãba jãwã idjira biẽ́ osid̶a? ¿Cãrẽ cãrẽã bãrãba idji taza parata od̶ara drʌasid̶a? 5 Jãʌ̃ tazad̶e mʌ̃ borora ne dobaria. Idjab̶a ab̶ari tazad̶eba ne cawaiẽ́ b̶eara cawabaria. Bãrãba oped̶ad̶ara biẽ́ b̶ʌa.”–

6 Ara maʌ̃da caid̶u wãsia. Jidad̶e wãped̶a Joseba jarabid̶ara jarasia. 7 Maʌ̃ne dji djabarãba jarasid̶aa:

–¿Cãrẽ cãrẽã dadji boroba mãwã jara b̶ʌ? Dairãra ne drʌad̶acaa. 8 Acʌdua, parata dai sacod̶e b̶ad̶ada daiba ununaped̶a Canaaʌ̃ druad̶eba jẽda enesid̶aa. Mãwã daiba jipa osid̶abʌrʌ ¿cãrẽ cãrẽã bʌ boro paratara wa oro sid̶a drʌad̶i? 9 Bʌa maʌ̃ tazada dairã sacod̶e unuibʌrʌ dji erob̶ʌra beuida b̶ʌa. Maʌ̃ awara dairãra bʌ boro nezocarãda b̶ead̶ia.–

10 Maʌ̃ne Jose nezocarã boroba jarasia:

–Bia b̶ʌa, mãẽteara bãrãba jara panʌ quĩrãca oya. Dji ne drʌad̶ara mʌ̃ nezoca baya, baribʌrʌ waabemara bed̶ea neẽ́ b̶ead̶ia.–

11 Ara maʌ̃da ãdji sacora burrod̶e jʌ̃ b̶eada ẽrãnaped̶a egode b̶ʌsid̶aa. Maʌ̃be ãdjiza ewacuasid̶aa. 12 Ewacuaped̶ad̶acarea Jose nezocarã boroba jʌrʌ wãsia dji nabema djaba sacod̶eba ab̶a dji tẽãbema sacod̶aa. Maʌ̃ne tazara dji tẽãbema Benjamiʌ̃ sacod̶e unusia. 13 Ara maʌ̃da sopuad̶eba dji djabarãba cacuad̶e jʌ̃ panʌra cũẽtacuasid̶aa. Maʌ̃be ãdji sacora wayacusa ãdji burrod̶e b̶ʌcuad̶aped̶a jẽda purud̶aa wãsid̶aa.

14 Jose wad̶i diguid̶a b̶ʌd̶e Judara dji djabarã sid̶a idjima jũẽsid̶aa. Ãdjirãra ne wayaad̶eba idji quĩrãpita egode b̶arru copanesid̶aa. 15 Maʌ̃be Joseba ãdjirãa jarasia:

–Bãrãba ¿cãrẽ cãrẽã mʌ̃ tazara jãwã drʌasid̶a? ¿Bãrãba adua panʌca ne cawaiẽ́ b̶eada mʌ̃a cawabarida?–

16 Judaba panusia:

–Dai boro, ¿cãrẽda jarad̶i? ¿Sãwã jarad̶i daira bed̶ead̶e panʌẽ́da? Jũma daiba biẽ́ oped̶ad̶a carea Ãcõrẽba cawa obʌrʌa. Dairãra bʌ jʌwaed̶a panʌa. Bʌ nezocarã bad̶ia, idjab̶a bʌ taza drʌa erob̶ad̶a sid̶a bʌ nezoca baya.–

17 Maʌ̃ne Joseba jarasia:

–Mʌ̃a mãwã oẽ́a. Dji taza drʌa erob̶ad̶adrʌ mʌ̃ nezoca baya. Waabemara necai wãnadua bãrã zezamaa.–

18 Maʌ̃be Judara Jose caita wãped̶a jarasia:

–Mʌ̃ boro, mʌ̃ ume quĩrũrãdua. Bʌra Egiptod̶ebema boro quĩrãca b̶ʌmĩna mʌ̃ quĩrã djuburia bʌ ume idu bed̶eabidua. 19 Dai naãrã zesid̶ad̶e bʌa iwid̶isia daira zeza bara panʌ cawaya idjab̶a djaba bara panʌ cawaya. 20 Maʌ̃ne daiba panusid̶aa zeza drõã quiruda eropanʌda idjab̶a djaba cũdra b̶ʌda ab̶a eropanʌda. Maʌ̃ warrara dai zezaba drõã b̶ʌd̶e unusia. Idji djaba arada beusia. Ãdji papad̶ebemara ab̶abe idjidrʌ b̶ʌa. Idjira dai zezaba bio quĩrĩã b̶ʌa.

21 Idjab̶a bʌa daia jarasia, “Maʌ̃ warrara enenadua mʌ̃a unui carea.” 22 Baribʌrʌ daiba bʌ́a jarasid̶aa maʌ̃ warrara dji zeza b̶ʌmaʌba ãyã wãcara b̶ʌda. Ãyã wãibʌrʌ dji zezara sopuaba beuyad̶a asid̶aa. 23 Maʌ̃ne bʌa daia jarasia: “Bãrã djaba tẽãbemada bãrã ume zeẽ́bʌrʌ, bãrãra mʌ̃maa wayacusa zecara panʌda.”

24 Maʌ̃be dairãra dai zezama jũẽnaped̶a bʌa jarad̶ara jũma nẽbʌrʌsid̶aa. 25 Dãrãbʌrʌd̶e dai zezaba jarasia: “Waya trigo nẽdod̶e wãnadua.” 26 Maʌ̃ne dairãba idjía jarasid̶aa: “Dairãra poya wãnaẽ́a. Ab̶abe dai djaba tẽãbemada dai ume wãibʌrʌ wãnia. Idjida dai ume wãẽ́bʌrʌ, jãʌ̃ ẽberãmaa wãcara panʌa.”

27 Maʌ̃ne mʌ̃ zeza bʌ nezocaba daia jarasia: “Bãrãba cawa panʌa mʌ̃ wẽrãba warra umébe mʌ̃́a to diasida. 28 Ab̶ara nẽbasia. Maʌ̃ ewarid̶eba ʌ̃taa waa unuẽ́ b̶ʌ bẽrã mʌ̃maarã animarãba beaped̶a cobuesia. 29 Maʌ̃ bẽrã idji djaba arada eded̶aped̶a beuibʌrʌ, bãrãba mʌ̃ra sopuaba bead̶ia.”

30-31 Dairã boro, dji cũdra carea dai zezara wad̶i b̶ʌa. Maʌ̃ bẽrã mʌ̃ra dji cũdra neẽ́ mʌ̃ zezamaa wãsira maʌ̃ne idji warrada unuẽ́bʌrʌ mʌ̃ zezara beuya. Mãwã dai bʌ nezocarãba dai zeza drõã b̶ʌra sopuaba bead̶ia. 32 Mʌ̃ bʌ nezocaba mʌ̃ zezaa wãrãneba jarasia dji cũdrara waya eneida. Mʌ̃a jarasia: “Zeza, mʌ̃a waya bʌmaa eneẽ́bʌrʌ, bʌ quĩrãpita mʌ̃ra bed̶ead̶e b̶aya ab̶a mʌ̃ beubʌrʌd̶aa.” 33 Maʌ̃ bẽrã mʌ̃a bʌ́a bed̶ea djuburiaya dji cũdrabari mʌ̃drʌ nama erob̶emãrẽã bʌ nezoca bai carea. Maʌ̃ne dji cũdrara idji djabarã ume idu wãbidua. 34 ¿Sãwã mʌ̃da dji cũdra neẽ́ mʌ̃ zezamaa wãi? Mʌ̃ zeza sopuaba biẽ́ b̶ʌda unu quĩrĩãẽ́ b̶ʌa.–

<- GENESI 43GENESI 45 ->