1 Ismaelerãba Josera Egipto druad̶aa nẽdobued̶e edesid̶aa. Mama ẽberã Potipa abadaba idjira nẽdosia idji nezocada b̶amãrẽã. Potipara Egiptod̶ebema basía. Idjira maʌ̃ druad̶ebema boro wagabadarã dji droma basía.

2 Ãcõrẽda Jose ume b̶ʌ bẽrã idjia o b̶ʌra jũma bia odjabadjia. Maʌ̃ carea idji boro ded̶e traja b̶esia. 3 Joseba o b̶ʌra Ãcõrẽba jũma bia odjabibadjia. Mãwã Jose boro Potipaba cawasia Ãcõrẽra Jose ume b̶ʌda. 4 Maʌ̃ bẽrã idjia Josera bia unuped̶a idji nezocarã boroda b̶ʌsia. Idjab̶a jũma idjia erob̶ʌra Jose jʌwaed̶a b̶ʌsia. 5 Maʌ̃ ewarid̶eba ʌ̃taa Ãcõrẽba Potipaba idji ded̶e, idji ẽjũãne erob̶ʌ sid̶a Josed̶eba aud̶uara waribisia. 6 Potipaba jũma idjid̶eda Jose jʌwaed̶a b̶ʌd̶a bẽrã jũmawãyã crĩchaca basía. Ab̶abe idjia coid̶ebemadrʌ crĩchabadjia.*Ab̶abe idjia coid̶ebemadrʌ crĩchabadjia. Josera Egiptod̶ebemaẽ́ bẽrã Potipa itea ne djucara b̶asia idjab̶a idji ume ne cocara b̶asia. Acʌdua Genesi 43:32.

Josera jũma quĩrãwãrẽã b̶asia. 7 Maʌ̃ bẽrã Potipa quimaba idjira awua nũmesia. Ewari ab̶a maʌ̃ wẽrãba Josea jarasia:

–Wãnaa cãĩne.–

8 Maʌ̃ne Joseba quĩrĩãẽ́ bẽrã Potipa quimaa jarasia:

–Mʌ̃ra bʌ ume cãĩẽ́a. Mʌ̃ boroba idjid̶era jũma mʌ̃ jʌwaed̶a b̶ʌsia. Maʌ̃ bẽrã idjia erob̶ʌd̶ebemada jũmawãyã crĩcha b̶acaa. 9 Naʌ̃ ded̶e nezoca mʌ̃ cãyãbara dji dromaara b̶ʌra neẽ́a. Mʌ̃ boroba jũma naʌ̃ ded̶e b̶ʌra mʌ̃ jʌwad̶e b̶ʌsia. Ab̶abe bʌdrʌ mʌ̃ jʌwad̶e b̶ʌẽ́ b̶ʌa, idji quima bẽrã. Maʌ̃ cadjirua waib̶ʌada mʌ̃a ¿cãrẽã oi? ¡Mãwã oibʌrʌ Ãcõrẽ quĩrãpita cadjiruada oya!–

10 Potipa quimaba nurẽmaza Josea jara b̶abadjia idji ume cãĩmãrẽã wa idji ume nẽbʌrʌ b̶amãrẽã. Mãwãmĩna Joseba idji bed̶eara ĩjãca basía. 11 Ewari ab̶a Josera Potipa ded̶e trajad̶e wãsid̶e ni ab̶aʌ nezocada neẽ́ basía. 12 Maʌ̃ne Joseba jʌ̃ b̶ʌra Potipa quimaba jida dogoped̶a nãwã jarasia:

–¡Mʌ̃ ume cãĩdua!–

Baribʌrʌ Joseba jʌ̃ b̶ʌra wẽãtaped̶a dajadaa pira wãsia. Mãwã idjia jʌ̃ b̶ad̶ara dji wẽrã jʌwad̶e b̶esia. 13 Dji wẽrãba unusia Josera pira wãbʌrʌda idjab̶a Joseba jʌ̃ b̶ad̶ara idji jʌwad̶e b̶ʌda. 14 Maʌ̃ bẽrã idji ded̶ebema nezocarãda trʌ̃ped̶a nãwã jarasia:

–Acʌd̶adua, mʌ̃ quimaba jãʌ̃ hebreora dadjirãmaa enesia. Baribʌrʌ jãʌ̃ ẽberãba dadjirãra biẽ́ oya b̶ʌa. Idjira nama zeped̶a mʌ̃ ume cãĩ quĩrĩã nũmasia. Maʌ̃ carea mʌ̃ra jĩgua b̶iasia. 15 Mʌ̃ b̶iabʌrʌ carea idjira dajadaa mĩrũ pira wãsia. Acʌd̶adua, idjia jʌ̃ b̶ad̶ara nama b̶eesia.–

16 Maʌ̃be Joseba jʌ̃ b̶ad̶ara dji wẽrãba wagasia ab̶a idji quima Potipa diguid̶aa zebʌrʌd̶aa. 17 Idji quima jũẽsid̶e idjia ab̶arida jarasia:

–Bʌa dadji itea enena hebreo nezocara nama zeped̶a mʌ̃ra biẽ́ o quĩrĩã b̶asia. 18 Baribʌrʌ mʌ̃ jĩgua b̶iabʌrʌ carea idjira dajadaa mĩrũ pira wãsia. Acʌdua, idjia jʌ̃ b̶ad̶ara nama b̶eesia. 19 Bʌ nezocaba mʌ̃ra jãwã osia.–

Idji quimaba jara b̶ʌ ũrĩsid̶e Potipara bio quĩrũsia. 20-21 Maʌ̃ carea Josera jidabiped̶a preso b̶ʌbisia Egiptod̶ebema boroba preso b̶ʌbari ded̶e.

Baribʌrʌ Jose mama preso b̶ʌd̶e bid̶a Ãcõrẽra idji ume b̶asia. Idjira bio careba b̶asia. Maʌ̃ carea dji preso b̶ʌbada boroba Josera bia unusia. 22 Maʌ̃ bẽrã idjia preso b̶eara Jose jʌwaed̶a jũma b̶ʌsia wagamãrẽã. Mãwã jũma mama oida b̶ʌra Josebʌrʌ obibadjia. 23 Joseba jũma bia o b̶ʌ bẽrã dji preso b̶ʌbada boroba idjia o b̶ʌra quĩrãcuitaca basía. Mãwã b̶asia Ãcõrẽra Jose ume b̶ʌ bẽrã. Jũma Joseba o b̶ʌra Ãcõrẽba bia odjabisia.

<- GENESI 38GENESI 40 ->