1 Ẽberãrã druaza wãbʌrʌd̶i naẽna jũmarãda ab̶ari bed̶ead̶e bed̶eabadjid̶aa. 2 Ãdjirãra arima pananaca basía. Maʌ̃ba ʌ̃mãdau odjabariare pʌrrʌa nĩnane Sinar ẽjũãne jũẽne wãsid̶aa. Maʌ̃ ẽjũãne jewed̶ada ununaped̶a mama panesid̶aa. 3 Ewari ab̶a ãbaa nãwã bed̶eadruasid̶aa: “Egoroda mõgara quĩrãca od̶aped̶a tʌbʌd̶e bád̶adrʌ de od̶i carea.” Ara maʌ̃da egorora mõgara quĩrãca od̶aped̶a básid̶aa mõgarara neẽ́ bad̶a bẽrã. Maʌ̃be cãdorronada edasid̶aa maʌ̃ mõgara quĩrãca od̶ara carad̶i carea. 4 Maʌ̃be jarasid̶aa:

–Jãʌ̃be puruda od̶adrʌ. Idjab̶a de ʌ̃tʌ drasoga b̶ʌda od̶ia. Dji de borora ab̶ed̶a bajãnaa tẽũbid̶ia. Mãwã osid̶ara dadjirãra trʌ̃ b̶ʌga b̶ead̶ia idjab̶a ni ab̶aʌba dadjirãra namabemada ãyã memenebid̶aẽ́a druaza wãnamãrẽã.–

5 Ẽberãrãba puru idjab̶a de ʌ̃tʌ drasoga b̶ʌ o panʌra Ãcõrẽba bajãneba acʌd̶e zesia. 6 Maʌ̃ne Ãcõrẽba jarasia:

–Ãdjirãra jũma ãbaa duanʌa idjab̶a ab̶ari bed̶ead̶e bed̶eabadaa. Maʌ̃ bẽrã jʌwa b̶ʌsid̶aa jãʌ̃ de drasoga b̶ʌra od̶i carea. Maʌ̃ba bariduada o quĩrĩã panʌbʌrʌ poya od̶ia. Dadjia mãwã iduaribid̶aẽ́a. 7 Biara b̶ʌa dadjira wãnaped̶a ãdji bed̶eara quĩrãtanoa bed̶eabid̶ida ara ãdub̶a cawa ũrĩnaẽ́ duanenamãrẽã.–

8-9 Ara maʌ̃da Ãcõrẽba jũma naʌ̃ ẽjũãne b̶ea ẽberãrãra quĩrãtanoa bed̶eabisia cawa ũrĩrãnamãrẽã. Mãwã dji puru trʌ̃ra b̶esia Babel.[a] Maʌ̃ bẽrã ẽberãrãba puru o pananara idu b̶ʌsid̶aa. Mãwã Ãcõrẽba ãdjirãra mamaʌba druaza wãbʌrʌbigasia.

10 Nama b̶ʌ́ b̶ʌa Seʌ̃neba yõped̶ad̶ad̶ebemada. Dopapa wãnacarea poa umé b̶ʌd̶e, Seʌ̃ 100 poa b̶asid̶e, dji warra Arpaxada unusia. 11 Maʌ̃ Arpaxa ununacarea Seʌ̃ra 500 poa b̶asia. Maʌ̃ne warrarã, wẽrãcaurã sid̶a unusia.

12 Arpaxa 35 poa b̶asid̶e dji warra Salada unusia. 13 Maʌ̃ Sala ununacarea Arpaxara 403 poa b̶asia. Maʌ̃ne warrarã, wẽrãcaurã sid̶a unusia.

14 Sala 30 poa b̶asid̶e dji warra Hebereda unusia. 15 Maʌ̃ Hebere ununacarea Salara 403 poa b̶asia. Maʌ̃ne warrarã, wẽrãcaurã sid̶a unusia.

16 Hebere 34 poa b̶asid̶e dji warra Peleda unusia. 17 Maʌ̃ Pele ununacarea Heberera 430 poa b̶asia. Maʌ̃ne warrarã, wẽrãcaurã sid̶a unusia.

18 Pele 30 poa b̶asid̶e dji warra Reúda unusia. 19 Maʌ̃ Reú ununacarea Pelera 209 poa b̶asia. Maʌ̃ne warrarã, wẽrãcaurã sid̶a unusia.

20 Reú 32 poa b̶asid̶e dji warra Seruda unusia. 21 Maʌ̃ Seru ununacarea Reúra 207 poa b̶asia. Maʌ̃ne warrarã, wẽrãcaurã sid̶a unusia.

22 Seru 30 poa b̶asid̶e dji warra Nacoda unusia. 23 Maʌ̃ Naco ununacarea Serura 200 poa b̶asia. Maʌ̃ne warrarã, wẽrãcaurã sid̶a unusia.

24 Naco 29 poa b̶asid̶e dji warra Tareda unusia. 25 Maʌ̃ Tare ununacarea Nacora 119 poa b̶asia. Maʌ̃ne warrarã, wẽrãcaurã sid̶a unusia.

26 Tare 70 poa b̶asid̶e dji warrarã Abraʌ̃da, dewarabema Nacoda, Haraʌ̃ sid̶a unusia.

27 Nama b̶ʌ́ b̶ʌa Tared̶eba yõped̶ad̶ad̶ebemada. Tareba naʌ̃ warrarãda unusia: Abraʌ̃da, Nacoda, Haraʌ̃ sid̶a. Maʌ̃ Haraʌ̃ra Lo zeza basía. 28 Haraʌ̃ra idji toped̶ad̶a puru Ur abadad̶e Caldea druad̶e dji zeza na jaid̶asia.

29 Abraʌ̃ra Naco sid̶a quima barasid̶aa. Nacoba Milcada edasia. Milcara Haraʌ̃ cau basía, Iscá djabawẽrã basía. Maʌ̃ne Abraʌ̃ba Saraida edasia. 30 Maʌ̃ Saraira warra neẽ́ b̶asia warra toca bẽrã.

31 Abraʌ̃ zeza Tarera caldeorã puru Urd̶eba ẽdrʌsia Canaaʌ̃ druad̶aa wãi carea. Idji warra Abraʌ̃da, idji wiuzaque Loda, idji ãĩgu Sarai sid̶a edesia. Baribʌrʌ Haraʌ̃ purud̶e jũẽne wãnaped̶a mama panesid̶aa. 32 Tare 205 poa b̶asid̶e Haraʌ̃ purud̶e jaid̶asia.

<- GENESI 10GENESI 12 ->