1 Maʌ̃be Ãcõrẽba Moisea jarasia:

–Namaʌba bʌra, ẽberãrã bʌa Egiptod̶eba ẽdrʌ enena ume wãnadua mʌ̃a diai jarad̶a druad̶aa. Maʌ̃ druara mʌ̃a Abrahaʌ̃a, Isaa, Jacoboa bid̶a wãrãneba jarasia ãdjid̶eba yõbʌdarãa diaida.[a] 2 Mʌ̃ nezoca bajãnebemada bãrã na wãbiya cananeorãda, amorreorãda, hititarãda, perezeorãda, heveorãda, jebuseorã sid̶a jũma ãyã jʌrecuai carea. 3 Maʌ̃ druad̶e baridua ne uped̶ad̶ara bia zaubaria. Baribʌrʌ mʌ̃ra bãrã ume wãẽ́a cʌwʌrʌ zarea b̶ea carea quinibi amaaba.–

4 Maʌ̃ bed̶ea ũrĩsid̶ad̶e israelerãra sopua duanesid̶aa. Maʌ̃ bẽrã ni ab̶aʌba djiora jʌ̃naẽ́ basía. 5 Mãwã osid̶aa Ãcõrẽba Moisea nãwã jarad̶a bẽrã:

–Israelerãa nãwã jaradua: “Bãrãra cʌwʌrʌ zarea b̶eaa. Mʌ̃da bãrã ume maãrĩ bid̶a wãibʌrʌ, ab̶ed̶a jũma quinibiya. Jãʌ̃be bãrã djiora jũma ẽrãcuad̶aped̶a mʌ̃a bãrãra sãwã oida cawa jaraya.”–

6 Maʌ̃ carea israelerãba ãdji djiora jũma ẽrãcuad̶aped̶a idu b̶ʌsid̶aa Horeb eya jewed̶ad̶e duanasid̶ad̶e.

7 Maʌ̃ ewarid̶e Moiseba wua deda israelerã panʌmaʌba jĩgabe obadjia. Maʌ̃ wua dera idjia trʌ̃ b̶ʌsia “Ãcõrẽ ume bed̶eabari de.”†Ãcõrẽ ume bed̶eabari de. Maʌ̃gʌra Ãcõrẽba obid̶a wua deẽ́a. Bariduaba Ãcõrẽa iwid̶i quĩrĩã b̶ʌd̶e israelerã panʌmaʌba maʌ̃ ded̶aa wãbadjia. 8 Moise maʌ̃ ded̶aa wãbʌrʌza israelerã jũmarãda ãdji wua ded̶e ed̶a wãbadad̶e ʌ̃ta piradrʌd̶aped̶a idjira ed̶a wãbʌrʌda acʌ duanabadjid̶aa. 9 Moise ed̶a wãnacarea israelerã na wãbari jʌ̃rãrã ʌ̃tʌba ed̶aa drasoa jira b̶ʌda maʌ̃ wua ded̶aa zeped̶a dji ed̶a wãbada caita b̶ebadjia. Maʌ̃ne Ãcõrẽra Moise ume bed̶eabadjia. 10 Israelerãba jʌ̃rãrã wua ded̶e ed̶a wãbada caita b̶ebʌrʌda unusid̶ad̶e jũmarãda chĩrãborod̶e copanenaped̶a ãdji wua ded̶e ed̶a wãbadamaʌba Ãcõrẽa bia bed̶eabadjid̶aa. 11 Maʌ̃ne Ãcõrẽra Moise ume jĩgua bed̶eabadjia ẽberã umé nẽbʌrʌ panʌ quĩrãca. Nẽbʌrʌped̶ad̶acarea Moisera jẽda zebadjia israelerã duanʌmaa. Baribʌrʌ idji carebabari Josueda maʌ̃ wua ded̶e b̶ebadjia. Maʌ̃ cũdrara Nuʌ̃ warra basía.

12 Moiseba Ãcõrẽa jarasia:

–Bʌa mʌ̃́a jara b̶ʌa naʌ̃ ẽberãrãra nocod̶aa edemãrẽã. Baribʌrʌ bʌa jaraẽ́ b̶ʌa caida diabueida mʌ̃ carebamãrẽã. Idjab̶a bʌa jara b̶ʌa mʌ̃ra bio cawa b̶ʌda idjab̶a bio bia unu b̶ʌda. 13 Wãrãda mãwã baibʌrʌ, bʌa oi crĩcha b̶ʌda mʌ̃́a cawabidua. Mãwã mʌ̃a bʌra biara cawaya idjab̶a bʌa mʌ̃ra bia unu b̶eya. Quĩrãnebadua naʌ̃ ẽberãrãra bʌreda.–

14 Ãcõrẽba panusia:

–Mʌ̃ra bʌ ume wãya necai b̶amãrẽã.–

15 Moiseba jarasia:

–Bʌda jũmarã ume wãẽ́bʌrʌ, namaʌba ãyã wãbirãdua. 16 Bʌda dairã ume wãẽ́bʌrʌ, ¿dewararãba sãwã cawad̶i mʌ̃da, bʌ puru sid̶a bʌa bia unu b̶ʌda? ¿Sãwã cawad̶i dairãra jũma naʌ̃ ẽjũãne b̶ea puru cãyãbara awara panʌda?–

17 Ãcõrẽba panusia:

–Bʌa jara b̶ʌ quĩrãca mʌ̃a oya, bʌra bia unu b̶ʌ bẽrã idjab̶a mʌ̃a bʌra bio cawa b̶ʌ bẽrã.–

18 Moiseba Ãcõrẽa jarasia:

–Mʌ̃ quĩrã djuburia bʌ quĩrãwãrẽã dorrodorroada mʌ̃́a ebud̶a unubidua.–

19 Ãcõrẽba panusia:

–Mʌ̃ biada bʌ́a jũma unubiya. Mʌ̃ trʌ̃ sid̶a bʌ́a jaraya. Mãwã bʌa cawaya mʌ̃a quĩrã djuburia quĩrĩã b̶ʌ ẽberãda quĩrã djuburiaida, idjab̶a mʌ̃a quĩrĩãneba careba quĩrĩã b̶ʌ ẽberãda quĩrĩãneba carebaida. 20 Baribʌrʌ mʌ̃ quĩrãdarrada bʌa poya unuẽ́a. Bariduaba mʌ̃da unusira beuya.–

21 Maʌ̃ne Ãcõrẽba jarasia:

–Mʌ̃ caita mõgarada b̶ʌa. Maʌ̃ ʌ̃rʌ̃ nũmedua. 22 Mʌ̃ quĩrãwãrẽã dorrodorroada bʌ caita wãyã wãbʌrʌd̶e mʌ̃a bʌda mõgara uriad̶e b̶ʌped̶a mʌ̃ jʌwaba jũãtrʌya. 23 Wãyã wãnacarea mʌ̃ jʌwa ãyã edabʌrʌd̶e bʌa mʌ̃ ẽcarradrʌ unuya baribʌrʌ mʌ̃ quĩrãdarrara unuẽ́a.–

<- EXODO 32EXODO 34 ->