1 Yinsa khurutela theenya nsinakooka, nttumphule aarimo mwinyi waarakaliyeeyo nkhono awe. 2 Atthu akina aari weekesa nanna ya onlokoveza Yinsa, yoori amoone nkhama aari weettela ovonisa siikhu ya saapatu. 3 Yinsa khumuuza mwinyi otule woorakala nkhono yoori: “Olankhe ote vakatthi apha.” 4 Aphano Yinsa khuuzela yoori: “Niini entakheliwaaye orettiwa saapatu, oretta yooshapweya ama yootakhala, wuusuru ama wuula?” Ila atthu apale nalelo khwiiya oonyamala. 5 Yinsa khusala aweekesa ari wookatipukha na khuhituveliwi mwaasa wa wuuma rooho zaya na khumuuza mwinyi otule yoori: “Wookole nkhono awo.” Ye khookola nkhono awe na khwiiya woovonisiwa. 6 Aphano mafwarizeewu apale khulankha na khwaaza owaza shawuri vamote na khuntti ya Herooti eekesaka nanna ya omuula Yinsa.

7 Yinsa na anakhiyoni awe, khulawa mpakha ontthatta la Kalileya na nyumani wawe yaari ota khuntti khuluyeene ya nti wa Kalileya. 8 Wakathi asiiliyeevo vitthu zooshi aari orettaazo, atthu awaatta aari olankhaaye Yudeya, Yeruzaleemu, Itumeeya, akina akaapu wa muuttho Yorotaani na apale a Tiiro na Sitooni khuta okutthanana ye. 9 Mwaasa wa khuntti khuluyeene etile, Yinsa khuwooza anakhiyoni awe yoori antthekezele mwaatiya yoori awerawere ophunyiwa. 10 Maana ye awaavonisiye atthu awaatta, khwa nanna ya apale aari olwaaziwaaye aari ofiyelelaaye osukhumana yoori apatthe onsapa. 11 Theenya masheethwani, amana amoona eetta onkokhorela omaasho wawe na onyakula araka: “Weeyo o Mwaana wa Nluku.” 12 Ila ye aari owenkha oruma wookhomaala yoori ahinlupe paani yaya.

13 Yinsa khuwela vakulu na khuwaakhuwela apale aari owaatakhaaye, apo aya khuta aphale aariivo. 14 Khuwaathawula khumi na awiri na khuwenkha nzina la maaswihaapa yoori eeye vamote na-ye na yoori ye awaarume olaleya, 15 na eeyane owahi wa wiikara masheethwani. 16 Apa pi apale khumi na awiri awathawuliyeeyo aari witthiwaaye yoori: Simawu, otule amwinkhiyeeyo nzina la Pheeturu; 17 Tiyaaku, mwaana wa Zepeteewu, na Yaahaya ttwiiye, atthaapo aatthajiweeyo nzina la Buneerije, liriina maana a “Aana a Ottitthima”; 18 Antere, Filiipe, Barutulumeewu, Matewuzhu, Tome, Tiyaaku, mwaana wa Alufeeyu, Tadeewu, Simawu Zelooti; 19 na Yuuda Eshikariyoote, otule ankholisiyeeyo Yinsa.

20 Aphano, ye khulawa owawe, khukusanyeya opheya khuntti khuluyeene, khwa nanna ye na anakhiyoni awe aari woojelaavo oja. 21 Wakathi ajamaaze asiiliyeevo vitthu epile, khulankha khusala alawa onthuulawo, maana aari olupa yoori: “Ye eetta ovevereya.” 22 Anamanozela a kano aalankhiyeeyo Yeruzaleemu aari olupa yoori: “Ye ti wooshinttiwa ti Epiliisi! Mfwalume wa masheethwani ti othuuto aniweekaranaaye masheethwani.” 23 Aphano Yinsa khuwaakhuwela khusala awaanozela nkatthi wa milikaniso yoori: “Nanna-ni Epiliisi antakhaaye omwiikara Epiliisi? 24 Amana ofwalume mmote ojaawanya, khunwahi ojishintta otthuuporu. 25 Ama nyuupa amana ejaawanya, theenya khinwahi wiikhala ethiitoru. 26 Na Sheethwani nkhama ontta ojuumanana, na amana aawanyeya, khanlawa owahi wiiyavo na wafiya mwiisho wawe. 27 Weekhweele khina anwahaaye ovira nnyupa wa ntthu wookhomaala na khuthuula maali zawe aheetteeni onfuka khapula. Toowo ti anwahaaye omwiiyela nnyupa mwawe.

28 “Miiyo kiniwuuzani khweele yoori: Twampi zooshi na okufuru wooshi wa anaatamu onlawa waswaamihiwe, 29 ila otule ankufurwelaaye Rooho Ttakatthiifu, khana nswammaha mileele, maana ona twampi ya mileele.” 30 Yinsa aalupiye mattakhuzi apa mwaasa wa yo aari olupa yoori: “Ona sheethwani.” 31 Elottelanaka, mamaawe na attwiize Yinsa khuta. Khwiiya vaje na khuruma okhuweliwa Yinsa. 32 Aarivo atthu awaatta eekhaliyeeyo aphale aariivo, na khuuziwa yoori: “Mamaawo na attwiizo ari vaje apho antta oweekesa.” 33 Yinsa khuuzela yoori: “Maama ti tuuvi, wala ttwiiyaku ti tuuvi?” 34 Aphano khuweekesa apale eekhaliyeeyo aphale aariivo na khuwooza yoori: “Apha owaapho maama na attwiizaku! 35 Otule anrettaaye matakhelo a Nluku, ti eeyiye ttwiiyaku, nlupwaaka na maama.”

<- Maaruku 2Maaruku 4 ->