1 Supuyeene, attunkhulu a mahaakhimu na anamalokozela a tiini khujilakelela onhukhumwela Yinsa ofwa. 2 Khunfuka khunthuula khunlawana wa nsatoro Pilaatu.

3 Wakathi Yuuda, otule anzinkuliyeeyo, ooniyeevo yoori Yinsa onttela ohukhumwiwa, khuthupwiya na khulawa owaarutisela attunkhulu a mahaakhimu na anamalokozela a tiini nzurukhu opule talaathiini wa feeta aathuuliyeeyo. 4 Khuri: “Kakosa, khwa ozinkula taamu yoohikosi.” Yo khujipu yoori: “Fweeyo ennijali niini? Epo ti weeyo onjuwaaye.” 5 Aphano Yuuda khweeselela nzurukhu omwimpari. Khusaruwa nawiisha khulawa khujiheya. 6 Mahaakhimu a tiini khukusanya nzurukhu opule, khuri: “Khahi halaali othuula khuttha mmwifukho wa zaakha, maana hisapu ya taamu.” 7 Aphano khusiilana orumeyela nzurukhu aya opule khwa wuuzanyela nshapa la namuupa yoori lirettiwe vilalo la ozikhiwamo aletto. 8 Tiito nshapa laya nttho liniitthiwaaye Nshapa la Taamu mpakha siikhu epi za leelo. 9 Aphano khurettikhana epile zaalupiweeyo ti napiyu Jeremiiya yoori: “Athuula nzurukhu talaathiini wa feeta, hisapu yootthiiwa pi atthu a Ezirayiilu, 10 khuuzanyela nshapa la namuupa, nkhama etthiipo Mbwana aakirumiyeezo.”

11 Yinsa khutthiiwa omaasho wa nsatoro ye khumuuzela yoori: “Weeyo onfwalume wa mayaahuuti?” Yinsa khujipu yoori: “Pi etthiipo olupiyeezo.” 12 Ila eettaka olokoveziwa etthiipile pi attunkhulu a mahaakhimu na anamalokozela a tiini, ye khuhijipu. 13 Aphano Pilaatu khumuuzela yoori: “Weeyo khunsiila vitthu epo onlokoveziwaaye pi atthu apo?” 14 Ila Yinsa khuhijipu hatha nttakhuzi, khwa ethiito nsatoro khwiiya wooshanka.

15 Amana efiya siikhu ya njampo nsatoro aazowereliye onfukulela ntthu woothawuliwa pi atthu. 16 Yo wakathi aya otthuupule aarina napherezu woojuwanikha aari wiitthiwaaye Baraapa. 17 Pilaatu khuwoozela atthu apale athukumaniyeeyo attaaphale yoori: “Ti tuuvi khwa apa awiri mwintakhaaye yoori kinfukulele: Baraapa ama Yinsa aniitthiwaaye Al-Masiihu? 18 Maana aajuwiye yoori anlawaniye okhule mwaasa nrima. 19 Pilaatu eekhaliye onyuupa woophukiwamo, muukha awe khumperekha hapari araka: “Ohijiphakanyane apo, maana leelo muulottha kahoowa venkivene monkoni wa ye.” 20 Ila mahaakhimu a tiini na anamalokozela a tiini khuwaakhitiri atthu apale yoori aveke Ofukuliwa Baraapa na ooliwe Yinsa. 21 Aphano Nsatoro khuuzela yoori: “Khwa atthu apa awiri mwinintakhelaaye yoori miiyo kinfukulele ti tuuvi?” Yo khujipu yoori “Baraapa!” 22 Pilaatu khuuzela yoori: “Khi kinrettele niini Yinsa, aniitthiwaaye Al-Masiihu?” Ooshi khujipu yoori: “Akhomeliwe!” 23 Pilaatu khuuzela yoori: “Niini arettiyeeyo yootakhala?” Ila atthu apale khusala avira atepaka onyakula araka: “Akhomeliwe!” 24 Wakathi Pilaatu asopheliyeevo yoori khaari opattha hatha swamiima, ila olikha toowo khusala oona weekezeleya nzuzu, khurumisa otiiseliwa maati, khunawa omaasho wa atthu apale na khulupa yoori: “Akina paathuli khwa taamu ya ntthu otu; eto zwaamu yenu.” 25 Atthu ooshi apale khujipu yoori: “Taamu yawe ti eniittikhele fweeyo na aana etthu!” 26 Aphano Pilaatu khunfukulela Baraapa, khuruma ojaphiwa Yinsa na khumwinkhelela olawa okhomeliwa.

27 Elottelanaka, anajanka a nsatoro khunthuula Yinsa khunlawana nyuupa khuulu ya nsatoro khukusanyeya anajanka ooshi khunzukulela. 28 Khunvula kuwo zawe khunwalisa ajapi yookhuttuwa; 29 khuvaasha khaara ya miiwa, khunwalisa mmwishwa mwawe na khunttheela puutta nkhono awe nlume, khunkokhorela khusala anveyisa, araka: “Ojuusuru, mfwalume wa mayaahuuti!” 30 Khusala antthemela na khunnyakanya puutta etile, khumpiyana veeshwa. 31 Paata ya onveyisa, khunvula ajapi etile khunwalisa ajapi yawe. elottelanaka khusala alawa onkhomela.

32 Alawaka, khukutthanana nsireene aari wiitthiwaaye Simawu, khukhanyareliwa othuula nsalapa wa Yinsa.

33 Yo khufiya puuro eniitthiwaaye Kolokoota, eriina maana a puuro ya likurakuza la eeshwa, 34 khumwinkha onywa viinyu yoophakanyaniwa wamwe; ila ye wakathi ootiyeevo, khukatthala onywawa. 35 Paata ya onkhomela, khwawanyana kuwo zawe khwa weekesa nasipu. 36 Khwiikhala attaaphale khusala amweekesela. 37 Vatulu wa eeswa yawe khutthiiwavo lipawu laatikhiweeyo khwa olokoveziwa wawe yoori: “OTU TI YINSA, MFWALUME WA MAYAAHUUTI.” 38 Na aakhomelaniwe anamwiiya awiri, mmote nkhono nlume nkina nkhono nkha. 39 Apale aari oviraaye eetta onttukhana na wiinisa viishwa zaya, 40 araka: “Oo weeyo waari weettelaaye opwecha Nyuupa Yoosifwiwamo na khujeka khwa siikhu ttatthu, ojuusuru! Wiishukhe vansalapa apho nkhama omwaana wa Nluku!” 41 Khwa nanna etthiipo mahaakhimu a tiini, anamanozela a kano na attunkhulu a tiini eetta onveyisa, 42 araka: “Wawoosuru akina, ila khunwahi ojuusuru! Mfwalume wa Ezirayiilu! Eeshukhe nasaapi vansalapa apho, nintta onkhupali. 43 Ye amwaamini Nluku. Nluku ti amuusuru nasaapi ethiiti, nkhama ona huruma na ye, maana alupa yoori: ‘Ki mwaana wa Nluku!” ’ 44 Theenya anamwiiya apale aakhomelaniweeyo khusala anttukhana.

45 Yaapuwiye yiiza nti wooshi, payina ya saasiitha mpakha saakhentta. 46 Paata ya ofiya saakhentta, Yinsa khukhuwa woonyakulavo, araka: “Eloohi, Eloohi, lama sabatani?” Eriina maana a “Nluku aka! Nluku aka! Mwaasa wa niini okanswaka?” 47 Akina aarivo noosiila epile, khulupa yoori: “Ye oninkhuwela Aliyaasi.” 48 Woohirupazi, mmote wa yo khutthirela shiponja, khunaanisa na viinyu yoonyuunya, khuttha pontha wa tteketthe na khumwinkha Yinsa yoori anywe. 49 Akina khusala alupa yoori: “Mwinlikhe, nimoone nkhama Aliyaasi onteela omuusuru.” 50 Aphano Yinsa khukhuwa woonyakulavo saaneene khufwa.

51 Wakathi otthuupule phazira ya omwimpari khwaawanyeya vakatthi, waaza vatulu mpakha vathi. Nti khusakhinyeya na mawe khupwecheya. 52 Khapuri epile khufunuwa na mwiili wa attakatthifu awaatta afwiyeeyo khusisimuwa. 53 Noolaamo nkhapuri mphule, paata ya Yinsa osisimuwa, atthu apale akina asisimuwiyeeyo khweetta sitati Ttakatthiifu na khooniwa pi atthu awaatta. 54 Nttunkhulu wa anajanka na apale aari omweekeselaaye Yinsa, nawoona esikinyaatthi na zooshi zaarettikhaniyeeyo, khwiiya awoova channu khulupa yoori: “Khweele-khweele, ntthu otu aari mwaana wa Nluku!”

55 Aakha awaatta aari attaaphale khusala oona ari peetiwene. Apale amperekhiyeeyo Yinsa waaza Kalileya yoori anrumeyele. 56 Vakatthi vaya aarivo Mariyamu Mataleena, Mariyamu mamaawe Yaakhumpa na Yuusufu na Maama wa aana a Zepeteewu.

57 Njuwa leettelaka oveva, khuta mwinyi mmote wa thajiri wa Arimateeya anitthiwaaye Yuusufu aari namalottela wa Yinsa. 58 Khulawa wa Pilaatu, khuveka mwiili wa Yinsa. Pilaatu khuruma winkhiwa. 59 Yuusufu khuthuula mwiili wa Yinsa khuputaputela va joora, 60 khunttha nkhapuri pheeya, aarumiyeeyo othipiwa vamawe. Vanlako wa khapuri yaya khutthaavo liwe liwululene, khulankha khusala alawa. 61 Mariyamu Mataleena na Mariyamu nkina, eekhaliye attaaphale omaasho wa khapuri.

62 Mmeesho mwaya, siikhu ya saapatu, mahaakhimu a tiini na amafwarizeewu khulawa wa Pilaatu. 63 Yo khumuuza yoori: “Mbwana, ninfikhiri yoori wakathi aariiye haayi, namattettekha otule aalupiye yoori siikhu ya ttaatthu ontta osisimuwa. 64 Apho orume yoori khapuri etile yeekeseliwe saaneene mpakha siikhu ya ttaatthu, yoori ehirettikhane ota anamalottela awe khupwecha khapuri na awooze atthu yoori: ‘Asisimuwa muufwa,’ linttela wiiya nzuuzu lootepa zayita la mwanzo.” 65 Pilaatu khulupa yoori: “Apho mwawaathuule anajanka. Mwilawe mweekesele khapuri khwa nanna mwinoonaaye yoori mwinwahi.” 66 Yo khulawa khusoromezavo liwe ntthile lafuukaniweeyo khapuri na khuwaalikha attaaphale anajanka eekeselaka.

<- Matewuzhu 26Matewuzhu 28 ->