1 Mafwarizeewu na masatukhi khumwaattama Yinsa khusala amweeza anvekelaka alama moote yoolankha pinkuuni. 2 Ye khuwaajipu araka: “Amana njuwa liveva, mweeyo mwinraka, ‘Onttela wiiya wakathi wooshapweya, maana pinku ti yookhuttuwa.’ 3 Na leelo supu, ‘Enttela opuwa pheevo, maana pinku ti yookhuttuwa na eetaalawo mawiku.’ Mweeyo mwinjuwa otaphulela nanna ya pinku, ila khamwinjuwa otaphulela alama za wakathi! 4 Khapila yootakhala na yooraruwa anveka alama ya minjuza, ila hatha alama khanlawa winkhiwa yoohiiyi alama ya Yuunusa.” Aphano Yinsa khuwaalikha khulaavo aphale vaya.

5 Paata ya olokhela phantte kiina ya pahari, anakhiyoni khusophela yoori asahawu othuula phaawu. 6 Yinsa khuwooza yoori: “Mwiiye wa woona na mwiiyane phoole na fwaramento za mafwarizeewu na za masatukhi.” 7 Anakhiyoni apale khwaaza onyakulisana atthaaporu, araka “mwaasa aya ohithuuli phaawu.” 8 Asiiliyeevo onyakulisana opule, Yinsa khuwooza yoori: “Atthu oopushuwa amini, mwaasa aya niini mwinnyakulisana mweeyena-ru? Mwaasa woohiina phaawu? 9 Nalelo khina weeleyeni? Khamwimfikhirela phaawu epile thaanu miiyo kawaawanyeziyeeyo atthu alufu thaanu? Khelenke kavi mweetaaziyeeyo? 10 Wala khwa phaawu sapa aarafuniyeeyo atthu alufu nne, na zaari khelenke kavi mwilokottheliyeeyo? 11 Nanna-ni ehiniweeleyaanini yoori akaari owuuzani monkoni wa phaawu? Mwiiyane phoole na fwaramento ya mafwarizeewu na za masatukhi.” 12 Aphano khuweeleya yoori khaari owooza wiiyana phoole na fwaramento ya phaawu, ila khwa masomi a Mafwarizeewu na masatukhi.

13 Yinsa afiyeevo nti wa Sezareeya ya Filiipe, khuwoozela anakhiyoni awe yoori: “Atthu aninlupeza niini Mwaana wa Pinaatamu?” 14 Yo khujipu yoori: “Akina anri o Yaahaya namoosa; akina, anri o Aliyaasi, akina anri o Jeremiiya ama mmote wa manapiyu.” 15 Khurutela owoozela theenya yoori: “Khi mweeyo mwinri ki paani?” 16 Simawu Pheeturu khujipu yoori: “Weeyo o Al-Masiihu, Mwaana wa Nluku haayi.” 17 Yinsa khujipu yoori: “Wooshapweyiwa ti weeyo, Simawu mwaana wa Yoona! Maana vitthu zaya epi khuthoonyeziweeni ti pinaatamu, ila khwa Paapa ariiye pinkuuni. 18 Miiyo kiniwuuza yoori weeyo o Pheeturu, khwa liwe nttintthi kinjekana ojama wa Nluku na milako za motthooni khazinlawa oshintta. 19 Miiyo kiniwinkha efukulo ya Ofwalume wa Pinkuuni; etile onfukaaye vathi apha na pinkuuni entta ofukiwa, na etile weeyo onfukulaaye vathi apha na pinkuuni entta ofukuliwa.” 20 Aphano khuwooza anakhiyoni awe yoori ahiwooze akinoko yoori ye aari Al-Masiihu.

21 Waaza wakathi otthuupule, Yinsa khwaaza oweeleza anakhiyoni awe araka: Yaari ohithajiya olawa Yeruzaleemu ahoochaniwe vitthu zawaatta mmakhono wa attunkhulu a tiini, mahaakhimu a tiini na anamanozela a kano, ooliiwe, siikhu ya ttaatthu asisimuwe nkhapuri. 22 Aphano Pheeturu, khunkhuwelela othetekele khusala amuuza yoori: “Wala Mbwanaaka aka! Khinteela wuurettikhanela!” 23 Yinsa khuzukuluwa khumuuza Pheeturu yoori: “Weette nyuma waka Sheethwani! Weeyo ori nkhama liwe liriiye ntarikhi mwaka yoori likikwakwattule, maana onuupuwela nkhama pinaatamu woohiiyi nkhama anuupuwelaazo Nluku.”

24 Aphano Yinsa khuwooza anakhiyoni awe yoori: “Nkhama ntthu ontakha okilotta, ajikatthale mweenyewe, athuule nsalapa awe akilotte. 25 Maana otule antakhaaye wuusuru ohaayi awe ontta ompwetheya, ila otule onimpwetheyaaye ohaayi awe mwaasa wa miiyo ontta wuusurukha. 26 Ena fwayita-ni ntthu opattha fwayita olumwenku wooshi na khumwaashikha ohaayi awe? Ama niini pinaatamu antakhaaye opatilana ohaayi awe? 27 Apho Mwaana wa Pinaatamu onlawa ate nnuuru wa Papaawe na malayikha awe, amwinkhe phakari wakhula ntthu khwa etile arettiyeeyo. 28 Miiyo kiniwuuzani khweele yoori, awaapho apha atthu akina ahinttelaaye ofwa ahimooneni khapula Mwaana wa Pinaatamu ataka nkhama mfwalume.”

<- Matewuzhu 15Matewuzhu 17 ->