1 Osaleelaka ofiya wakathi woorettiwa njampo la phaawu yoohiina fwaramento, liniitthiwaaye Paashikowa[a], 2 attunkhulu a mahaakhimu a tiini na anamanozela a kano aari owaza shawuri zoomuula Yinsa sirini, khuhisala ewaheya mwaasa woowoova atthu.

3 Ila Epiliisi khumweetta Yuuda, aari wiittheliwaaye Shikariyooti, wa khuntti ya apale khumi na awiri. 4 Ye khulawa osiilanana attunkhulu a mahaakhimu a tiini na attunkhulu a anamweekesela a Nyuupa ya Nnyizinku, yoori eekese shawuri yonkholisa Yinsa. 5 Yo khuwaatuvela khumwaahiti Yuuda omwinkha nzurukhu wa feeta. 6 Ye khukhupali khusala eekesa kiphenyo yonkholisa Yinsa, woohiivo hatha ntthu.

7 Khufiya siikhu yoorettiwa njampo la phaawu yoohiina fwaramento, siikhu yaya ethiito yaarina yootwahiwa pwittipwitthi yoojeliwa Paashikowa. 8 Yinsa khunruma Pheeturu na Yaahaya araka: “Mwilawe mwaattalele etthu-yoojiwa ya Paashikowa.”

9 Yo khumuuzela yoori: “Ontakha naattalele vayi?”

10 Ye khuwaajipu yoori: “N'oofiya ositati mwinlawa mwansikane mwinyi apwecheriye yuuku ya maati. Mwinlotte mpakha nyuupa anttaamo. 11 Mwimuuze mwennyewe nyuupa yaya eto yoori: ‘Mwanliimu eetta oniruma owuuzelani yoori puuro anttelaaye ojavo njampo la Paashikowa na anakhiyoni awe pi vayi?’ 12 Othuuto ontta wuuthoonyezani nsana nwulweene wa vatulu oriina zaana zooshi, mwaattalele attaapho njampo nttho.”

13 Yo khulawa khusikana epile Yinsa aawooziyeezo, khwaattalela etthu-yoojiwa ya Paashikowa. 14 N'oofiya wakathi Yinsa na maaswihaapa awe khwiikhala vameeza. 15 Khuwooza yoori: “Kaari ohithajiya venkivene onja Paashikowa vamote na-mweyo kihinalawe ohoowa. 16 Kiniwuuzani yoori akinteela oja theenya njampo ntthi mpakha linttelaavo omariseliwa muufwalume wa Nnyizinku.”

17 Athuuliyeevo jiikira khunshukhurwela Nnyizinku, khuwooza yoori: “Mwithuule mwaawanyena. 18 Kiniwuuzani yoori akinrutela onywa nshumo wa nrayi wa wuuva mpakha ontaavo Ofwalume wa Nnyizinku.”

19 Athuuliyeevo phaawu khunshukhurwela Nnyizinku, khumeya khuwenkha khuwooza yoori: “Opu mwiili aka onttelaaye ovahiwa khwa mweeyo, mwisala mwiretta etthiipi mwikifikhiraka miiyo.”

20 Khwa nanna ethiito nawiisha oja khuthuula jiikira khulupa yoori: “Jiikira eti wahati mpheya onrettiwaaye ti taamu yaka, enttelaaye wiittikha khwa mweeyo.

21 Ila mwijuwe yoori, otule anttelaaye okikholisa ori vameeza attaapha vamote na-miyo. 22 Mwaana wa Pinaatamu onttela ofwa khwa nanna etthiipo Nnyizinku asharutheliyeezo. Ila atakhaliwa otule anttelaaye onkholisa.” 23 Yo khusala oozelana atthaaporu yoori anjuwe nlupa aari weettelaaye oretta etthu yaya eto.

24 Aphano maaswihaapa khusala anyakulisana atakhaka onjuwa paani eezeliyeeyo ottunkhulu vakatthi vaya. 25 Yinsa khuwooza yoori: “Afwalume a vathi apha aniiyana oshintta vakatthi wa atthu aya, na apale aneettettisaaye ofwalume oniwaatuvela olupeziwa onamaretta saana. 26 Ila mweeyo mwihiiye toowo, nttunkhulu vakatthi venu eeye ti nttiitthi aya, otule anlokozelaaye eeye ti namarumeyela aya. 27 Nttunkhulu ti paani, ti otule aniikhalaaye vameeza ama otule anrumeyaaye? Khaniiya otule aniikhalaaye vameeza? Ila vakatthi venu mweeyo, miiyo kiri nkhama otule anrumeyaaye. 28 Mweeyo ti ye mwiriiye vamote na-miyo mphule kinzayiniwaamo. 29 Nkhama etthiipo Paapa akinkhiyeeyo ofwalume, na miiyo kiniwinkhani mweeyo, 30 yoori mwije na mwinywe vameeza vaka muufwalume mwaka, na mwiikhale vakhukulu y'oofwalume yoori mwiphuke mahimo khumi na mawiri a Ezirayeele.

31 Simawu, Simawu, Epiliisi avekela yoori awootooteni nkhama empepetthiwaazo tiriku. 32 Ila miiyo koolompela yoori amini yawo ehiwaashikhe. Amana orutela wiiya vamote na-miyo, owaalipisele azaawo.”

33 Simawu khujipu yoori: “Mbwanaaka, miiyo kakhupali wuulotta hatha nkhama nkalapooso, hatha nkhama ofwa.”

34 Ila Yinsa khunjipu araka: “Miiyo kiniwuuza weeyo Pheeturu yoori leelo eti likukhuwi lihineekhe, onkikhana swaafu ttatthu oraka khunkijuwa.”

35 Aphano Yinsa khuwooza araka: “Wakathi opule koorumiyeenini mwihina hatha mfukho wala napampa, ama shapatthu, niini yoosaleeliyeenini?”

Yo khujipu yoori: “Hatha etthu khayaanisaleeliye.”

36 Ye khuwooza yoori: “Ila nasaapi eti otule ariina mfukho athuule na napampa awe anthuule. Otule ahina phanka oozanyise ajapi yawe oozanye. 37 Nkhama etthiipo Nttakhuzi la Nnyizinku linlupaazo yoori: ‘Ye onaalakiwa nkhama nanretta zootakhala.’ Miiyo kiniwuuzani khweele yoori sharuthi vitthu epi zirettikhane khwa miiyo, maana etile yaatikhiweeyo monkoni wa miiyo ena yoorettikhana.”

38 Maaswihaapa apale khulupa yoori: “Fweeyo apha Mbwana ninaaye phanka piiri.” Ye khujipu araka: “Weesha mwaasa aya opo!”

39 Khulankha khusala alawa vamwaako wa Oluveera nkhama etthiipo aazowereliyeezo, anakhiyoni awe khunlotta. 40 N'oofiya khuwooza yoori: “Mwilompe yoori mwihikwele muuzayiniwa.” 41 Ye khuwaasusa vattitthiiru[b] khukokhora khusala alompa araka: 42 “Paapa amana otakha, okilaze jiikira eti yoohoowa; ila ehirettikhane otakha waka miiyo, arettikhane matakhelo awo.” 43 [Aphano khumpuwelela nlayikha la pinkuuni khusala linlipisela. 44 Ari mmashakha, khusala alompa woojilipisavo, mattottonka oovujuwela wawe khuretteya wiiya taamu khusala akwela vathi.][c]

45 N'oolaavo aphale aari olompaavo, khweetta aphale aariivo anakhiyoni awe, khuwaasikana eettaka olala mwaasa woohuzunikha. 46 Khuwoozela araka: “Mwinlala-ni? Mwilankhe mwilompe yoori mwihikwele muuzayiniwa.”

47 Eettaka ottakhula etthiipile, khutavo atthu a waatta alokoziwe ti mmote wa anakhiyoni apale khumi na awiri aari wiitthiwaaye Yuuda. Ye khuta aphale aariivo Yinsa yoori amwinkhe peezhu. 48 Attaaphale Yinsa khuri: “Yuuda, Mwaana wa Pinaatamu oninkholisa na peezhu?”

49 Anakhiyoni awe nawoona vitthu epile khulupa yoori: “Mbwana, niwoomanane na phanka?” 50 Aphano nakhiyoni mmote khunshija nshiilo la nkhono-nlume mwiitthwaana wa haakhimu nwulu wa tiini.

51 Ila Yinsa khuri: “Onlikhe ohinrutele!” Ye khukhola nshiilo la ntthu otule khunvonisa.

52 Aphano Yinsa khuwoozela attunkhulu a mahaakhimu a tiini na attunkhulu a anamweekesela a Nyuupa ya Nnyizinku na anamalokozela a tiini apale aateeliye onkhola araka: “Mwakiteela na phanka na puutta nkhama kiiyiye namalokozela wa anazompere? 53 Wakhula siikhu kaari wiiya vamote na-mweyo vaje wa Nyuupa ya Nnyizinku khuhisala mwikikhola, aphano, opu wakathi enu na otule ariina ofwalume wa n'yiiza.”

54 Aphano Yinsa n'ookholiwa khulawaniwa mpakha vaje wa haakhimu nwulu wa tiini. Pheeturu khusala anlottelela Yinsa woohimwaattami. 55 Yo khukhoza moottho vaje khusala oottha, na-ye Pheeturu khuta attaapho khwiikhala. 56 Njaazi mmote aariivo n'oomoona eekhaliye nshini wa moottho khumweekesa saaneene khuri: “Otu aari vamote na Yinsa.”

57 Pheeturu khukhana araka: “Weyo mwanankha! Miiyo akininjuwa ntthu aya oto.”

58 N'oovira wakathi vattitthiiru, Pheeturu khooniwa ti ntthu nkina khumuuza yoori: “Weeyo o wa khuntti ethiitile.”

Ila Pheeturu khukhana araka: “Mwinyi, khahiyo miiyo!”

59 Oviriyeevo wakathi mmote, ntthu nkina theenya khulupachacha yoori: “Khweele-khweele otu aari vamote na-ye, maana otu aya na-ye nkalileya.”

60 Pheeturu khujipu araka: “Mwinyi! Miiyo akinjuwa etthu mwinlupaaye.” Eettaka ottakhula etthiipile, likukhuwi khwiikha. 61 Mbwana khuzukuluwa khumweekesa Pheeturu, ye khufikhiri mattakhuzi apale ooziweeyo ti Mbwana yoori: “Leelo ethiiti likukhuwi lihineekhe, onteela okikhana swaafu ttatthu.” 62 Pheeturu khulaavo aphale vaya khusala alila ari wookafilikha.

63 Atthu apale aari omweekeselaaye Yinsa khusala anveyisa na ompiya, 64 khumfinikha omaasho wawe khusala amuuzela yoori: “Weeyo khahi o napiyu? Onlupe otu oopiyiyeeyo!” 65 Khusala anlupeza mattakhuzi a waatta a mattukhano.

66 N'oocha khukusanyeya attunkhulu a mayaahuuti, attunkhulu a mahaakhimu a tiini na anamanozela a kano, khuthuuliwa Yinsa khulawaniwa nhali anthukumanaamo attunkhulu oophuka milattu. 67 Khusala amuuzela yoori: “Nkahaya, nkanuuze nkhama weeyo o Al-Masiihu.”

Ye khujipu araka: “Amana kiwuuzani khamwinkaamini, 68 na amana kiwuuzelani khamwinkijipu. 69 Ila waaza nasaapi ethiiti Mwaana wa Pinaatamu onttela wiikhala nkhono-nlume wa Nnyizinku Woowahi.”

70 Aphano ooshi khumuuzela yoori: “Apho niri weeyo o Mwaana wa Nnyizinku?”

Yinsa khujipu araka: “Mweeyo mwalupa yoori ti miiyo.”

71 Yo khulupa yoori: “Nininhithajiya shaahiti theenya? Mwennyewe alupa na nlomo awe.”

<- Luuka 21Luuka 23 ->