1 Wakathi aya opule, atthu aariivo khumuuza Yinsa yoori Pilaatu awoola atthu akina a Kalileya wakathi aari orettaavo twaha zaya. 2 Yinsa khuwaajipu yoori: “Mweeyo mwinoona yoori akalileya apo aari anatwampi zayita atthu akina, mwaasa woohoowa toowo? 3 Miiyo kiniwuuzani yoori: wala! Apho amana na-mweyo mwihithupwiyi twampi zenu, mooshi mwintta opwetheya nkhama yo. 4 Ama mweeyo mwinaakanyera yoori apale khumi na wanaane yaawaakweliyeeyo korofwa ya Siloowe aari anapaathuli zayita apale aniikhalaaye Yeruzaleemu? 5 Wala! Kiniwuuzani theenya yoori amana mwihithupwiyi twampi zenu mooshi mwintta opwetheya nkhama etthiipo na-yo apwetheyiyeezo.”

6 Aphano Yinsa khulupa nlikaniso opu onraaye: “Mwinyi mmote aarina mfikeera awe aazaliyeeyo mmashapa mwawe. Khulankha olawa oshuma mishumo zaya, hatha mmote khuhisikanimo. 7 Aphano khumuuza namalimela nshapa ntthile yoori: ‘Kina nyaakha mittatthu kitaaka oshuma, kihisikanakamo hatha etthu. Okakatte! Mwaasa wa etthu-ni ottiyelelaka puuro ya mahala?’

8 Ila karumeyaawe otule khunjipu araka: ‘Mbwana, kinuuvekelani yoori mwilikhe mfikeera opu wiiye nttumphu mpakha mwaakhani; miiyo kintta othipa nshini mwaya kisala kiitthela vitutu. 9 Mwaakha nkina amana wiima mishumo ti yooshapweya; amana ohiimi okakatte.’ ”

10 Siikhu ya saapatu, Yinsa eetta osomisa nnyupa moote yoosifwiwamo Nnyizinku. 11 Nttumphule aarimo muukha aari ohoochiwaaye ti sheethwani khwa nyaakha khumi na minaane, aari wookhutupuwa ahaari owahaaye wookowa. 12 Wakathi Yinsa amooniyeevo khunkhuwela khumuuza yoori: “Maama mwavona orati enu.”

13 Yinsa khunttheela makhono nunu otule omuuta otthuupule khookowa, khwaaza otthapa ansifwaka Nnyizinku. 14 Ila haakhimu wa nyuupa yoosifwiwamo Nnyizinku khwiiya wa wiiphiiriwa mwaasa wa Yinsa ovonisa siikhu ya saapatu, ti eto aawooziyeeyo atthu yoori: “Ziwaapho siikhu sitha zookhola khaazi; mwisala mwita siikhu etthiipo yoori mwivonisiwe, ila saapatu wala.”

15 Aphano Mbwana khujipu araka: “Manaafikhi! Paani mmote wa mweyo anraaye efiiye saapatu khuhifukuli mompe zawe na apuuru awe olawa onywisa maati? 16 Nunu otu peewu ya Eburahiima, eettiye ofukiwa ti Epiliisi khwa nyaakha khumi na minaane, nanna-ni ahaari weettelaaye otaphuliwa mwaasa wa wiiya saapatu?”

17 Alupiyeevo mattakhuzi apale, maatuwi awe Yinsa ooshi khuwaapattha haaya, atthu ooshi aariivo khwiiya oofurahi mwaasa wa vitthu zooshapweya epile aari orettaazo Yinsa.

18 Yinsa khulupa yoori: “Ofwalume wa Nnyizinku onlattana na niini, wala kilattisane niini? 19 Opo ori nkhama phunje ya mfikeera, mwinyi mmote anthuulaaye khulawa khuzala mmashapa mwawe. Khuwula khwiiya muutthi nwulweene, anyannyi o'otulu khusala ajekamo vijaaro zaya nvirapi mwaya.”

20 Yinsa khulupa theenya araka: “Ofwalume wa Nnyizinku walattana na niini? 21 Opo ori nkhama fwaramento muukha anthuulaaye khuttha ofu koopho ttatthu, khujakhuwa wooshi.”

22 Yinsa eetta ovira anozelaka nsitati na miti mikina za waatta eettaka Yeruzaleemu. 23 Ntthu mmote khumuuzela yoori: “Mbwana, vattitthiiru atthu anttelaaye wuusurukha?”

24 Yinsa khunjipu araka: “Mwijilipise yoori mwivire vanlako woophunyeya, maana a waatta anlawa eekese ovira ila khanteela owahi. 25 Mwennyewe nyuupa amana alankha afuka nlako awe, mweeyo mwinsala vaje mwipiyaka nlako na mwivekaka yoori: ‘Mbwana mwinifukulele!’

Ye ontta wuujipuni araka: ‘Akinjuwa ohali mwinlankhaawo.’

26 Aphano mwinlawa mwalupe yoori: ‘Naja vamote, khunywa vamote na wanozela mmuti mwetthu.’

27 Ila ye onlawa ajipu yoori: ‘Akinuujuwani wala ohali mwinlankhaawo akinjuwawo, mwikisuse mweeyo anamaretta zootakhala.’

28 Mwinlawa mwamoone Eburahiima, Esiyaakha, Yaakhumpa na manapiyu ooshi ari muufwalume wa Nnyizinku, ila mweeyo mwiikareliwe oje. Attaapho onlawa weeyevo olila na oluma meeno. 29 Atthu anttela olankha malawa-njuwa akina okhu lintupweelaawo njuwa, kusini na kashikhazini ate eekhale vameeza woofwalume wa Nnyizinku. 30 Miiyo kiniwuuzani khweele yoori, awaapho amwanzo anttelaaye wiiya awiishela, na awiishela anttelaaye wiiya amwanzo.”

31 Wakathi otthuupule khutavo mafwarizeewu khumuuza Yinsa yoori: “Oleevo apha, maana Erooti ontakha owuula.”

32 Ye khuwaajipu yoori: “Mwilawe mwamuuze nanthala aya oto yoori: Leelo na meesho kiniikara masheethwani na owaavonisa alwele, siikhu yattaatthu kintta wiishisa khaazi yaka. 33 Enhithajiya, leelo, meesho na nrotto ovira kilawaka; maana weekhweele khaavo napiyu amfwaaye nti nkina woohiiyi Yeruzaleemu!

34 Yeruzaleemu, Yeruzaleemu, oniwoolaaye manapiyu na owaavonya anamalaleya apale omperekheziwaaye! Swaafu kavi miiyo kitakhaka owaakusanya aanaawo nkhama mwanakhu aniwaakusanyaazo aanaawe mmapaphelo mwawe, ila weeyo khuhitakhi? 35 Apho moone yoori nyuupa yenu enttela wiiya puuro yoohiikhaliwi. Weekhwele kiniwuuzani yoori khamwinteela okoona theenya mpakha wakathi mwinttelaaye olupa yoori: ‘Attottopeliwe otule antaaye khwa nzina la Mbwana!’ ”

<- Luuka 12Luuka 14 ->