1 Yinsa khulupa yoori: “Miiyo ki nrayi wa wuuva weekhweele, Paapa namalima. 2 Wakhula erapi etile eriiye khwa miiyo khuhisala yiima, ye ontta oshija; na wakhula etile eniimaaye ontta okasurela yoori etepe wiima. 3 Mweeyo mwattakatthisiwa ti nttakhuzi kiwuuziyeenini. 4 Mwijilipisane miiyo, na-miyo kintta ojilipisana mweeyo. Nkhama etthiipo erapi ehiniimaaye ottho ehijilipisaneeni nrayi, na-mweyo pi etthiipo khamwiniima mishumo woohijilipisani miiyo.

5 Miiyo ki nrayi, mweeyo mwa virapi. Otule anjilipisanaaye miiyo, na-miyo khwa ye, oto aya oniima mishumo zawaatta; maana mweeyo woohiiyani miiyo, khina etthu mwinwahaaye oretta. 6 Amana ntthu ahilipani miiyo, ontta weeseleliwa oje, oome nkhama erapi enlokotthiwaaye khweeseleliwa va moottho khulukuziwa. 7 Ila amana mwijilipisana miiyo na mattakhuzi aka khwiiya na mweeyo, mwiveke wakhula etile mwintakhaaye mwintta winkhiwa. 8 Paapa onsifwiwa mwaasa wa mweeyo wiima mishumo zawaatta, etthiipo enthoonyeza yoori mweeyo mwa anakhiyoni aka. 9 Khwa nanna etthiipo Paapa akiphetiyeezo, na-miyo koophetani; mwijilipisane pheta yaka. 10 Amana mweeyo mwishututela oruma waka mwiniiya nkatthi wa pheta yaka, nkhama etthiipo na miiyo kinshututelaaye oruma wa Paapa na kiriyeeyo nkatthi wa pheta yawe. 11 Kaawuziyeni vitthu epi yoori furaha yaka yiiye khwa mweeyo, na yoori furaha yenu ekamilikhe.

12 Oruma waka pi opu: Mwiphetane mmote na nzaawe nkhama etthiipi miiyo khinuuphetanini mweeyo. 13 Khina ariina pheta yooziti, woohiiyi otule aninkhaaye ohaayi awe khwa maswaahipu zawe. 14 Mweeyo mwa maswaahipu zaka, mwirettaru etile kinuurumanini. 15 Akiniwiitthani theenya akarumeya, maana karumeya khanjuwa niini anrettaaye Mbwana awe. Nakatalikha, miiyo kiniwiitthani yoori maswaahipu zaka, maana zooshi epile kinsiliyeeyo Paapa koojuwisani. 16 Khahiyo mweeyo mwikithawuliyeeyo miiyo, ila miiyo ti kuuthawuliyeenini mweeyo na khuutthomani yoori mwilawe mweeme mishumo, mishumo zoolipaneya, yoori Paapa awahi owinkhani wakhula etile mwinvekaaye khwa nzina laka. 17 Opo pi oruma waka: mwiphetane mmote na nzaawe.

18 Amana atthu a voolumwenku eephiriwaka ti mweeyo, mwifikhiri khapula yoori yo eephiriwe ti miiyo. 19 Eriwaka mweeyo mwaari atthu a voolumwenku, yo aari otuveliwa ti mweeyo mwaasa wa wiiya aya. Nakatalikha mweeyo khahi mwa atthu a olumwenku, ila miiyo koothawulani khulazani vakatthi wa atthu a olumwenku. Tiito atthu a olumwenku aniiphiriwaaye ti mweeyo. 20 Mwifikhiri mattakhuzi kiwuuziyeenini yoori: ‘Khaavo karumeya anzitiyeeyo Mbwana awe.’ Nkhama akilupatthiyeezo miiyo, na anlawa oolupattheni mweeyo theenya. Nkhama anshututela mattakhuzi aka, theenya anlawa ashututele apale mwinttelaaye olupa mweeyo. 21 Zooshi epo anlawa ooretteleni mweeyo, mwaasa wa nzina laka, maana khaninjuwa otule akirumiyeeyo. 22 Eriwaka akaatiiye kilupa, yo khaari wiiyana paathwili ya twampi. Ila apha khana hatha nanna ya ojaakisa monkoni wa twampi zaya. 23 Otule aniiphiriwaaye ti miiyo na theenya oniiphiiriwa ti Paapa. 24 Eriwaka akeettiye oretta vitthu vakatthi vaya ahinwahaaye oretta ntthu nkina, yo khaariwiiyana paathuli ya twampi. Ila yo oona epi kirettiyeezo na khusala akhanyarela wiiphiiriwa ti miiyo na Paapa. 25 Ila epo zaya zarettikhana yoori lilikaniseliwe nttakhuzi ntthile laatikhiweeyo nkatthi wa kano zaya yoori: ‘Yo eephiiriwa ti miiyo woohiivo hatha kiiswa.’

26 Ila, amana ata Namalipisela, otule kinttelaaye wuuperekhezani woolankha phantte ya Paapa, Rooho ya okhweele ya olankha wa Paapa, ye onttela olaza oshaahiti monkoni wa miiyo. 27 Na mweeyo mwinlawa mwalawele oshaahiti, maana mwina miiyo thanku omwanzo.

<- Yaahaya 14Yaahaya 16 ->