1 Siikhu sitha ehinafiye siikhu ya Paashikowa Yinsa eettiye Betaaniya, ottuukho aari wiikhalaawo Laazaru, otule Yinsa ansisimuliyeeyo muufwa. 2 Ottuukho khwiipikheliwa etthu woojiwa ya osikhu; Maarata khusala arumeya, Laazaru eekhaliye vameeza vamote na Yinsa. 3 Aphano Mariyamu khuthuula suupha ya mafuttha oonukhela awaatta nzurukhu, khuttukunttela moolu a Yinsa khusala akukuttha na nyuuli zawe. Nnyupa wooshimo khwiitaalamo arufu ya mafuttha apale.

4 Aphano mmote wa anakhiyoni awe, Yuuda Eshikariyoote othuuto aari weettelaaye onzukuluwela khulupa yoori: 5 “Ahoozanyisiwe mafuttha aya apo nzurukhu aya enkhiwa asikhini? Nzurukhu aya yaari phakari ya nakhaazi khwa mwaakha mmote!” 6 Ye khaalupiye toowo mwaasa wa wiiyana huruma na asikhini ila mwaasa wa wiiya nantarawu; na tiye aari opwehaaye nfukho wa nzurukhu, amana otthiiwamo eetta olazakamo. 7 Yinsa khunjipu araka: “Onlikhe khwa heeri! Yoori apwehe mafuttha apo mpakha siikhu ya ozikhiwa waka. 8 Asikhini ari vamote na mweeyo mpakha mileele, ila miiyo khanniiya vamote mpakha mileele.”

9 Paata ajuwiyeevo yoori Yinsa aari attaaphale, khuntti khuluyeene ya mayaahuuti khuta, woohiiyi mwaasa wa Yinsa paasi, ila theenya yoori amoone Laazaru, otule ansisimuliyeeyo muufwa. 10 Khwa etthiipo mahaakhimu a tiini khuwaza shawuri zoomuula Laazaru naye; 11 maana atthu enkeene mwaasa wa ye eetta ophakuwanana mayaahuuti na khusala ankhupali Yinsa.

12 Siikhu ya phiiri, khuntti khuluyeene ya atthu yaatiyeewo onjampo khusiila yoori Yinsa ontta ota Yeruzaleemu. 13 Khuthuula virapi za mirita, khusala alawa onkutthanana ye, anyakulaka araka:

14 Yinsa ampatthiyeevo mwaana wa puuru khupakhira attaapho, nkhama etthiipo yaatikhiweezo yoori:

16 Omwanzo anakhiyoni awe khazaaweleyiye epo za; ila wakathi aaziyeevo osifwiwa Yinsa yo eetta wuupuwela yoori etthu yaya eto yaatikhiye monkoni wa ye, na khweele khurettikhana etthiipo.

17 Atthu apale aariina wakathi opule anrumiyeeyo Laazaru osaruwamo nkhapuri khusisimuwa muufwa, yo khuvira alawelaka oshaahiti vitthu epile zaarettikhaniyeeyo. 18 Mwaasa wa ethiito, khuwaakusanya atthu awaatta olawa okutthanana, maana eettiye osiila elupiwaka yoori Yinsa aarettiye alama eto. 19 Aphano mafwarizeewu khusala oozana yoori: “Khanipattheenivo etthu. Nkoonani olumwenku wa atthu ontta onlottelela.”

20 Khwa atthu apale aalawiyeeyo omwaaputu Nluku onjampo la Paashikowa akina aari akereeku. 21 Yo, khulawa ottakhulana Filiipe aari wa nti wa Betezayiita ya Kalileya, khunvekela araka: “Mwinyi, nintakha omoona Yinsa”. 22 Filiipe khulawa khumuuza Antere; aphano yo oowiiri khumuuza Yinsa.

23 Yinsa khujipu yoori: “Wafiya wakathi woosifwiwa Mwaana wa Pinaatamu. 24 Miiyo kiniwuuzani khweele yoori, amana phunje ya tiriku ehikweli vathi na ehifwi nalelo eniiya phunje paasi, ila amana efwa empuwisa mishumo zawaatta. 25 Otule amphetaaye ohaayi awe, onteela ompwetheya; ila otule antarawaaye ohaayi awe khwa voolumwenku apha, onthokorela ohaayi wa mileele. 26 Otule antakhaaye okirumeyela, akilotte; na puuro kiniiyaavo na karumeya aka oniiya attaapho. Otu anikirumeyelaaye, Paapa onteela onttitthimisa.

27 Nasaapi eti rooho yaka ti yoohankayikha. Kiri niini? Kiri paapa, okuusuru wakathi opu wa ohoowa waka? Wala! Maana miiyo kateela ethiito. 28 Paapa osifu nzina lawo!” Aphano khuta huula yoolankha pinkuuni yaari olupaaye yoori: “Koosifu na kinteela wuusifu opheya.” 29 Khuntti etile yaariivo noosiila aariye taari eto; akina khusala alupa yoori: “Nlayikha ti lattakhulaniyeeyo Yinsa.”

30 Yinsa khulupa yoori: “Huula eto khiteeni mwaasa wa miiyo yata mwaasa wa mweeyo. 31 Wafiya wakathi woophukiwa olumwenku opu, nasaapi eti onttela wiikariwa mfwalume wa olumwenku opu. 32 Ila miiyo amana kilansiwa vathi apha kintta ojitiisela atthu ooshi.” 33 Ye aalupiye mattakhuzi apa yoori athoonyeze nanna aari weettelaazo ofwa.

34 Khuntti etile khunjipu yoori: “Fweeyo ninsiilaka kano elupaka yoori: Al-Masiihu ona yawiiyavo khwa mileele, khi weeyo onlupa toovi yoori Mwaana wa Pinaatamu ona ya olansiwa? Mwaana wa Pinaatamu aya oto ti paani?”

35 Aphano Yinsa khuwooza yoori: “Nuuru eri vamote na mweeyo khwa wakathi vattitthiiru. Mweettette wakathi otthuupu mwiriinaavo nuuru, yoori yiiza ehuusikaneni, maana ntthu aneettettaaye n'yiiza khanjuwa ohali aneettaawo. 36 Wakathi otthuupu mwiriinaavo nuuru mwikhupalele nuuru ethiito yoori mwiretteye wiiya aana a nnuuru.” Paata ya olupa toowo Yinsa khulaavo khujivitha khuhisala amoona.

37 Hatha nkhama Yinsa eettiye owaarettela alama epile zooshi za minjuza vakatthi vaya, khankhupaleliye, 38 yoori limariseleye nttakhuzi la napiyu Ezaaya, linraaye:

39 Khwa ethiito yo khaari oteela okhupali, nkhama etthiipo aalupiyeeyo Ezaaya theenya yoori:

41 Ezaaya aalupiye mattakhuzi apa maana ooniye siifwa ya Yinsa na khulupa monkoni wa ye.

42 Nakatalikha, attunkhulu awaatta a mayaahuuti khunkhupali Yinsa. Ila mwaasa wa mafwarizeewu, khuhisala atukhuru amini yaya, na woova wiikariwa nsinakooka. 43 Maana yo waari owaatuvela venkivene osifwiwa pi atthu zayita osifwiwa ti Nluku.

44 Aphano Yinsa khulupa woosileyavo araka: “Otule anikaaminaaye miiyo, khanikaamini miiyo paasi, ila otule akiperekhiyeeyo. 45 Na otule anikoonaaye, amoona otule akiperekhiyeeyo. 46 Miiyo kata voolumwenku nkhama nuuru, yoori wakhula otule anikikhupalaaye miiyo, ahijileme n'yiiza.

47 Amana ntthu asiila mattakhuzi aka na khuhishututeli, miiyo akininphuka. Maana miiyo akaateeliye ophuka olumwenku ila wuusuru olumwenku. 48 Owaapho namaphuka wa otule anikikatthalaaye na ahinkhupalelaaye mattakhuzi aka; nttakhuzi laka nttinttho kinlupiyeeyo ti linttelaaye omphuka siikhu ya mwiisho. 49 Akinjilupa miiyo, ila Paapa otu akiperekhiyeeyo ti akirumiyeeyo etthu yoolupa na olaleya. 50 Miiyo kinjuwa yoori oruma wawe ohaayi wa mileele. Nakatalikha etile akirumiyeeyo paapa kinlupa ethiito.”

<- Yaahaya 11Yaahaya 13 ->