1 Adamu khurapalelana muukhaawe Haawa, khwiimittha khumpattha mwaana khuntthaja nzina la Kayiini[a]. Ye khulupa yoori: “Khwa otakha wa Nnyizinku kampattha mwaana wanlume.” 2 Khwiimittha theenya khumpattha mwaana nkina wanlume, ttwiiye Kayiini. Khuntthaja nzina la Apeele.

Apeele khwiiya makhampuzi wa pwittipwitthi, Kayiini khwiiya namalima. 3 Siikhu moote, Kayiini khutiisa mishumo za mmashapa oteela omwinkha zaakha Nnyizinku. 4 Apeele na-ye zwaamu yawe khutiisa pwittipwitthi etile yaari yamwanzo ottheeriwa ya nliphanko mwawe, khushija khuthawula phantte epile zoosamini waya oteela omwinkha zaakha Nnyizinku, Ye khwiiya wootuveliwa ti Apeele na zaakha yawe. 5 Ila Kayiini na zaakha yawe etile aatiisiyeeyo, Nnyizinku khuhituveliwi. Kayiini khukatipukha khujiinamela.

6 Nnyizinku khumuuzela araka: “Wakatipukhela-ni khujiinamela? 7 Amana weeyo weettetta saana akinuukhupalela? Ila amana weeyo oheettetti saana, ojuwe yoori twampi eri vanlako entta wuuwejela yoori ewiirukhele yuushintte. Weeyo enuuhithajiya oshintta twampi yaya eto.”

8 Aphano Kayiini khumuuza ttwiiye Apeele yoori: “Nlawe ntthuttu.” N'oofiya khunzukuluwela khumuula.

9 Paata ya toole, Nnyizinku khumuuzela Kayiini araka: “Ttwiiyo Apeele ori vayi?” Khujipu yoori: “Akijuweeni! Namweekesela wa ttwiiyaku ti miyo?”

10 Nnyizinku khumuuzela theenya araka: “Warettela-ni etthu nkhama eti? Huula ya taamu ya ttwiiyo entta okikhuwela vathi. 11 Nasaapi ethiiti, woolaanikha ti weyo vatuniya ethiito enywiiyeeyo taamu ya ttwiiyo. 12 Amana weeyo olima nka ohiruweraka. Vatuniya weeyo nka weettaka ojeettettela nkhama ntthu wootthira.”

13 Kayiini khumuuza Nnyizinku yoori: “Hukhumu yaka khuluyeene channu akinkhitiri. 14 Leelo wakiikara vatuniya apha yoori kihiiye vamote na-weyo, miiyo kinttela ojeettettela nkhama namatthira vatuniya na wakhula anttelaaye okisikana ontta okuula.”

15 Nnyizinku khunjipu yoori: “Wala! Khahiyo toowo! Wakhula otule anttelaaye owuula oniiya woohukhumwiwa swaafu sapa.” Ye khunttha alama vamwiili yoori wakhula aninsikanaaye ahimuule. 16 Aphano Kayiini khwumwazeyanana Nnyizinku khulawa khwiikhala nti wa Nooti[b], okhu lintthamuwaawo njuwa phantte ya Eeteni.

17 Ye khurapalelana muukhaawe, khwiimittha khumpattha mwanawe Enookhi. Kayiini khujeka sitati khutthaja nzina nttintthile la mwanawe Enookhi. 18 Enookhi khunvokola Eraati, Eraati khunvokola Mehuyayele, Mehuyayele khunvokola Lameekhi

19 Lameekhi khuwaarala aakha awiri, mmote nzina lawe laari Aada. Otu nkina lawe laari Siila. 20 Aada khumpattha mwanawe khuntthaja nzina la Yapaali, paapa wa atthu apale aari wiikhalaaye mmaheema aari ofuwaaye nyama. 21 Ttwiiye nzina lawe laari Yupaali, oto aari paapa wa atthu apale ooshi animpiyaaye tthakare na apale ampiyaaye phivi. 22 Siila khumpattha mwaana khuntthaja nzina la Tupaali-Kayiini, ye aari funti wa waattala zaana za khoopiri na zuuma. Tupaali-Kayiini aarina nlupuwe aari wiitthiwaaye Naama.

23 Lameekhi khuwooza aakhaawe yoori:

25 Adamu khurapalelana muukhaawe theenya khumpattha mwaana khuntthaja nzina la Seethi[c], Haawa khuri: “Nnyizinku akinkha mwaana nkinoko wonriphelavo Apeele otule ooliweeyo ti Kayiini.” 26 Seethi na-ye khumpattha mwaana khuntthaja nzina la Enooshi.

Wakathi aya otthuupo phi laaziyeevo waaputwiwa nzina la Nnyizinku.

<- Mwanzo 3Mwanzo 5 ->