1 Aphano Nnyizinku khumuuza Munsa yoori: “Miiyo kooretta wiiya nkhama Nluku khwa Firawuuna na ttwiiyo Arawu wiiya nkhama napiyu awo. 2 Weeyo omuuze zooshi epile kuurumiyeeyo, na ttwiiyo Arawu amuuze Firawuuna awaalikhe meezirayiilu aleemo mmuti mwawe. 3 Ila miiyo kinteela wuumisa rooho ya Firawuuna na kinteela wenkeza alama zaka na vitthu zaka zootikinisa nti wa Misuri. 4 Ye khanteela wuusilezani, ila miiyo kinteela wookola nkhono aka khwa Misuri, na khwa khaazi khuluzeene za ophuka, kinteela owaalazawo Misuri atthu a Ezirayiilu. 5 Phi amisuri anttelaavo ojuwa yoori miiyo ki Nnyizinku, amana kookola nkhono aka khwa Misuri kiwaalazavo meezirayiilu vakatthi vaya.”

6 Munsa na Arawu khuretta etthiipo Nnyizinku awaarumiyeezo. 7 Wakathi aattakhulaniyeevo Firawuuna Munsa aarina hirimu ya nyaakha thamaaniini, Arawu aarina hirimu ya nyaakha thamaaniini na mittatthu.

8 Nnyizinku khumuuza Munsa na Arawu yoori: 9 “Amana Firawuuna awuuzani yoori: ‘Mwirette minjuza awahi wuukhupalini,’ omuuze Arawu: ‘Athuule pakhora yawo eeselele enakatthi ya Firawuuna,’ pakhora ya eto entta othatuwa yiiye nyookha.”

10 Aphano Munsa na Arawu khulawa mpakha wa Firawuuna, noofiya khuretta etthiipile Nnyizinku aawaarumiyeeyo. Arawu khuthuula pakhora etile khweeselela enakatthi ya Firawuuna na mashawuriiya awe pakhora etile khuthatuwa khwiiya nyookha. 11 Aphano naye Firawuuna khuruma olawa okhuweliwa ajuwi na anamajintta; na yo khuretta etthiipo khwa majintta aya. 12 Wakhula mmote wa yo khusala eesa pakhora yawe na othatuwa nyookha, ila pakhora ya Arawu khumiza pakhora epile. 13 Ila Firawuuna khuumisa rooho yawe khuhitakhi owaasiileza, nkhama etthiipo Nnyizinku aalupiyeezo.

14 Nnyizinku khumuuza Munsa yoori: “Rooho ya Firawuuna tiya nthiti khanteela owaalikha atthu apo olawa. 15 Olawe wakutthanane Firawuuna supuyeene; ye onlawa woowa omuttho. Weemele nshini wa muuttho osala onweja, olawaka othuule pakhora yawo mmakhono etile yaathatuwiyeeyo nyookha. 16 Omuuze yoori: Nnyizinku, Nluku wa meezirayiilu, akiruma owuuza yoori: Owaalikhe atthu aka alawe akaaputu n'yaara, mpakha leelo khuntakha okisiileza. 17 Nnyizinku alupa toono: Ethiito ti enttelaaye wuujuwisa yoori miiyo ki Nnyizinku: khwa pakhora eti kiriina mmakhono kintakha kipiye maati a Nniilu athatuwe eeye taamu. 18 Swi ziriiye mmuttho zinteela ofwa zooshi, osala onukhamo woohifwayivo. Aphano amisuri ewaapatthe enanaari ya onywa maati a mmuttho mphule.”

19 Nnyizinku khumuuza Munsa theenya yoori: “Omuuze Arawu athuule pakhora yawo ookolele nkhono maati a Misuri, a mmuttho na mpakha a mmatthatta na a mmazuuku athatuwe eeye taamu, Misuri yooshi yiitaale taamu, mpakha zoopo za thaapwa na za mawe.”

20 Munsa na Arawu khuretta nkhama etthiipo Nnyizinku awaarumiyeezo. Arawu khushashula pakhora etile, khujapha maati a mmuttho Firawuuna ari attaapho na mashawuriiya awe, maati apale ooshi khuthatuwa taamu. 21 Swi zooshi zaariimo mmuttho mphule khufwa khusala onukhamo woohifwayivo, Misuri khuhisala owahi onyweyawo maati a mmuttho mwaya mphule nti wooshi waarina taamu.

22 Nayo anamajintta a Misuri khuretta etthiipo na ojuwa waya woojivitha, ila rooho ya Firawuuna nalelo khusala eri yawuuma khuhitakhi onsiileza Munsa na Arawu nkhama etthiipo Nnyizinku aalupiyeezo. 23 Firawuuna khuzukuluwa khusala alawa owawe khuhijali epile zaya. 24 Amisuri ooshi khulawa khuthipa nshini wa muuttho yoori apatthe maati oonywa, maana maati apale a mmuttho khaari onyweya.

25 Zaaviriye siikhu sapa paata ya Nnyizinku othatusha maati apale a mmuttho.

<- Olaawo 6Olaawo 8 ->