Rom 3

1 Anv, ejum ajehng ajehng jia, ji Jus kpi no sehnge ane baka bakaa? Nsehng anyi li go nrur ayehke? 2 Nsehng nyia gbalee go mbang anyehng anyehng go etingitingi.[a] Ngbokambang, Esowo yake alum enye kak Jus go ebo. 3 Anv, egom ji ki jo taame tv mee? Ekꞌtaame ebo ji bahke wahnge Esowo kꞌkpe bel ekakesehka?[b] 4 Eꞌee, ano sang, Esowo li go etingitingi. Ane kpee ba kpo soodo.

Ana nwer Esowo bungu re, “O Esowo, alum nya a kpo bung, ane bahke nyehne re, lohko li go etingitingi. Bo lꞌkak-a elam, a bahke lehke eno.”

5 Alum nya n yahke bung a, n kpꞌbungu go mbang nyi ane kpo bung. Anv, abꞌbi enyahre lꞌtib re, Esowo li nne no ma li eno, e li ma bung re, Esowo ebsoodo, eji á kak-r erema? 6 Eꞌee. Li re li ano, kehn Esowo bahke ma lam njini renan? 7 Anv, nsoodo enyame lꞌlim re, etingitingi ji Esowo kpe gbal na budu, fere ka-e ellub, jen ji wahnge á kp-m lungu re nne abiafem, fere jo ka-m ebi? 8 Jen ji wahnge e lꞌkꞌlim abꞌbi, eji nnoobo lꞌlohng ona?[c] Ane bandiki kpo kiimi afahnge, jo lak-r, fere jo ka-r ebi re, wahr ba kpo bung nsol nyia. Ebi ji bo bahke lehke, bo bahke lehke go nseenge.

Nnene limm, no li go etingitingi

9 Anv, wahr Jus, wahr ba ga nob sehnge ane baka bakaa? Eꞌee. M ma-n tohko tib re, Jus, a ane baka baka wob go elwo ni abiafem.[d]

10 Ana nwer Esowo bungu no re,

“Jol nne na awohng ana wꞌwohng limm, no li go etingitingi.

11 Nnene limm, no kpꞌkahne.

Nnene limm, no kpꞌsebe Esowo.

12 Ane kpee ebsennge Esowo njahm.

Bobtan mbang, bo ane kpee.[e]

Nnene limm, no kpo lim nnoobo,

jol na awohng limm.

13 Alum nnyo nya bo li ana esꞌsvv ji kpo lohng elahm bi bo ki bulu.

Nliki ebo nyi bo kpo ko,

jo nehm ane.

Alum nnyo nya bo kpi afa ana nya enyo.

14 Anyo ebo li akuk akuk,

a asabsab alum.

15 Bo kpehme jahk ane wul.

16 Edi ajehng ajehng ji bo lꞌje,

elrannge,

a erem kpꞌtoono bo njahm.

17 Mbang elkoono bo nyimm.

18 Bo kpehme fahl Esowo go mbang anyehng anyehng.”

19 E kpꞌkahne re, ejum ajehng ajehng ji atahm bungu no li ka ane ba wob go elwo ni atahm,[f] eji nne awohng awohng lꞌkꞌting ejum ji á bahke laange kunu, eji njini kpee lꞌkahn re, bobgbo atahm nya Esowo.

20 Tibre nnene limm, no bahke lehke eno go esamahr bi Esowo, tib eji á limi ji atahm bungu no.[g] Tibre Esowo ka atahm, eji ane lꞌkahn re, bo li aneb abiafem.[h]

Ana nne bahke ma li eno go esamahr bi Esowo

21 Anv, Esowo ebtib ane mbang nyi bo bahke ma li eno go ege esamahr. Mbang nyio, mbang atahm sang. Atahm, a anyehnamahr Esowo yiimi ntianse re, 22 ane kpo li eno go esamahr bi Esowo tib go eltaame ni bo kpꞌtaame tv Jisos Kraist. Eno jio li ka ane kpee ba lꞌtaame tv-e.[i] Elyaange anyehng anyehng limm, 23 tibre ane kpee eblim abiafem. Ellub ni Esowo ebrin bo.

24 Anv, bobli eno tib go ayare nya nnoobo nyi Esowo, nya sehnge go abo nya Kraist Jisos ji ma fak bo yake,[j] 25 ye ji Esowo yak-e no ka, eji alung eme lꞌwahng eltim naang-e, á fere tahm ka bo go bo abiafem, bo lꞌtaame tv-e. Eji Esowo yake Jisos ka, á sebe re á tib mbang nyi ane bahke ma li eno go ege esamahr. Tibre wuku wuku Esowo jo kpuumu abiafem nya bo jo lim fere gbake bum go nkpe.[k] 26 Wo anv, Esowo ebtib re, ye li go etingitingi, fere tib eno eje. Nne no lꞌtaame tv Jisos, ye wo bahke lehke eno go ege esamahr.

27 Ejum aji e bahke woro nnyo kunu? Ejumjum. Jen ji wahnge? Tibre e kpehme bel eltahre tib go eltum alimi, e kpo bel eltahre tib go eltaame.[l]

28 Tibre e kpꞌsahb bꞌbum re, nne bahke lehke eno tib go eltaame, á nehm li eno tib go atahm abumu. 29 Anv, Esowo li Esowo bi Jus bi bia? Á tobem li Esowo bi ane baka baka fvfoa? Eꞌee, á tob li Esowo bi ane baka baka![m] 30 Tibre Esowo li na abehng, bi bahke koko ane ba ma yehke nrur, a ba kil jo yehke nrur. Bo bahke lehke eno go ege esamahr tib go bo eltaame. 31 Anv, wahr ebrange na atahm nya Moses tib go eltaame niaa? Eꞌee! E kpꞌyiimi atahm njahm.[n]

<- Rom 2 Rom 4 ->