1 “Nyon tv enjel nyi ero bi Sardis re,

“Alum nya ana, nya nne no kpi etohko na ebsehma bi Esowo,[a] a elonlo na ebsehma yahke bung.

“N kpꞌkahne eltum ena ni a kpꞌlimi. N kpꞌkahne ana bo kpo gahm-a re, wo noa go elkpin, na nyehne ga, wobkpo. 2 Nyahme, wo kak ane bako ebo, ba ma sa, bo ji yahke kpo.[b] Tibre eltum ni a ma lim, me n nyehn re, gaam nob go ejang bi Esowo ebame. 3 Buumu alum nya bo tib-a no, wo fere buumu nya a wuku no. Jo bum alum nyao, wo yake mbang enya nyi a kpꞌtoono. A tohko nyahme, m bahke bake go ega ana nwajv. A nehm kahn ngare nyi m bahke bake.[c] 4 Egom ejahne jindiki ji li o Sardis, bo ka nyake awobo ebo.[d] Bo bahke tiki jo jen a name ano a abarebare nsol, tibre fꞌfuumu re bo lim ano.

5 “Nne no lꞌga anebekv ebe, bo bahk-e liibi abarebare nsol. N nehm fvvdv mbing enye go nwer nyio nyi elkpin.[e] M bahke yiimi ntianse ka-e go esamahr bi Nsoo, a bi enjel enye re, á li ka me.

6 “Nne no lꞌbel atung, nong, á wuk ji Etingi Etohko kpꞌbungu tong aneb ero.

7 “Nyon tv enjel nyi ero bi Filadelfia re,

“Alum nya ana, nya Mbarebara Nne Esowo no li Etingitingi Nne yahke bung, ye ji kpi egbokoro ji Devid. Á lꞌlennge, nnene limm, no bahke ma bam. Á lꞌbam, nnene limm, no bahke ma lennge.

8 “N kpꞌkahne eltum ena ni a kpꞌlimi. Me n lennge mbutahk bum-a, mi nne awohng awohng lꞌkꞌma bam.[f] N kpꞌkahne re, a kpi mmonsahm ntiil. Wobbum alum enyame. A tikem gbaame re, mbing enyame, a nyimm. 9 Wuungu atung! Ana ellong ane ba li ka nnehm, ba kpo lung elbo re, ‘Jus’, na nyehne, bo akimfahnge nya. M bahke limi bo, bo jo ba, ba gong kak-a, eji bo lꞌkahn re, a kp-m lohko kor. 10 Tibre wobbum alum enyame nya n tong-a re, wo jo kpuumu.[g] Owo fvfo m bahk-a tob tahre yehke go egburu elgaare ni bahke bake go njini nyia kpee, ni nne awohng awohng no li go njini nyia bahke yele.[h] 11 M bahke gulu elbake. Yiimi tꞌtahne go mbang nyi a kpꞌtoono, eji nne awohng awohng lꞌkꞌtaare ekpasi eltuuru eja.

12 “Nne no lꞌga anebekv ebe, m bahk-e limi, á jol ana ego go etahk Esowo ebame. Á nehm tiki tahm etahk jio sa. M bahke nyono mbing nyi Esowo ebame go ege a ngubjing, fere nyon-e mbing ejahbe ji Esowo ebame, Jeusalem ji nfenfe, jio ji bahke lohngo go ejahbetul ji Esowo ebame ba.[i] M bahk-e tob nyon mbing enyame nyi nfenfe fvfo.[j]

13 “Nne no lꞌbel atung, nong, á wuk ji Etingi Etohko kpꞌbungu tong aneb ero.

14 “Nyon tv enjel nyi ero bi Laodisea re,

“Alum nya ana, nya nne no bo kpo lung-e re, ‘Emen’ yahke bung, ye ji li etingitingi ntianse nyi kpi ekakesehk. Ye wo li mbomannahb go nsol nyi Esowo limi no kpee.[k]

15 “N kpꞌkahne eltum ena ni a kpꞌlimi. A li ana alahb ma kil fubu, jol elnaange nehme naange. Kor-m re wo fub, tohko jol ano, wo naange na.

16 “Eji a li ana alahb ma ma rongo na rongo, ma kil fubu, jol elnaange nehme naange, m bahk-a fahme na wohng go. 17 Tibre a kpꞌbungu re, ‘Me n fang, anv, me n jol njꞌjoka nne. Ejumjum limm, ji n kpꞌkpeke seb.’[l] Na nyehne ga, a nehme kahn re, a li erem erem, fere kpꞌfili ane ndon. Wobgbo ekpak, fere wa amahr, fere kpꞌjene ebun ebun. 18 Owo wahnge n kp-a tubu elle re, wo ba ga egame, ba gunu agul nya nno a nno, nya bo ma tuungu tahl go agun, eji a lꞌfang,[m] wo fere tob gunu abarebare nsol nya a bahke jo liibi, eji a lꞌkꞌkpe jen ebun ebun, fere jo riki elna ndon,[n] wo fere tob gunu ekahm amahr, jo to go amahr, eji a lꞌnyehn.[o] 19 N kpo nyam ane ba kp-m koro, fere jo kak bo erem.[p] Niiri lꞌlun, wo yake mbang enya nyio. 20 Anv, me n noa, yim go mbutahk kpꞌkahde.[q] Nne awohng awohng no lꞌwuk ellum ename, fere lennge mbu, m bahke yele go ege ekpꞌkpa, ba li nsol a ne, ye tob li nsol a name.[r]

21 “Nne no lꞌga anebekv ebe, m bahk-e kake nsahm nyi á bahke jehke a name go egame eti etul jang jang ana m ma ga anebekv ebame, fere song ji a Nsoo go ege eti etul.

22 “Nne no lꞌbel atung, nong, á wuk ji Etingi Etohko kpꞌbungu tong aneb ero.”

<- Ellennge 2Ellennge 4 ->