JON

1 Go mbomannahb Ellum ni jolo. Ellum nio ni jolo a Esowo. Ellum nio ni jolo Esowo.[a] 2 Ellum nio ni jolo a Esowo go mbomannahb. 3 Ni ni Esowo ko, lim nsol kpee. Ki li ye, kehn ejumjum jolem jolo ji ma jol.[b] 4 Ege wo elkpin jolo no. Elkpin nia ni jolo ellennge ka ane. 5 Ellennge nio li ana agun nya kpꞌyake go ejannge. Ejannge jio ka tiki lahme agun nyao.

6 Nne awohng jolo go, no Esowo tum-e no, no bo jo lung-e re Jon. 7 Á ba re á ba yiimi ntianse bade ellennge nio, eji ane kpee lꞌtaame tib go alum nya á bungu no. 8 Ye sang jolo ellennge nio. Á ba re á ba yiimi ntianse ka ellennge nio.[c] 9 Etingitingi ellennge ni kpo ka nne awohng awohng ellennge, ni ni ma ba go njini. 10 Á jolo go njini. Ye wo Esowo ko-e, lim njini nyia. Jol njini nyia, we tikem liingi. 11 Á ba go ege ejahbe, ane ebe we koom.[d]

12 Ane bao ba ko-e no, fere taame tv mbing enye, bo ba li ane ba á ka bo nsahm re bo jol abon Esowo.[e] 13 Bo jelem bo ana ane baka baka, jol go elkoro ni anebkal sang, jol bo jelem bo tib ana nne tiri no. Esowo bi jele bo.

14 Ellum nio ni ba siingi nne, fere lene tob-r. Wahr ebnyehn ellub ene, ellub nio ni Nde ka Mmon mmon awohng ewe, no ma gbal go nnoobo, a etingitingi.

15 Jon ji nwohngalahb jo yiimi ntianse ka-e, fere jo rabe re, “Ye wo a, ji n jo bung bada ne re, ‘Nne no kpꞌbake toon-m go njahm gbale sehnge me. Tibre á tohko jol, me n kehm jini.’ ”[f]

16 Go ege agbal wo, á jo yehke nnoobo, jo ka wahr ane kpee. 17 Moses wo ka atahm. Nnoobo, a etingitingi, Jisos Kraist wo ko ba ka. 18 Nnene limm, no ma nyꞌnyehn Esowo, sehngem Mmon mmon awohng no li a Esowo bad bad, ye wo ma lim re wahr kahn Esowo.

Á kehm faange re, “Eꞌee, me Elaija sang.”[g]

Bo kpe-e bahb re, “Anv, wo nnyehnamahr no e kp-e siki woa?”

Á kpe faange re, “Eꞌee, me nnyehnamahr noo sang.”

22 Bo kehm-e kpe bahb re, “Anv, wo nne awo? Tong-r, eji e lꞌsong tong ane ba tum-r no. Anv, a kpo bung renan bade elna?”

23 Jon kehm faange re, “Me wo li ‘nne no kpꞌrabe go elka emahng re, Tuungen mbang nyi Ntul bahke sehnge, wahn lim tꞌtor’ ana nnyehnamahr Aisaya bungu no.”

24 Ane ba tumu bo, Bab Farisi ba. 25 Bo kehm-e bahbe re, “Eji a tong-r re, wo Kraist sang, wo Elaija sang, wo nnyehnamahr noo sang, anv, jen ji wahnge a kpꞌwohngo ane alahb?”

26 Jon kehm faange bo re, “N kpo wohngo ane alahb maka maka. Go egahne ellong nne awohng noa yim, no ń kil-e elkahne. 27 Jol eji á kpꞌbꞌba toon-m go njahm, me n fuumem re me n kehme, fannge alehke akpaketa enye.”

28 Nsol nyia kpee limi go Betani, go egbuk Jodan jehko, edi jio ji Jon jo wohngo ane alahb.

29 Etoono efung behko Jon kehm nyehne Jisos kpꞌbake go ege. Á kehm bungu re, “Nyehnen, Mmon a Njoro no Esowo, no bahke ba rod abiafem nya njini.[h] 30 Nne noa wo, n jo bung bada ne re, Nne no kpꞌbake toon-m go njahm gbale sehnge me, tibre á tohko jol, me n kehm jini. 31 Mefono antahng, we n tohkem kahn wuku wuku. Ji wahnge m ba no, fere kpi ane alahb wohngo, li, eji abone Israel lꞌkahn-e.”

32 Jon jo yiimi ntianse re, “N nyehne Etingi Etohko go elfoongo ebbehl ma lohng go ejahbetul Esowo badde ba kuum-e. 33 Mefono antahng, we n tohkem kahn wuku wuku. Esowo bio bi tum-m no re me m ba wohngo ane alahb, ye wo tong-m re, ‘Nne no, a lꞌnyehn Etingi Etohko ma badde ba kuum-e, ye wo li nne no kpo wohngo ane alahb go Etingi Etohko.’ 34 Me n lohko nyehn, fere yiimi ntianse re, ye wo lohko li Mmon no Esowo.”

35 Etoono efung behko Jon kpe jol ona, a abatꞌtoono ebe, ane abal. 36 Á kehm nyehne Jisos, eji á jo jen abake, kehm bungu re, “Nyehnen, Mmon a Njoro no Esowo!”

37 Eji abatꞌtoono bao na abal wuku ano, bo kehm tahme toono Jisos. 38 Jisos kehm keebe, nyehn bo, eji bo kp-e toono, á kehm bahbe bo re, “Ń kpi jen seb?”

Bo kehm-e faange re, “Rabbi (ji lohngo re ntꞌtibi), gan wo a kpo kang?”

39 Jisos kehm bungu tong bo re, “Baan, wahn ba nyehn!”

Bo kehm jeke, song nyehn edi ji á jo kang, kehm tob kang o efung bio. Tibre ngare nyio jolo ejum nkaranka eni nyi elgung.

40 Nne awohng go ellong ane abal bao, no tob wuk ana Jon jo bung, kehm tahme toono Jisos. Bo jo lung-e re Andru ji jolo mmonannyehn a Saimon Pita. 41 Á gbo mbang song nyehn Saimon mmonannyehn, kehm-e tongo re, “Wahr ebnyehn Mesaya,” (ji lohngo re Kraist). 42 Á kehm koko Saimon ba a ne goji Jisos.

Jisos kehm-e seenge too, kehm bungu re, “Wo Saimon wo, ji mmon a Jon. Bo bahke fere jo lung-a re Kefas ji lohngo re Pita.”

43 Etoono efung behko Jisos kehm toobo re á bahke tahme go Galili. Owo á nyehne Filip, kehm-e tongo re, “Tahm toon-m!”

44 Filip lohng go Betsaida, ejahbe ji Andru abola Pita lene no. 45 Filip kehm song nyehn Natanael, kehme tongo re, “Wahr ebnyehn nne no Moses nyono bada ne go nwer atahm, no abanyehnamahr Esowo tob nyon fvfo bada ne, Jisos ji Nasaret, ji mmon a Josef.”

46 Natanael kehm faange re, “Anv, ejum ajehng ajehng ji nno jia, ji bahke tiki lohng go Nasareta?”[i]

Filip kehm-e faange re, “Ba wahr tahm, wo ba nyehn!”[j]

47 Eji Jisos nyehne Natanael kpꞌbake go ege, á kehm bungu bada ne re, “Nyehnen, a wo li etingitingi nne Israel, no enehm abehng abehng ki-e wob go atahng.”

48 Natanael kehm bahbe Jisos re, “A limi renan, kehm-m kahne?”

Jisos kehm-e faange re, “Re Filip kehm-a lungu, n nyehn-a, a jehk no go nnahb eti ji bo kpo lung re efig.”

49 Natanael kehm bungu re, “Rabbi, a lohko li Mmon no Esowo.[k] Wo wo li Ntul no Israel!”

50 Jisos kehm-e faange re, “Anv, wobtaama, tib eji m ma-a tong re, N nyehn-a go nnahb efiga? A bahke nyehne akpokosi sehnge ana nyi a ma nyehn a.”[l]

51 Jisos kehm kpe bung tong bo re, “Etingitingi, n kpꞌbungu tong-n re, ḿ bahke nyehne ejahbetul Esowo ma lennge, fere nyehn babenjel kpꞌtahme go ero, fere jo badde ba goji Mmon no nne.”

Jon 2 ->