NWER NYI BO NYONO TV
ANEBE HIBRU
1
Mmon no Esowo
1 Mahne mahne Esowo jo bungu tong babnso ejahre go ajoobo abang nkpel tvv, sehng go anyo nya abanyehnamahr.[a] 2 Esꞌkohro ngare nyia á bungu a nahre sehng goji Mmon ewe,[b] ye ji á yehk-e no re á bahke lehke elkv nsol kpee. Ye wo á ko-e no lim njini. 3 Á kpꞌyake tib ellub ni Esowo. Á li na li ful ful fuul ana yefono Esowo.[c] Alum enye nya kpi nsahm nyi kpꞌwahnge nsol kpee kpꞌjene go nseenge.[d] Eji á ma ru ane, bo ma bar go bo abiafem, owo á kehm song ji go eboblum Esowo bi gbale sehng, bi li go ero.
Mmon Esowo wo ga gbal sehnge babenjel
4 Anv, Mmon Esowo ebfere gbal sehnge babenjel, eji á ma bel mbing nyi nobo sehnge nyi bo.[e] 5 Esowo ka tong a tong enjel anyehng anyehng re,
“Wo mmon ewame wo,[f]
lela wo, m ma jol Nso.”
Jol á ka tong a tong enjel anyehng anyehng re,
“M bahke jolo Nso,
a bahke jolo mmon ewame.”
6 Eji Esowo yahke ba ngbokambang a mmon ewe tum tv go njini, á kpe bung re,
“Nong, babenjel nya Esowo kpee kak-e.”
7 Esowo bungu bade babenjel re,
“Esowo kpo lim enjel enye, bo jol nfeb,[g]
fere jo lim alokeltum ebe, bo jol nlikagun,”
8 fere bung bada Mmon ewe re,
“Eti etul eja,
o Esowo, li go njinanjini.
Á kpo fili ejahbetul eja go etingitingi.
9 Etingitingi ji kpo kor-a,
ebi jo sab-a.
Owo wahnge, wo Esowo,
Esowo eba ma-a kak akehng go esi, mao ma eyebatahng,
eji a lꞌgbal sehnge abonane.”
10 Esowo kpe bung re,
“Wo Ntul, wo wo limi njini go mbomannahb.
Elbung ni li ejum ji a limi go ega abo.[h]
11 Nyaa kpee bahke male, wofono antahng wo bahke sake.[i]
Nyaa kpee bahke kulu ana mbomo.
12 A bahke fehde elbung abola ndi ana ekpawobo, bahke fere yaange.[j]
A bahke jolo ano ano,
a nehm tiki kul.”
13 Esowo tikem tong enjel anyehng anyehng re,
“Ji go egame ejang eboblum
tete me n lim anebekv eba etikunakpade eja.”[k]
14 Anv, ane aba li babenjel? Bo kpee atohko nya kpo loko eltum nya, nya Esowo kpo tum bo re bo song kak ane ebo, ba bahke bele eltahre.[l]
Hibru 2 ->