1 Ngare nyio o eji nfange ane nyi abatꞌtoono Jisos jo kpe rur na budu, nfem kehm gboko anebe Jus ba lohng go Gris, a anebe Jus baka ga ba li etahk. Anebe Jus ba lohng go Gris jo bungu re, efung abehng abehng bo lꞌkehme nsol bak, akalebun ebo kpehme bel jang jang ana ane bako.[a]

2 Abatiingetib Jisos, ewubu ane abal kehm lungu abatꞌtoono Jisos bako, bo ba kono edi ajehng, kehm bungu re, “Fuumem re wahr yake alum Esowo abungu, fere jo ba bak nsol alehke. 3 Abonanee, yehken ane asehma go egahne ellong, ba kpꞌyiimi ntianse nyi nno, ba etohko ji Esowo, a elkahne ma rur go bo atahng, wahr ka bo eltum nio.[b] 4 Wahr bahke rodo ngare enyahre kak go ero akake, fere jo bung alum Esowo.”

5 Alum nya bo bungu no, yebe ellong ane bao atahng sehng. Owo bo kehm yehke Stiven ji etohko ji Esowo ruru go ege atahng, á fere gbal go ekakesehk, a Filip, go Prokoros, Nikanor, Taimon, Parmenas, a Nikolas ji ki jol nne a Jus, ye ji lohng go Antiok. 6 Bo kehm koko bo, ba goji abatiingetib Jisos. Bo kehm kake ero fere kunu bo abo.

7 Alum Esowo kehm yeere na yeere. Abatꞌtoono Jisos kpe rur na go Jeusalem gbalee. Abalimajom gbalee ba tob taame, jo toono eltibi ni Jisos.

8 Stiven jolo nne no Esowo fuul-e no, fere ka-e nsahm gbalee. Á jo limi akpokosi go esamahr ane. 9 Ane bandiki joom taame tv-e. Bo kehm kehme nfaabe lim a Stiven. Bandiki lohng go ejahbe ji bo jo lung re Silisia, bandiki lohng go Esia, bandiki jo kono elkono go etahk ero ji ane bao ba bo jo lung bo re aforfor ane. 10 Etohko ji Esowo ka Stiven elkahne gbalee. Eji á jo bung, á jo ga bo. Bo kpeem jo kahn ana bo bahk-e jo faange.[c]

11 Owo bo kehm nyare ane kak re bo song bung re, “E jo wuku ana á jo su Moses abola Esowo.”

12 Bo kehm tob nyare ane bako, fere nyare anebkul nfam, a atꞌtibi ba atahm. Bo kehm ba bob-e, ko-e tahm a ne go esub.

13 Bo kehm koko akimfahnge atianse ba a bo. Atianse nyao ba bungu re, “Nne noa kpo kono ebi bung bada mbarebare etahk Esowo jia, a atahm nya Moses. 14 E m-e wuk, eji á jo bung re, Jisos ji Nasaret bahke wake etahk Esowo jia, fere yaange atahm nya Moses ko no ba ka-r.”[d]

15 Kpee ane ba ji ekpꞌkpa elam jio kehm kehme Stiven seenge too. Bo jo nyehne esamahr ebe, jolo are bi enjel bi.

<- Eltum 5Eltum 7 ->