1 Etingi Etohko bungu sahb lꞌlennge re, go ngare esꞌsong egom ane bandiki bahke yake alum Esowo, fere jo wuungu atung go atohko nya kpo nehm ane, fere jo toono eltibi ni abi atohko.[a] 2 Eltibi nio kpo sehng go abo nya akimfahnge ane ba ntim ebo ma jol are ebfi adi adi. 3 Bo kpo tib eltibi ni bo re, nne kꞌjo ko nkal, nne kꞌjo li nsol alehke nyindiki, gana Esowo limi nsol alehke nyio ka-r re wahr jo li, fere jo kak-e saam, wahr jia ji ma taame tv-e, fere kahn etingitingi.

4 Tibre ejum ajehng ajehng ji Esowo limi no kpꞌnobo. Ejumjum limm, ji e bahke jo ten.[b] E bahke ma jo ko ejum ajehng ajehng, e lꞌjo ko, fere jo kak saam. 5 Tibre alum Esowo, a ero akake kpo lim ejum jio jol saang go esamahr bi Esowo.

6 A lꞌko erehke jia ana, fere jo rehke aneb Esowo, a lohko li nnooba nlokeltum no Jisos Kraist, ana a ma le elna go alum nya ekakesehk, a eltibi ni nno a nno, ni a kpꞌtoono. 7 Jo ten agboolo alum nya kil jo kor Esowo.[c] Rod ngare enya, wo jo kpili eljolo Esowo Esowo.

8 Nne lꞌrod ngare nyi á kpi no, jo lim ji li ka ngubjing, nehm kang a ne.[d] Á lꞌjol Esowo Esowo, á bahke bele elfuulu go elkpin ni á li a ni anv, a elkpin nehko ni kpꞌbake. 9 Etingitingi elbungu ni a, ni fuumu re nne awohng awohng taame tv.

10 Esi jia ji wahnge e kpꞌgbehde, ane kp-r nyame egban. Tibre e kpꞌkunu Esowo ekpu bi li go elkpin, ye ji kpo le ane kpee, asehngesehnge ane ba ma taame tv-e.

11 Tong bo nsol nyia, wo fere jo tib bo.

12 Nong, nne awohng awohng ki-a daange, tib eji a li njangkun. Jo tib eljini ni aneb Esowo bako bahke jo leeme,[e] ana alum abungu, eljini atibi, elkoro, ekakesehk, go eljolo saang.

13 Yake elna kpee ka, wo jo lung alum Esowo, tong bo, wo fere jo rehke bo, fere jo tib bo, tete me m ba. 14 Ayare nya Esowo ka-a no, ka jo rod bum mbol mbol, nyao nya a bele no eji abanyehnamahr Esowo bungu no, anebkul ero kun-a abo.[f] 15 Yake elna ka go nsol nyio, wo jo lim ngare anyehng anyehng, eji ane kpee bahke nyehne ana a ma kehme elmale ejum ajehng ajehng, fere gbal. 16 Jo kunu elna ekpu, wo fere jo kunu ekpu go eltibi ni a kpꞌtibi. Jo soro asi, jo lim nsol nyio, ka jo naange tv nne awohng awohng. Tibre a lꞌlim ano, a bahke tahre elna, fere tahre ane ba kp-a wuku.

<- 1 Timoti 31 Timoti 5 ->