KORINT

1 Me Pol wo, ji koro Esowo, á yehk-m no re me n jol ntiingetib no Kraist Jisos, awahr a mmonannee Sostenes, 2 e kpꞌnyono nwer nyia tv aneb Esowo ba li go Korint, bao ba Kraist Jisos ma ru ntim ebo, fere yehke bo re bo jol ebo ebo ka Esowo, budu ane bao ba kpꞌkake ero edi ajehng ajehng go mbing nyi Ntul a Jisos Kraist ji li ntul abo, a ntul ewahre fvfo.

3 Nong, Esowo Nso ejahre, a Ntul a Jisos Kraist ka-n nnoobo, a elkoono.

Elfuulu ni Kraist kpo fuulu

4 N kpo kak Esowo saam ngare anyehng anyehng tib wahn, tib go nnoobo nyi Esowo ma-n ka, eji á ka-r Kraist Jisos. 5 Tib eji ń li ajehng a Jisos, owo wahnge ḿ ma fang go alum abungu kpee, a elkahne anehng anehng. 6 Alum nya Kraist nya wob-n go egahne atahng ebgbal, fere tahne. 7 Ano wo wahnge nnoobo anyehng anyehng nyi Esowo ka-r no kil-n ebkpe rin, ana ń kpꞌsiki re bo lennge Ntul a Jisos Kraist ka-n.[a] 8 Á bahk-n kuuru tete rehng go esꞌkohro efung, eji ń lꞌli eno go efung bio bi Ntul a Jisos Kraist.[b] 9 Tibre Esowo kpi ekakesehk, ye ji yehk-n no re wahn ba jol ajehng a Mmon ewe Jisos Kraist Ntul ewahre.[c]

Elyabe ni aneb ero yabe no

10 N kp-n rehke abonanee go mbing nyi Ntul a Jisos Kraist re wahn ane kpee jo bung, bum nnyo amehng, nyꞌyabe anyehng anyehng kꞌkpe jol go egahne ellong. Sahb jolen jol ajehng go eltim anehng, a ntir anyehng.[d] 11 Tibre, abonanee, ane ba li etahk Kloe ma-m tong re, wahng kpꞌtaange atemtem. 12 Ellum ni n kpꞌbungu a, n kpꞌbungu bade ane bandiki ba kpo bung re, bo li ka Pol, bandiki re, bo li ka Apollos, bandiki re, bo li ka Pita, bako re, bo li ka Kraist.

13 Anv, Kraist ebyab, jol agꞌgabe agꞌgaba? Pol wo bo kum-e go ekros ka-na? Anv, wahn bele ewohngalahb go mbing nyi Pola? 14 Me n kak Esowo saam, eji n ki wohngo nne awohng awohng ewahne alahb, sehngem Krispus,[e] a Gayus,[f] bo ba n wohngo bo alahb. 15 Nnene limm, no bahke ma bung re á bele ewohngalahb go egama mbing. 16 Oo, n tꞌtob wohngo Stefanas alahb fvfo, a aneb etahk ebe. N nehme kpe buumu, joare n kpꞌkpe wohngo nne nondiki alahb budu. 17 Tibre Kraist me tumem re me m ba wohngo ane alahb. Á tum-m re me n song tiingi nnoobo etib. Limm re me m bung ana nne no kpo mal alum abungu go elkahne ni ane, tib eji nsahm nyi elkv ni Kraist kpo no go ekros lꞌkꞌgbod.[g]

Kraist wo li nsahm, a elkahne ni Esowo

18 Alum nyao nya li bade ekros ji Kraist kpoo no, li agboolo nsol go ejang ane bao ba kpꞌtane.[h] Go egahre ejang, wahr jia ji kpꞌbele eltahre, alum nyao li nsahm nyi Esowo. 19 Tibre bo nyono go nwer Esowo re,

“Esowo bungu re,

M bahke rannge elkahne ni akahnkahn ane,

fere yehke ntir nyio nyi aneb ngbere, ro go.”

20 Anv, kehm jolo renan bade akahnkahn ane bao, a aneb ngbere fvfo? Kehm jolo renan bada nne no kpo ware go nnyo go njini nyia? Esowo ebrod elkahne ni njini nyia bum ana egboolo ejum.

21 Tibre Esowo go ege elkahne wo, á kpane ane re bo ki-e kahn go bo elkahne. Kpo kor Esowo re á tahre ane ba lꞌtaame tv etib bi e kpo tiingi, bi kpo jol ane bako ana egboolo ejum.[i]

22 Jus kpo seb re bo nyehn akpokosi.[j] Grik kpo seb elkahne. 23 Ana wahr, wahr kpo tiingi etib bi Kraist ji bo kum-e go ekros. Go ejang bi Jus, etib bia li ana esiti mbang. Go ejang bi ane ba ki li Jus, li egboolo ejum. 24 Go ejang ane bao ba Esowo ma yehke bo, bo li ma jol Jus, bo li ma jol ane baka baka, etib bia ana, Kraist wo, ji li nsahm nyi Esowo, a elkahne. 25 Etib bio bi Esowo, bi kpo jol egboolo ejum go esamahr ane, nobo sehnge elkahne ni ane. Nsol nyio nyi Esowo nyi kpo jol aleenge nsol go esamahr ane, tahne sehnge eko ji ane.

26 Abonanee, buumen ana ń jolo no, eji Esowo lung-n no. Egom ejahne ntiil ji jolo akahnkahn ane. Egom ejahne ntiil ji jolo ajꞌjok ane, fere jol agburu ane ba bele ellub go njini nyia. 27 Esowo ebyehke nsol nyi li agboolo nsol go esamahr njini nyia ko, riki akahnkahn ane ndon, fere yehke nsol nyi kil tahne go esamahr njini nyia, ko, riki ajꞌjok ane ndon.

28 Esowo ebyehke nsol nyi li rede rede, nyi kil jo lub ane ba li go njini nyia, nyi bo kpo fere bung re, “Ejumjum o lohngem!” Eji á lꞌrede nsol nyi njini kpo tir re li atahntahn nsol, eji lꞌkꞌkpe jol ejumjum.

29 Jia lohngo re, nnene limm, no bahke ma wor nnyo go esamahr bi Esowo. 30 Ye wo ka-n Jisos Kraist, eji ń lꞌjol go elkpin nꞌne. Kraist wo, Esowo m-e ko, lim-r e ma jol akahnkahn, fere li eno go ege esamahr, fere jol ejahre ejahre. Ye wo ma-r fak yake. 31 Ano wo fvfo bo nyono go nwer Esowo re,

“Nne no lꞌkehme nnyo wor,

á wor nnyo tib go nsol nyi Jehova ma lim.”

1 Korint 2 ->