Leemisuwaa 30

Aguuri Haasayaa

(30:1-33)

1 Hawaappe kaalliide s'aafetteeddawe Yaak'a na'ay Aguuri haasayeedda haasayaa. He bitanii Iteelassinne Ukaalaw hawaa haasayeedda. 2 Tumu taani ay asaappekka booza daray; asaw de'iyaa akeekay taw baawa. 3 Taani aad'd'eeda eraa tamaarabeykke; Geeshsha S'oossaabaakka ayaanne erikke. 4 Saluwaa pude kesiide, duge wod'd'eeddawe oonee? C'arkkuwaa bare kushiyaan oyk'k'eeddawe, haatsaa bare afilaan yiic'eeddawe, sa'aa gas'aa Aa sa'aan sa'aan wotseeddawe oonee? Ane erooppe Aa suntsaa taw oda. Aa na'aa oona gay?

5 S'oossay odiyaa k'aalay ubbay tuma; barekko bak'atiide biyaa ubbaw I gonddalle. 6 Aa k'aalaa bolla ayaanne gujjoppa; gujjooppe I neena seerana; neeni worddanchcha gidiyaawaakka I k'onc'c'issana.

7 Abeet Med'inaa Godaw, taani neena laa"ubatuwaa oochchay; taani hayk'k'ana gakkanaw, unttuntta taana diggoppa. 8 Koyiruwaan, taani asaa c'immennaadaaninne wordduwaa haasayennaadan taana naaga; laa"entsuwaan, taw koshshiyaa keeshshaa k'umaa immappe attina, taana dure woy mank'k'o kessoppa. 9 Hewe d'ayooppe, dure gidaade, «Med'inaa Goday oonee?» gaade neena kaddana; woy mank'k'o gidaade, wuu"ana; yaataade ta S'oossaa suntsaa borisana.

10 Neena shek'k'ena malanne I shek'k'ina new gometenna mala, k'oomaa Aa godaan moottoppa.

11 Barenttu aawotuwaa shek'k'iyaanne barenttu aayetuwaa anjjenna asatuu de'iino. 12 Daro tunaa tuni uttiide, barentta geeshshaadan paydiyaa asatuu de'iino. 13 Otoruwaa kumeedda asatuunne asaa kad'iide s'eelliyaa asatuu de'iino. 14 Unttunttu achchay mashshaa mala gidina, unttunttu goggoc'c'uukka golooduwaa mala gidina, hiyyeesatuwaanne metootanchchatuwaa naak'k'iide, unttunttuwaa bonk'k'iyaa asatuu de'iino.

15 Ullatsatiw laa"u mac'c'a naanatuu de'iino. Unttunttu, «Hamma! Hamma!» yaagiide waassiino. Ubbakka kalli erenna heezzubatuu de'iino; oyddentsuu k'ay ubbaa, «Gidana» gi erenna.

16 Hewanttukka:

duufuwaa,

maynne mac'c'a asaa,

haatsi kalissi erenna mela biittaanne,

«Taw gidana!» gi erenna tamaa.

17 Bare aawuwaa k'iliic'iyaa na'aa ayifiyaa, bare aata c'imina kad'iyaa na'aa ayifiyaa, zanggaaraan de'iyaa k'uurotuu wooc'ana; Aa ashuwaa ankkotuu maana.

18 Taana heezzubatuu maalalissiino; oyddentsuu ubbaa taw gelenna.

19 Hewanttukka:

arggantsay saluwaana paalliyaa paaluwaa,

shooshshay shuchchaa bollaanna sololiyaa sololetsaa,

markkabii abbaa bollan solddiyaa soldduwaanne

wodallaynne gellayatta siik'uwaa doommiyaa doometsaa.

20 Woshumiyaa mishirata haniyaa hanuukka hewaa mala. Aa muussaa maw; shin meeddawaappe guyyiyaan, bare doonaa k'uc'c'a diggaade, «Taani ayinne bayzzabeykke» yaagaw.

21 Heezzu yewotuwaan biittay k'aas's'ee; oyddentsuwaa ubbaa tookkanawukka danddayibeenna.

22 Hewanttukka:

ayilii kaateteedda wode,

boozay katsaa kalleedda wode,

23 asay is's'eedda mishirata asinaa geleedda wodenne,

mac'c'a k'oomata bare godatto laatteedda wode med'ettiyaa hanotaa.

24 Sa'aa bolla oyddu guutsa med'etatuu de'iino; shin unttunttu loytsi aad'd'eeda eranchcha.

25 Hewanttukka:

C'unc'c'alletuwaa, c'unc'c'alletuu wolk'k'ay bayinna med'etaa;

shin barenttoo miyaawaa boniyaan shiishshiide, minjjiino.

26 Guppalletuwaa, guppalletuu guutsa wolk'k'ay de'iyaawantta;

shin barenttu golliyaa shuchchaa kooppuwan kees's'iino.

27 Booletuwaa, booletoo kaatii baawa;

shin unttunttu ubbaykka maaran zattiino.

28 Zaretuwaa, zaratuu kushiyan oyk'k'inakka oyk'ettiino;

shin unttunttu haray attina, kaatiyaa gollenkka de'iino.

29 Barenttu maataa bessiidde hamettiyaa heezzu med'etatuu de'iino; oyddentsuukka lo"o hemetaa hamettee.

30 Hewanttukka:

do'aa ubbaappe minniyaanne yayyiide bak'ati erenna gaammuwaa;

31 aayetuwaa giddon ayyiidde hamettiyaa awure kuttuwaa,

deeshsha orggiyaanne,

bare olanchchatuwaa giddon ek'k'iyaa kaatiyaa.

32 Neeni boozaade otoretteeddawaa gidooppenne, iitabaa ootsanaw halchcheeddawaa gidooppe, ane takki gaade k'oppa.

33 Maatsaa bukkiyaawe oyssaa kessiyaawaadan, siid'iyaa yimppiyaawekka suutsaa ahiyaawaadan, hewaadan hank'k'uwaa dentsetsiyaawe walassaa ayee.

<- Leemisuwaa 29 Leemisuwaa 31 ->