Link to home pageLanguagesLink to all Bible versions on this site

1 Gimbbiyaa kiittay wurina, penggetuwaankka sank'k'ay geleedda. K'ay penggiyaa naagiyaawanttu, mazimuriyaa yes's'iyaawanttunne Leewatuu barenttu kiitaan kiitan geleeddino. 2 Hewaappe guyyiyaan, Yerusaalame katamaa ayissiyaa maataa ta ishaa Hanaanawunne geessuwaa gadaawaa Hanaaniyaw immaad. Hanaanii hara ubbaappe aad'd'eeda tumanchchanne S'oossaw yayyiyaa asaa. 3 Taani unttuntta hawaadan yaagaadde azazaad; «Wontta away kesiide ho"ana gakkanaw, Yerusaalame gimbbiyaa penggetuwaa dooyoppite. K'ay omarssi naagiyaawanttu barenttu oosuwaa wurssiide baanaappe kasetiide, penggetuwaa loytsi gorddanaadan ootsite. Hewaa bollakka Yerusaalamen de'iyaa asaappe dooriide, ittuu ittuu kaalaan kaalaan naaganaadaaninne k'ay haratuu barenttu heeraan de'iidde, barenttu golliyaa keeshshaa keeshshaa naaganaadan ootsite» yaagaad.

Omooduwaappe Simmeedda Asaa Suntsaa
(Izr. 2:1-70)

4 He wode Yerusaalame katamay loytsi aakonne wolk'k'aama; shin Aa giddon de'iyaa asaa paydu loytsi guutsaa. K'ay daro golliikka biro kees'ettibeenna. 5 Hewaappe guyyiyaan, asaa kaaletsiyaawantta, kaappatuwaanne asaa ubbaa shiishshaade unttunttu yeletaa maaran maaran mazggabana mala, S'oossay taana k'ofisseedda. Omooduwaappe kasetiide simmeedda asaa yeletaa maaraa mas'aafaakka demmaad; he mas'aafan s'aafetteeddawe hawaa.

6 Baabloone Kaatii Naabukadanas'oore omoodiide, bare gadiyaa afeedda asaappe guyye barenttu katamaa katamaa Yerusaalamenne Yihudaa simmeedda asatuu hawaappe kaalliyaawantta. 7 Unttunttu kaappatuu Zarubaabeela, Iyyaasa, Nahimiyaa, Azaariyaa, Ra'aamiyaa, Nahamaana, Marddikiyoosa, Bilishaana, Misppereeta, Bigiwaaya, Nahuumanne Ba'aana.

Omooduwaappe simmeedda Israa'eeliyaa asaa paydu hawaa.
8 Par"oosha yaratuu 2,172.
9 Shafaas'iyaa yaratuu 372.
10 Araaha yaratuu 652. 11 Iyyaasunne Iyoo'aaba naanaa gideedda Paahati-Moo'aaba yaratuu 2,818.
12 Elaama yaratuu 1,254.
13 Zattu yaratuu 845.
14 Zakkaaya yaratuu 760.
15 Biinuya yaratuu 648.
16 Bebaaya yaratuu 628.
17 Azggaada yaratuu 2,322.
18 Adoonik'aama yaratuu 667.
19 Bigiwaaya yaratuu 2,067.
20 Adiina yaratuu 655.
21 Hizk'k'iyaasa yaraa gideedda As'eera yaratuu 98.
22 Hashuuma yaratuu 328.
23 Bes'aaya yaratuu 324.
24 Hariifa yaratuu 112.
25 Gabaa'oona yaratuu 95.
26 Beeteleemenne Nas'oofa katamatuwaa Asay 188.
27 Anaatoota katamaa Asay 128.
28 Beeti-Azimaawetuwaa katamaa Asay oytamanne laa"uwaa.
29 K'iriyaati-Yi'aariima, Kafiiranne Ba'eroota katamatuwaa Asay 743.
30 Raamanne Gebaa'a katamatuwaa Asay 621.
31 Mikimaasa katamaa Asay 122.
32 Beeteelenne Ay katamatuwaa Asay 123.
33 Laa"entso Nabo geetettiyaa katamaa Asay 52.
34 Laa"entso Elaama yaratuu 1,254.
35 Hariima katamaa Asay 320.
36 Yaarikko katamaa Asay 345.
37 Looda, Hadiidanne Oono katamatuwaa Asay 721.
38 Sanaa'a katamaa Asay 3,930.

39 Hawaappe kaaliyaawanttu omooduwaappe simmeedda k'eesetuwaa:

Iyyaasu yara gideedda Yadaaya yaratuu 973;
40 Imeera yaratuu 1,052;
41 Paashihuura yaratuu 1,247;
42 Hariima yaratuu 1,017.
43 Hawaappe kaaliyaawanttu omooduwaappe simmeedda Leewatuwaa:
Hodaawiyaa yara gideedda Iyyaasunne K'aadimi'eela yaratuu 74; 44 Asaafa yara gideedda mazimuriyaa yes's'iyaawanttu 148; 45 Geeshsha Golliyaa penggiyaa naagiyaa
Shaaluuma, As'eera, S'almmoona, Ak'k'uuba, Has'iis'anne Shobaaya yaratuu 138.
46 Hawanttu omooduwaappe simmiide,
Geeshsha Golliyaan ootsiyaa k'oomatuwaa yaratuwaa:
S'iiha yaratuwaa, Hasuufa yaratuwaa, S'abba'oota yaratuwaa, 47 K'eeroosa yaratuwaa, Sii'a yaratuwaa, Padoona yaratuwaa, 48 Labaana yaratuwaa, Hagaaba yaratuwaa, Shalmmaaya yaratuwaa, 49 Hanaana yaratuwaa, Giddeela yaratuwaa, Gahaara yaratuwaa, 50 Ra'aaya yaratuwaa, Raas'iina yaratuwaa, Nak'oda yaratuwaa, 51 Gazzaama yaratuwaa, Uuza yaratuwaa, Paaseeha yaratuwaa, 52 Besaaya yaratuwaa, Me'uniima yaratuwaa, Nafushesiima yaratuwaa, 53 Baak'ibuuk'a yaratuwaa, Hak'uufa yaratuwaa, Harihuura yaratuwaa, 54 Baas'iliita yaratuwaa, Mahiida yaratuwaa, Harshsha yaratuwaa, 55 Bark'k'oosa yaratuwaa, Sisaara yaratuwaa, Temaaha yaratuwaa, 56 Nas'iiha yaratuwaanne Has'iifa yaratuwaa.

57 Hawaappe kaaliyaawanttu omooduwaappe simmeedda Solomone k'oomatuwaa yaratuwaa:

Sos'aaya yaratuwaa, Sofereeta yaratuwaa, Pariida yaratuwaa, 58 Yaa'ila yaratuwaa, Dark'k'oona yaratuwaa, Giddeela yaratuwaa, 59 Shafaas'iyaa yaratuwaa, Has's'iila yaratuwaa, Pokereti-Has's'abayma yaratuwaanne Amoona yaratuwaa.

60 Omooduwaappe simmiide, Geeshsha Golliyaan ootsiyaa k'oomatuwaa yaratuunne Solomone k'oomatuwaa yaratuu paydu ubbaanna 392.

61 Haratuukka k'ay, Telmmelaaha, Teliharshsha, Karuuba, Adoonanne Imeera geetettiyaa katamatuwaappe Yerusaalame simmeeddino. Shin unttunttu woy unttunttu aawotuu Israa'eeliyaa sheeshsha gidiyaawaa erissanaw danddayibeykkino. 62 Hewanttu Dalaaya, S'oobbiyaanne Nak'oda yaratuwaa; unttunttu payduukka ubbaanna 642.

63 K'eesetuwaappe k'ay Hobaaya yaratuu, Hak'k'oos'a yaratuunne Barzzillaaya yaratuu Yerusaalame simmeeddino. Hawe Barzzillaaya giyaawe Gala'aade biittaa asaa gideedda Barzzillaaya naatto akkiidde, bare bolluwaa suntsaa akkeedda. 64 Hawanttu barenttu yeletaa s'ap'uwaa eranaw yeletaa mas'aafan koyeeddino, shin demmibeeykkino. Hewaa diraw, unttunttu tunaadan paydettiide, k'eesetetsan ootsennaadan digetteeddino. 65 K'ay Geeshsha Saamatuwaan shaakki pirddiyaa k'eesii denddana gakkanaw, unttunttu geeshsha k'umaappe maanaw danddayennawaa Ayhudatuwaa mooddiyaawe unttunttoo odeedda.[a]

66 Omooduwaappe Yihudaa biittaa simmeedda asaa paydu ubbaanna 42,360. 67 Hewaa bollakka k'ay 7,337 attuma k'oomatuunne mac'c'a k'oomatuu mazimuriyaa yes's'iyaa 245 attumawaanne mac'c'a asatuu simmeeddino. 68 Omooduwaappe ubbaanna simmeedda asaa paratuwaa paydu 736; bak'ulotuu 245; 69 gaalotuu 435; haretuu k'ay 6,720.

70 Yaratuwaa kaappatuwaappe amareedawanttu oosoo imotaa immeeddino. Biittaa mooddiyaawe hosppun kiilo giraame work'k'aa, 50 disttetuwaanne 530 k'eesatuwaa mayotuwaa immeedda. 71 Yaratuwaa kaappatuu 168 kiilo giraame work'k'aanne 1,250 kiilo giraame biraa immeeddino. 72 Atteeda Asay ubbaanna 168 kiilo giraame work'k'aa, 1,100 kiilo giraame biraanne 67 k'eesatuwaa mayotuwaa immeeddino.

73 Hewaappe guyyiyaan k'eesatuu, Leewatuu, penggiyaa naagiyaawanttu, mazimuriyaa yes's'iyaawanttu, asaappe darotuunne Geeshsha Golliyaa k'oomatuu, ubbaanna Israa'eeliyaa ubbay barenttu kataman kataman utteeddino.[b]

<- Nahimiyaa 6Nahimiyaa 8 ->