6 ሄ ጋላስ ሜጉ፥ ሻቻይነ ꬉማይ ደኤና፤ 7 ሄ ጋላሳይ ቃምነ ጋላስ ባይና፥ መꬍና ጎዳይ ኤርያ ዱማ ጋላሳ ግዳናዋ፤ ሄ ጋላስ ቃማይካ ፖኦ ግዳናዋ።
8 ሄ ጋላስ ደኡዋ ሃꬃይ የሩሳላመፐ ጎጋና፤ አፐ ባጋይ ማጽንያ አባን ገላና፤ ቃይ ባጋይ ሜድተራነ አባን ገላና። ሄ ሃꬃይ ባልጉዋን ቦንያን ጎጊደ ደአና። [a] 9 ቃይ መꬍና ጎዳይ ሳኣ ኡባ ቦላ ካተታና፤ ሄ ጋላስ እት መꬍና ጎዳ ጻላላይ ደአና፤ አ ሱንꬃይካ መጽ እቱዋ ግዳናዋ።
10 ገባአፐ ዶሚደ፥ የሩሳላመፐ ገድሳ ባጋና ደእያ ርሞና ግያ ካታማ ጋካናዉ ደእያ ቢታይ ኡባይ ደምባታና። ሽን የሩሳላመ ቢንያማ ፐንግያፐ ቢደ፥ በን ፐንግያ ባጋና ዞዝያ ፐንግያ ጋካናዉነ፥ ቃይ ሀናንኤላ አዱሳ ግምቢያፐ ቢደ፥ ካትያ ዎይንያ ጉምኢያሳ ጋካናዉ፥ ባረ ሳኣን ꬎቁ ጊደ ደአና። 11 የሩሳላመ፥ አሳይ ደኢያሳ ግዳና፤ ሄዋፐ ጉይያን እዛ ꬋዩኩ፤ እዝን ደእያ አሳይካ ህርግ ባይናን ሳሮ ደአና። [b]
12 መꬍና ጎዳይ የሩሳላመና ኦለቴዳ አሳ ኡባ ሾጫና ቦሻይ ሀዋ: ኡንቱንቱ ኤቁዋን ደእሽን፥ ኡንቱንቱ አሹ ዎቃና፤ ኡንቱንቱ አይፊ ጮጭያን፥ ኡንቱንቱ እንጻርሳይካ ኡንቱንቱ ኮክያን ዎቃና። 13 ሄ ጋላስ መꬍና ጎዳይ ኡንቱንቱ ዎልቃማ ዳጋማ ዳጋንꬃና፤ አሳይ ኡባይ እቱ እቱዋ ኩሽያ ኦይቂደ፥ እቱ እቱዋና ኦለታና። 14 ይሁዳ አሳይ የሩሳላመ ባጋ ግዲደ ኦለታና። ቃይ ዩሹዋን ደእያ ካዉተꬃቱዋ ኡባቱዋ አቁዋ፥ ዎርቃ፥ ብራነ ማዩዋ ፓይዱ ባይናዋ ኦሞዲደ ሺሻና። 15 ሀ ቦሻ ማላ ቦሻይ ፓራቱዋ ቦላ፥ ባቁሎቱዋ ቦላ፥ ጋሎቱዋ ቦላ፥ ሀረቱዋ ቦላነ ሞርከቱ ዱንካኔዳሳን ደእያ መህያ ኡባ ቦላ ያና።
16 ሄዋፐ ጉይያን፥ የሩሳላመና ኦለቴዳ ካዉተꬃቱዋ ኡባፐ ፓጻ አቴዳ ኡባይ ካትያዉ፥ ኡባፐ ዎልቃማ መꬍና ጎዳዉ ጎይናናዉነ ዳስያ ባኣላ ቦንቻናዉ ላይꬃን ላይꬃን የሩሳላመ ባና። [c] 17 ቃይ ሀ ሳኣን ደእያ አሳፐ ኦንነ ካትያዉ፥ ኡባፐ ዎልቃማ መꬍና ጎዳዉ ጎይናናዉ የሩሳላመ ቤናን ꬋዮፐ፥ ሄ አሳዉ እራይ ቡከና። 18 ግብጼ ቢታ አሳይካ ቢደ ጎይነናን እጾፐ እራይ ቡከና፥ ዳስያ ባላ ቦንቻናዉ ቤናን እጽያ አሳ መꬍና ጎዳይ ሾጭያ ቦሻይ ኡንቱንቱ ቦላንካ ያና። 19 ዳስያ ባላ ቦንቻናዉ ቤናን እጽያ ግብጼነ ሀራ ካዉተꬃቱ ኡባይ ሙረታና ሙሩ ሀዋ ግዳናዋ።
20 ሄ ጋላስ ፓራቱዋ ቆꬍያን አꬅያ ዳላቱዋ ቦላንካ፥ “መꬍና ጎዳዉ ጌዬዳዋ” ጌተቲደ ጻፈታና። መꬍና ጎዳ ጌሻ ጎልያን ደእያ ካꬅያ ኦቶቱካ ያርሽያ ሳኣ ስንꬃን ደእያ ጌሻ ከረቱዋ ማላ ግዳናዋ። 21 የሩሳላመንነ ይሁዳን ደእያ ኦቶ ኡባይ ኡባፐ ዎልቃማ መꬍና ጎዳዉ ጌሻ ግዳናዋ፤ ያቶፐ ያርሹዋ ያርሽያ አሳይ ኡባይ ዪደ፥ ሄ ኦቶቱዋ አኪደ፥ ያርሹዋ አሹዋ ኡንቱንቱን ካꬃና። ሄ ጋላስ ኡባፐ ዎልቃማ መꬍና ጎዳ ጌሻ ጎልያ ግዶን አይ ዛልአንቻይነ ደኤና።
<- ዛካራሳ 13