1 ዶርሳይ ላፑንꬃ ማታፋ ዶዬዳ ዎደ፥ ባካ ሳትያ ግድያዋ ኬና ሳሉ ጮኡ ጌዳ።

2 ሄዋፐ ጉይያን፥ ታን ላፑ ኪታንቻቱዋ ጾሳ ስንꬃን ኤቂያዋንታ በኣድ፤ ኡንቱንቶ ላፑ ማላካታይ እመቴዳ።

3 እጻና ጩዋይያ ዎርቃ ሚሻ ኦይቄዳ ሀራ ኪታንቻይ ዪደ፥ ያርሽያ ሳ ማታን ኤቄዳ። ዎርቃፐ መቴዳ ያርሽያሳይ ካዉተꬃ ኦይድያ ስንꬃን ደኤ፤ ሄ ያርሽያ ሳ ቦላ ጌሻ ኡባቱዋ ዎሳ ጉጃና ማላ፥ ኪታንቻዉ ዳሮ እጻናይ እመቴዳ። [a] 4 እጻና ጩዋይ ጌሻቱዋ ዎሳና እትፐ ሄ ኪታንቻ ኩሽያፐ ፑደ ጾሳኮ ቤዳ። 5 ሄዋፐ ጉይያን፥ ኪታንቻይ እጻና ጩዋይያዋ አኪደ፥ ያርሽያ ሳፐ ታማ ቦንቁዋ አኪደ፥ አን ኩንꬄዳ። ሄ እጻና ጩዋይያዋ ዱገ ሳኣ ኦልና፥ ጉጉንꬃይ ጉሜዳ። ዋልቃንꬃይ ዎልቃሜዳ፤ ቃይ ቢታይካ ቃጼዳ። [b]

6 ቃይ ላፑ ማላካታ ኦይቂደ ላፑ ኪታንቻቱ ማላካታ ፑናናዉ ጊጌድኖ።

7 ኮይሮ ኪታንቻይ ባረ ማላካታ ፑንና ሱꬃና ዋላከቴዳ ሻቻይነ ታማይ ሳኣን ቡኬዳ። ሳኣፐ ሄዘንꬆ ኩሺ ጉደቴዳ፤ ምꬃፐካ ሄዘንꬆ ኩሺ ጉደቴዳ፤ ማታ ኡባይካ ጉደቴዳ። [c]

8 ላኤንꬆ ኪታንቻይካ ባረ ማላካታ ፑኔዳ። ዎልቃማ ደርያ ማላትያባይ ታማን ኤጺደ፥ አባን የገቴዳ፤ ያትና፥ አባፐ ሄዘንꬆ ኩሺ ሱꬃ ግዴዳ። 9 አባን ደኡዋን ደእያ መታቱዋ ሄዘንꬆ ኩሺ ሀይቄዳ፤ ማርካበቱዋፐካ ሄዘንꬆ ኩሺ ꬋዬዳ።

10 ሄዘንꬆ ኪታንቻይ ባረ ማላካታ ፑንና ሻፋፐነ ፑልቱዋ ሃꬃፐ ሄዘንꬆ ኩሽያ ቦላ ሳሉዋፐ ጾምፕያዳን ኤጽያ ዎልቃማ ጾልንቲ ዎꬌዳ።[d] 11 ሄ ጾልንትያ ሱንꬃይ ጫሙዋ ጌተቴ። ሃꬃፐ ሄዘንꬆ ኩሺ ጫሜዳ፤ ቃይ ሃꬃይ ጫሜዳ ድራዉ፥ ዳሮ አሳይ ሄ ሃꬃ ኡሺደ ሀይቄዳ። [e]

12 ኦይደንꬆ ኪታንቻይ ባረ ማላካታ ፑኔዳ። አዋፐ፥ አገናፐነ ጾልንትያፐ ሄዘንꬆ ኩሺ ደሸቴዳ፤ ኡንቱንቱ ፖኡዋፐካ ሄዘንꬆ ኩሺ ꬉሜዳ። ሄዋ ድራዉ፥ ጋላሳፐ ሄዘንꬆ ኩሺ፥ ቃማፐካ ሄዘንꬆ ኩሺ ꬉሜዳ።[f]

13 እት አርጋንꬃይ ሳሉዋን ፓልያዋ ታን በኣድ። ሄ አርጋንꬃይ ባረ ቃላ ꬎቁ ኦꬂደ፥ “ሄዙ ኪታንቻቱ ፑናና በስያ የኮ ማላካታይ ፑነትያ ዎደ፥ ሳኣን ደእያ አሳዉ አዬሮ! አዬሮ! አዬሮ!” ያግያዋ ስሳድ።

<- ዮሃንሳ ሳፃ 7ዮሃንሳ ሳፃ 9 ->