1 ዶርሳይ ላፑንꬃ ማታፋ ዶዬዳ ዎዴ፥ ባካ ሳቲያ ጊዲያዋ ኬና ሳሉ ጮዑ ጌዳ።

2 ሄዋፔ ጉዪያን፥ ታኒ ላፑ ኪታንቻቱዋ ፆሳ ሲንꬃን ኤቂያዋንታ ቤዓዲ፤ ኡንቱንቱሲ ላፑ ማላካታይ ኢሜቴዳ።

3 ኢፃና ጩዋዪያ ዎርቃ ሚሻ ኦይቄዳ ሃራ ኪታንቻይ ዪዴ፥ ያርሺያሳ ማታን ኤቄዳ። ዎርቃፔ ሜꬌቴዳ ያርሺያሳይ ካዉቴꬃ ኦይዲያ ሲንꬃን ዴዔ፤ ሄ ያርሺያሳ ቦላ ጌሻ ኡባቱዋ ዎሳ ጉጃና ማላ፥ ኪታንቻው ዳሮ ኢፃናይ ኢሜቴዳ። [a] 4 ኢፃና ጩዋይ ጌሻቱዋ ዎሳና ኢቲፔ ሄ ኪታንቻ ኩሺያፔ ፑዴ ፆሳኮ ቤዳ። 5 ሄዋፔ ጉዪያን፥ ኪታንቻይ ኢፃና ጩዋዪያዋ ኣኪዴ፥ ያርሺያሳፔ ታማ ቦንቁዋ ኣኪዴ፥ ኣኒ ኩንꬄዳ። ሄ ኢፃና ጩዋዪያዋ ዱጌ ሳዓ ኦሊና፥ ጉጉንꬃይ ጉሜዳ። ዋልቃንꬃይ ዎልቃሜዳ፤ ቃሲ ቢታይካ ቃፄዳ። [b]

6 ቃሲ ላፑ ማላካታ ኦይቂዴ ላፑ ኪታንቻቱ ማላካታ ፑናናው ጊጌዲኖ።

7 ኮይሮ ኪታንቻይ ባሬ ማላካታ ፑኒና ሱꬃና ዋላኬቴዳ ሻቻይኔ ታማይ ሳዓን ቡኬዳ። ሳዓፔ ሄዜንꬆ ኩሺ ጉዴቴዳ፤ ሚꬃፔካ ሄዜንꬆ ኩሺ ጉዴቴዳ፤ ማታ ኡባይካ ጉዴቴዳ። [c]

8 ላዔንꬆ ኪታንቻይካ ባሬ ማላካታ ፑኔዳ። ዎልቃማ ዴሪያ ማላቲያባይ ታማን ኤፂዴ፥ ኣባን ዬጌቴዳ፤ ያቲና፥ ኣባፔ ሄዜንꬆ ኩሺ ሱꬃ ጊዴዳ። 9 ኣባን ዴዑዋን ዴዒያ ሜꬌታቱዋ ሄዜንꬆ ኩሺ ሃይቄዳ፤ ማርካቤቱዋፔካ ሄዜንꬆ ኩሺ ꬋዬዳ።

10 ሄዜንꬆ ኪታንቻይ ባሬ ማላካታ ፑኒና ሻፋፔኔ ፑልቱዋ ሃꬃፔ ሄዜንꬆ ኩሺያ ቦላ ሳሉዋፔ ፆምፒያዳን ኤፂያ ዎልቃማ ፆሊንቲ ዎꬌዳ። [d] 11 ሄ ፆሊንቲያ ሱንꬃይ ጫሙዋ ጌቴቴ። ሃꬃፔ ሄዜንꬆ ኩሺ ጫሜዳ፤ ቃሲ ሃꬃይ ጫሜዳ ዲራው፥ ዳሮ ኣሳይ ሄ ሃꬃ ኡሺዴ ሃይቄዳ። [e]

12 ኦይዴንꬆ ኪታንቻይ ባሬ ማላካታ ፑኔዳ። ኣዋፔ፥ ኣጌናፔኔ ፆሊንቲያፔ ሄዜንꬆ ኩሺ ዴሼቴዳ፤ ኡንቱንቱ ፖዑዋፔካ ሄዜንꬆ ኩሺ ꬉሜዳ። ሄዋ ዲራው፥ ጋላሳፔ ሄዜንꬆ ኩሺ፥ ቃማፔካ ሄዜንꬆ ኩሺ ꬉሜዳ። [f]

13 ኢቲ ኣርጋንꬃይ ሳሉዋን ፓሊያዋ ታኒ ቤዓዲ። ሄ ኣርጋንꬃይ ባሬ ቃላ ꬎቁ ኡዲዴ፥ «ሄዙ ኪታንቻቱ ፑናና ቤሲያ ዮኮ ማላካታይ ፑኔቲያ ዎዴ፥ ሳዓን ዴዒያ ኣሳው ኣዬሮ! ኣዬሮ! ኣዬሮ!» ያጊያዋ ሲሳዲ።

<- ሳፃ ማፃፋ 7ሳፃ ማፃፋ 9 ->