1 ሄዋፐ ጉይያን፥ ኪታንቻይ ታና ጾሳ ካዉተꬃ ኦይድያፐነ ዶርሳ ካዉተꬃ ኦይድያፐ ጎግያ ብርሊያዳን ጶልያ ደኡዋ ሃꬃ ሻፋ በሴዳ። [a] 2 ሄ ሻፋይ ካታማ ኦግያ ግዱዋና ዱገ ጎጌ። ሻፋፐ ሄፍንꬃ ባጋናነ ሀፍንꬃ ባጋና አገናን እት ገደነ ላይꬃን ታማነ ላኡ ገደ አይፍያ ደኡዋ ምꬃይ ደኤ። ሄ ምꬃ ቦንቹ ደእያዌ፥ ዛርያ ኡባ ሀርግያፐ ፓꬃናሳ።[b]
3 ሄ ካታማን ጾሳ ሸቃይ አይነ ባዋ። ጾሳ ካዉተꬃ ኦይዲነ ዶርሳ ካዉተꬃ ኦይዲ ሄ ካታማን ደአና። ጾሳ ኦሳንቻቱ ጾሳዉ ጎይናና። [c] 4 ኡንቱንቱ አ ዴሙዋ በአና፤ አ ሱንꬃይ ኡንቱንቱ ዴሙዋን ጻፈታና። 5 ሄዋፐ ስንꬃዉ ሀራ ቃማይ ባዋ። ኡንቱንቶ ጾምፕያ ዎይ አዋ ፖኡዋ ኮሸና፤ አያዉ ጎፐ፥ ጎዳይ ጾሳይ ኡንቱንቶ ጾምፕያ ግዳናዋ። ኡንቱንቱ መꬍ መꬍናዉ ካተታና። [d]
7 የሱስ፥ “በአ! ታን ኤለካ ያና። ሀ ማጻፋን ደእያ ትምቢትያ ናግያዋንቱ አንጀቴዳዋንታ” ያጌዳ።
8 ታን ዮሃንስ፥ ሀ ኡባባ ስሳድነ በኣድ። ታን ሀዋ ስሴዳ ዎደነ በኤዳ ዎደ፥ ሄዋ ታና በሴዳ ኪታንቻዉ ጎይናናዉ፥ አ ገድያን ኩንዳድ። 9 ሽን ኪታንቻይ ታና፥ “ሄዋ ኦꬆፓ። ታን ኔናዳንነ ናበ ግዴዳ ነ እሻቱዋዳን፥ ቃይ ማጻፋን ደእያባዉ አዛዘትያ ኡባቱዋዳን አይልያ። ጾሳዉ ጎይና” ያጌዳ።
10 ሄዋፐ ጉይያን፥ ኪታንቻይ ታና፥ “ሀናና ጌዳ ሀ ማጻፋ ቃላ ማታፋን ጎርዶፓ። አያዉ ጎፐ፥ ሀ ኡባባይ ፖለትያ ዎዲ ማታቴዳ። 11 ኢታባ ኦꬅያዌ ጉጂደካ ኢታባ ኦꬆ፤ ቱናይ ጉጂደካ ቱኖ። ሎኦባ ኦꬅያዌ ጉጂደካ ሎኦባ ኦꬆ፤ ጌሻይነ ጉጂደካ ጌሻ ግዶ” ያጌዳ። [e]
12 የሱስ፥ “በአ! ታን ኤለካ ያና። አሳ ኡባዉ አ ኦሱዋዳን እማናዉ፥ ታ ዎይታ አካ ያና። [f] 13 ታን አልፋነ ኦሜጋ፤ ኮይሩዋነ ዉርሰꬃ፤ ዶመꬃነ ፖሉዋ” ያጌዳ። [g]
14 ባረንቱ ማዩዋ ጌሽ ሜጭያዋንቱ አንጀቴዳዋንታ። ደኡዋ ምꬃ አይፍያ ማናዉነ ካታማ ፐንግያና ገላናዉ ኡንቱንቶ ማታይ እመቴዳ። [h] 15 ሽን ካናቱ፥ ብትያዋንቱ፥ ዎሹምያዋንቱ፥ ሸምፑዋ ዎꬍያዋንቱ፥ ኤቃዉ ጎይንያዋንቱነ ባረንቱ ሃሳያንነ ባረንቱ ኪታን ዎርዶትያዋንቱ ካረና ደኢኖ።
16 “ታን የሱስ፥ ሀ የዉዋ ህንተንቶ ዎሳ ጎለቱዋን ማርካታና ማላ፥ ታ ኪታንቻ ኪታድ። ታን ዳዊታ ጎልያ የለታ። ታን ፖእስያ ዎንታ ባካልያ” ያጌዳ። [i]
17 ጌሻ አያናይነ ገለዉና፥ “ሃያ” ያጊኖ። ቃይ ሀዋ ስስያዌ ኦንነ፥ “ሃያ” ያጎ። ሳመቴዳ አሳይ ኦንነ ሃ ዮ። ደኡዋ ሃꬃ ኮይያ አሳይ ኦንነ ጮ አኮ። [j]
18 ታን ሀ ማጻፋን ጻፈቴዳ ሀናና ጌዳ ቃላ ስስያ ኦናነ ዞራይ። ኦንነ ሀ ቃላ ቦላ እትባ ጉጆፐ፥ ጾሳይ ሀ ማጻፋን ጻፈቴዳ ቦሻ አ ቦላ ጉጃና። 19 ኦንነ ማጻፋን ደእያ ትምቢትያ ቃላፐ አያነ ፓጭሶፐ፥ ሀ ማጻፋ ግዶን ቆንጭሴዳ ደኡዋ ምꬃ አይፍያፐነ ጌሻ ካታማፐ አ ጋክያ ግሹዋ ጾሳይ ፓጭሳና። [k]
20 ሀ ኡባባዉ ማርካትያዌ፥ “ቱማ! ታን ኤለካ ያና” ያጌ።