1 ሄዋፔ ጉዬ፥ ማቃ ማላቲያ ሊኪያ ፃምዓይ ታው ኢሜቴዳ፤ ታና ጌዳዌ ሃዋ፤ «ባዴ ፆሳ ጌሻ ጎሊያኔ ያርሺያሳ ሊካ። ሄዋን ጎዪኒያዋንታካ ፓይዳ። ሂዝ 40፡3፤ ዛክ 2፡1-2 2 ሺን ጌሻ ጎሌው ካሬ ባጋ ኣጋ ባሻ፤ ሄዋ ሊኮፓ። ኣዪሲ ጎፔ፥ ሄ ሳዓይ ኣዪሁዳ ጊዴና ኣሳው ኢሜቴዳ። ኣዪሁዳ ጊዴና ኣሳይ ጌሻ ካታማ ኦይታማኔ ላዑ ኣጌናው ዬꬋና። ሉቅ 21፡24 3 ታኒ ጋቢያ ማዬዳ ታ ላዑ ማርካቱዋ ኪታና፤ ኡንቱንቱ ኢቲ ሻዓኔ ላዑ ፄታኔ ኡሱፑን ታሙ ጋላሳን ፆሳ ኪታ ኦዳና» ያጌዳ።

4 ሄ ላዑ ማርካቱ ሃ ሳዓ ጎዳ ሲንꬃን ኤቂያ ፆምፒያ ዎꬂያ ላዑ ባላቱዋ። ዛክ 4፡3፣ 11-14 5 ኦኒኔ ኡንቱንታ ቆሃናው ኮዮፔ፥ ኡንቱንቱ ዶናፔ ታማይ ኬሲዴ ኡንቱንቱ ሞርኬቱዋካ ꬋዪሴ። ቃሲ ኦኒኔ ኡንቱንታ ቆሃናው ኮዮፔ፥ ሄዋዳንካ ሃይቃና። 6 ኡንቱንቱ ፆሳ ኪታ ኦዲያ ዎዲያን ኢራይ ቡኬናዳን፥ ሳሉዋ ጎርዳናው ኡንቱንቱሲ ማታይ ዴዔ። ኡንቱንቱሲ ሃꬃ ሱꬃ ኬሲያ ማታይካ ዴዔ፤ ቃሲ ኡንቱንቱ ባሬና ኮሺያ ዎዴ፥ ሳዓ ዱማ ዱማ ቦሻን ሾጫናው ኡንቱንቱሲ ማታይ ዴዔ። 1ካት 17፡1፤ ኬስ 7፡17-19፤ 1ሳም 4፡8

7 ኡንቱንቱ ባሬንቱ ማርካቴꬃ ዉርሴዳዋፔ ጉዪያን፥ ጪሞ ኦላፔ ፑዴ ኬሲያ ዶዓይ ኡንቱንቱና ኦሌታና። ሄ ዶዓይ ኡንቱንታ ፆኒዴ ዎꬋና። ዳን 7፡7፣ 21፤ ሳፅ 13፡5-7፤ 17፡8 8 ኡንቱንቱ ጎዳይ ማስቃሊያ ቦላን ሚሲማሪያን ꬊሼቲዴ ሱሌቴዳ ካታማ ዎጋ ኦጊያን ኡንቱንቱ ኣኃይ ጊሳናዋ። ሄ ካታማይ ሌሚሱዋን ሶዶማ ዎይ ጊብፄ ጌቴቲዴ ፄሴቴ። ኢሳ 1፡9-10 9 ቃሲ ያራ ኡባፔ፥ ቆሙዋ ኡባፔ፥ ዱማ ዱማ ቢታ ቃላፔኔ ዛሪያ ኡባፔ ዬዳ ኣሳይ ኡንቱንቱ ኣኃ ሄዙ ጋላሳኔ ባጋ ቤዓና። ኣኃይ ሞጌቴና ማላ፥ ሄ ኣሳይ ዲጋና። 10 ሳዓን ዴዒያ ኣሳይ ሃ ቲምቢቲያ ኦዲያ ላዑ ኣሳቱዋ ሃይቁዋን ናሼታና። ኣሳይ ኡንቱንቱ ሃይቁዋ ኢቱ ኢቱዋና ኢሞታ ላሜቲዴ ቦንቻናዋ፤ ኣዪሲ ጎፔ፥ ሳዓን ዴዒያ ኣሳ ኡንቱንቱ ዳሪሲ ሜቶꬄዲኖ።

11 ሄዙ ጋላሳኔ ባጋፔ ጉዪያን፥ ዴዑዋ ሼምፑዋ ፆሳይ ኡንቱንቱን ሼምፒና፥ ኡንቱንቱ ዴንዲ ኤቄዲኖ። ኡንቱንታ ቤዔዳ ኡባይ ኢታ ያሻ ያዬዳ። ሂዝ 37፡10 12 ሄዋፔ ጉዪያን፥ ሄ ቲምቢቲያ ኦዲያ ላዑ ኣሳቱ ሳሉዋፔ፥ «ሃ ፑዴ ኬሲቴ» ጊያ ዎልቃማ ኮሻ ሲሴዲኖ። ባሬንቱ ሞርኬቱ ባሬንታ ፄሊሺን፥ ኡንቱንቱ ሻሪያን ጌሊዴ፥ ፑዴ ሳሉዋ ቤዲኖ። 2ካት 2፡11

13 ሄ ሳቲያን ቢታይ ሎይꬂ ቃፂና ካታማፔ ታሙንꬃ ኩሺ ꬋዬዳ። ቃሲ ቢታ ቃꬃን ላፑ ሻዓ ኣሳይ ሃይቄዳ። ኣቴዳ ኣሳይ ሎይꬂ ኮኮሪ ያዪዴ፥ ሳሉዋ ፆሳ ጊታቴꬃ ሳቤዳ።

14 ላዔንꬆ ኣዬሮ ጊያዌ ኣꬌዳ። ሺን ኣኬኪቴ፤ ሄዜንꬆ ኣዬሮ ጊያዌ ኤሌካ ያናዋ።

15 ሄዋፔ ጉዪያን፥ ላፑንꬃ ኪታንቻይካ ባሬ ማላካታ ፑኔዳ። ሳሉዋን፥