ማዝሙርያ 105

105

ማላልስያ እስራኤልያ ታርክያ

(1 ኦዱዋ 16:8-22)

1 መꬍና ጎዳ ጋላትተ፤ አ ሱንꬃ ጼስተ።

እ ኦꬄዳዋ ካዉተꬃቱዋ ግዱዋን ኤርስተ።

2 አ ሳቢተ፤ ጋላታ የꬃ አዉ የጽተ።

አ ማላልስያ ኦሱዋ ኡባባ ኦድተ።

3 አ ጌሻ ሱንꬃን ጬቀትተ፤

መꬍና ጎዳ ኮይያ ዎዛናቱ ናሸትኖ።

4 መꬍና ጎዳነ አ ዎልቃ ጾሞስተ፤

ኡባ ገደ አ ስንꬃ ኮይተ።

5 እ ኦꬄዳ ማላልስያባ፥

አ ማላታነ እ ፕርዴዳ ፕርዳ ሀሳይተ።

6 ህንተኖ፥

አ ቆማ አብራሃማ ዘረꬃቶ፥

ዶረቴዳ ያቆባ ናቶ።

7 እ መꬍና ጎዳ ኑ ጾሳ፤

አ ቱሞ ፕርዳይካ ሳኣ ኡባ ቦላና።

8 እ ባረ ጫቁዋ መꬍናዉ፥

ባረ አዛዜዳ ቃላ ሻኡ የለታ ጋካናዉ ናጌ።

9 ሄዌነ፥ እ፥ አብራሃማና ጫቀቴዳ ጫቁዋ፥ [a]

ይሳቃዉ ጫቄዳ ጫቁዋ፥

10 ያቆባዉ ዎጋ፥ [b]

እስራኤልያዉካ መꬍና ጫቁዋ

ኦꬂደ ምንሴዳ።

11 ሀዋዳን ያጌዳ፤

“ነዉ ካናነ ቢታ እማና፤

እ ነ ዘረꬃቶ ላታ ግዳና” ያጌዳ።

12 ጾሳ አሳቱ ፓይዱዋን ጺ ጉꬃነ

ካናነ ቢታን በተ ግዲደ ደእያ ዎደ፥

13 እት ጋድያፐ ሀራ ጋድያ፥

እት ካዉተꬃፐ ሀራ ካዉተꬃ ዩዬድኖ።

14 ጾሳይ ኡንቱንታ ኦንነ ናቃናዉ እምቤና፤ [c]

ኡንቱንቱ ድራዉ ካተቱዋ ሴሪደ፥

15 “ታን ኦኬዳዋንታ ቦቾፕተ፤

ታ ትምቢትያ ኦድያዋንታ ቆሆፕተ” ያጌዳ።

16 ጾሳይ ቢታን ኮሻ የዲደ፥ [d]

ኡንቱንቱ ካꬃ ኡባ ꬋይሴዳ።

17 ሽን እ ባረ አሳ አሻናዉ፥ [e]

እት ብታንያ ግብጼ ኪቴዳ፤

ሄ ብታኒ አይለ ግዲደ ዛልኤቴዳ ዮሴፋ።

18 አ ገደቱ ብራታን ቃሸቴድኖ፤ [f]

ኡንቱንቱ አ ሳንሳላታን ቃቼድኖ።

19 እ ካሰ ኦዴዳዌ ፖለታና ጋካናዉ፥

መꬍና ጎዳ ቃላይ አ ፓጬዳ።

20 ግብጼ ካቲ ኪቲደ ቃሾ ጎልያፐ ከሴዳ፥ [g]

ጋድያ ሞድያዌ ብሌዳ።

21 እካ፥ አ ባረ ጎልያዉ ጎዳ ኦꬄዳነ።[h]

ባረዉ ደእያዋ ኡባ ቦላ ሱንꬄዳ።

22 ባረዉ ዋና ካፖቱዋ አዛዛና ማላነ

ባረ ጭማቱዋ ዞራና ማላ ማታዬዳ።

23 ሄዋፐ ጉይያን፥ እስራኤሊ ግብጼ ገሌዳ፥ [i]

ያይቆበ ካመ ቢታን በተ ግዲደ ደኤዳ።

24 መꬍና ጎዳይ ባረ አሳ ዳሮ ጮራዬዳ፤ [j]

ኡንቱንቱ ሞርከቱዋፐ ኡንቱንታ አꬂደ ምንꬄ።

25 እ ግብጼ አሳይ ባረ አሳ እጻናዳንነ

ባረ ቆማቱዋ ጭማናዳን ኦꬄዳ።

26 ሄዋፐ ጉይያን፥ ባረ ቆማ ሙሳነ [k]

ባረ ዶሬዳ አሮና ኡንቱንቱኮ ኪቴዳ።

27 ኡንቱንቱ ግብጼ አሳቱዋ ስንꬃን ጾሳ ማላታ፥

ካመ ቢታን ኦራꬃባ ኦꬄድኖ።

28 ጾሳይ ꬉማ ኪቲደ፥ [l]

ሄ ቢታ ꬉምሴዳ፤

ሽን ግብጼ አሳቱ አ አዛዙዋ እጼድኖ።

29 እ ኡንቱንቱ ሃꬃ ሱꬃዉ ላሚደ፥ [m]

ሞለቱዋ ዎꬌዳ።

30 ኡንቱንቱ ቢታ ኡባ፥ [n]

ካትያ ጎልያካ ሸꬊ ኩሜዳ።

31 እ አዛዝና፥ ኡዱንጺነ ቢኒ [o]

ኡንቱንቱ ቢታ ኡባ ቦላ ሻምእሻምኤዳ።

32 ኡንቱንቱ ቢታ ቦላን እራ ድራዉ

ሻቻ ዋልቃንꬃና ቡክሴዳ። [p]

33 እ ኡንቱንቱ ዎይንያ ቱራነ

ባላስያ ግያ ምꬃ ሾጬዳ፤

ኡንቱንቱ ቢታን ደእያ ምꬃካ ክንቼሬꬄዳ።

34 እ አዛዝና፥ ቦሊነ

ፓይዱ ባይና ቡምቡረꬃይ ከሴዳ። [q]

35 ኡንቱንቱ ቢታን ዶሌዳ ካꬃ ኡባ ሜዳ፤

ሳኣፐ እርጻባ ኡባካ ም ꬋይሴዳ።

36 ጾሳይ ግብጼ አሳቱዋ ጎለ ባይራ ናናቱዋ ኡባ ዎꬌዳ፤[r]

ኮይሮ የለቴዳ ኡባ ꬋይሴዳ።

37 ሄዋፐ ጉይያን፥ እ እስራኤልያ አሳ

ዎርቃነ ብራ አሌቁዋና ከሴዳ፤ [s]

ኡንቱንቱ ግዶፐ ኩንዲደ አቴዳዌ ኦንነ ባዋ።

38 ግብጼ አሳቱ ኡንቱንቶ ዳሮ ያዬዳ ድራዉ፥

ኡንቱንቱ ከሴዳዋን ናሸቴድኖ።

39 ጾሳይ ኡንቱንታ ካማናዉ ሻርያ ምጬዳ፤ [t]

ቃማ ኡንቱንቶ ፖእሳናዉ ታማ ጊግሴዳ።

40 ኡንቱንቱ ምያዋ ኦችና፥

አካ ማላትያ ካፎቱዋ ኡንቱንቶ የዴዳ፤ [u]

ኡንቱንታ ሳሉዋ ቁማ ካልሴዳ።

41 እ ሹቻ ጳልቂና፥

ሃꬃይ ፑልቴዳ፤

ሻፋዳን ባዙዋን ጎጌዳ።

42 እ ባረ ቆማ አብራሃማዉ፥

ገሌዳ ጌሻ ቃላ ሀሳዬዳ።

43 እ ባረ አሳ ናሸቻን፥

ባረ ዶሬዳዋንታ እልልሳን ከሴዳ።

44 እ ኡንቱንቶ ሀራ አሳቱዋ ቢታ እሜዳ፤ [v]

ኡንቱንቱ ሀራቱ ዳቡሬዳ ጎሻ ላቴድኖ።

45 ሄዋ እ ኦꬄዳዌ ኡንቱንቱ አ ዎጋ

ናጋናዳናነ አ ህግያ ኦꬃናዳና።

መꬍና ጎዳ ጋላትተ!

<- ማዝሙርያ 104 ማዝሙርያ 106 ->