1 ታናዳን ፆሳ ካሊያዋንቶ፥ ታኒ ሲቂያዋንቶ፥ ላሞቲያዋንቶ፥ ታና ናሼቺያዋንቶ፥ ታና ꬎቁ ኦꬂያዋንቶ፥ ታ ዳባቶ፥ ሲሚ ጎዳን ሂንቴንቱ ሚኒ ኤቃናው ቤሴ።

2 ኤዎዴኔ ሲንፂኬ፥ ሂንቴንቱ ላዑካ ቆፋን ኢቱዋ ጊዲዴ፥ ጎዳን ዴዓናዳን፥ ታኒ ሂንቴና ዞራይ። 3 ቃሲ ታናና ኦꬂያ ኣማኔቴዳዎ፥ ኔኒ ሃ ማጫ ኣሳቱዋ ማዳናዳን፥ ታኒ ኔና ዎሳይ፤ ኣዪሲ ጎፔ፥ ኡንቱንቱ ታናናኔ ኡንቱንቱ ሱንꬃይ ፆሳ ዴዑዋ ማፃፋን [a] ፃፌቴዳ ቃሌሚንፆሳና ቃሲ ታናና ኢቲፔ ኦꬂያ ሃራቱዋ ኡባና ዎንጋላ ኡባሳ ጋꬃናው ዳቡሬዲኖ።

4 ጎዳና ሂንቴንቱ ዴዒያ ዴዑዋን ኡባ ዎዴ ናሼቲቴ፤ ታኒ ሃዋ ጉጃዴካ ጋይ፤ ናሼቲቴ።

5 ኣሳይ ኡባይ ሂንቴንቱ ኣሺኬቴꬃ ኤሮ፤ ጎዳይ ማታን ያና። 6 ፆሳ ሂንቴንቱ ዎሲያ ዎሳ ኡባን ኣ ሎይꬂ ጋላቲዴ፥ ሂንቴና ኮሺያዋ ኡባው ዎሲቴፔ ኣቲን፥ ኢቲባዉካ ሂርጎፒቴ። 7 ቃሲ ኣሳ ኤራቴꬃ ኡባፔ ኣꬊያ ፆሳ ሳሮቴꬃይ ሂንቴንቱ ዎዛናኔ ሂንቴንቱ ቆፋ ጎዳ ዬሱሲ ኪሪስቶሳ ባጋና ናጋና።

8 ዉርሴꬃን፥ ታናዳን ፆሳ ካሊያዋንቶ፥ ሂንቴንቱ ዎዛናን ሎዖባኔ ጋላቲሲያዋ ቆፒቴ፤ ቱማ ጊዲያባ ኡባ፥ ቦንቺሲያዋ ኡባ፥ ባዪዙዋ ጊዴናባ ኡባ፥ ጌሻባ ኡባ፥ ሲቁዋ ኡባ፥ ሱሬ ጊዲያባ ኡባ ቆፒቴ። 9 ሂንቴንቱ ታፔ ታማሬዳዋ፥ ኣኬዳዋ፥ ሲሴዳዋኔ ቤዔዳዋ ኡባ ኦꬂቴ፤ ቃሲ ኑሲ ሳሮቴꬃ ኢሚያ ፆሳይ ሂንቴናና ኢቲፔ ጊዳናዋ።

10 ሺን ዳሮ ዎዲያፔ ጉዪያን፥ ሃዒ ሂንቴንቱ ታዋ ላዔንꬁዋ ቆፓናው ዶሜዳ ዲራው፥ ታኒ ጎዳን ሎይꬃ ናሼታይ፤ ታው ቆፓናው ሂንቴንቶ ኢንጄቴናን ኢፄዳዋፔ ኣቲን፥ ታው ቆፋ ቆፒታ። 11 ታኒ ሃዋ ታና ሜቴዳ ዲራው ጊኬ፤ ኣዪሲ ጎፔ፥ ታው ዴዒያባይ ታው ጊዳና [b] ጊያዋ ታኒ ታማራዲ። 12 ታኒ ሜቶቲዴ ዎቲ ዴዓኔንቶ ኤራይ፤ ቃሲ ዱሬቲዴ ዴዒያዌካ ኣዬንቶ ኤራይ፤ ሃቃን ጊዲናካ ኣዉዴ ጊዲናካ፥ ታኒ ካሉዋኔ ኮሻ ቃሲ ፓጫኔ ፓላሃ ታማራዲ። 13 ኪሪስቶሲ ታው ኢሜዳ ዎልቃን፥ ኡባባ ኦꬃናው ታኒ ዳንዳያይ።

14 ጊዶፔካ፥ ሂንቴንቱ ታ ሜቱዋ ታናና ሜቶቲዴ ዳሮ ሎይꬄዲታ፤ 15 ፒሊጲሲዮሳ ኣሳው፥ ዎንጋላ ሚሺራቹ ኮይሮ ሂንቴ ጊዶን ኦዴቴዳ፤ ሺን ታኒ ማቂዶኒያፔ ኬሴዳ ዎዴ፥ ታና ኣማኒያ ሂንቴንቱፔ ኣቲን፥ ሃራይ ማዲቤናዋ ሂንቴንቱ ሂንቴንቱ ሁጴው ኤሪታ፤ ቃሲ ኢሚያባንካ ኣኪያባንካ ሂንቴፔ ኣቲን፥ ሃራይ ታና ማዲቤና። [c] 16 ኣዪሲ ጎፔ፥ ታና ሜቱ ኦይቄዳ ዎዴ፥ ሃራይ ኣቶ ታኒ ቴሴሎንቂያን ዴዒሺንካ ታና ዛሪ ዛሪዴ ማዴዲታ። [d] 17 ታኒ ሂንቴዋ ቦላ ሃራባይ ጉጄታናዋ ኮዪያዋፔ ኣቲን፥ ዎዪታ ፃላላ ኣካናው ኮዪኬ።

18 ሺን ታኒ ሂንቴንቱ ኢሜዳዋ ኡባ ኣካዲ፤ ቃሲ ታው ፓላሂዴ ጊዲያዌ ዴዔ። ሂንቴ ኪቴዳ ኡባባ ኤፓፊሮዲቶሳፔ ኣካዲ፤ ኮሺያ ኡባይ ታው ዴዔ። ሂንቴ ታው ኪቴዳ ኢሙ ፆሳው ሳዉዋ ቶሺኩ ጊያኔ ኢ ዶሲያ፥ ኣ ናሼቺያ ያርሹዋ ማላ። [e] 19 ቃሲ ታ ፆሳይ ባሬ ቦንቾ ዱሬቴꬃ ዳሩዋን ኪሪስቶሲ ዬሱሳ ባጋና ሂንቴና ኮሺያዋ ኡባ ሂንቴንቶ ኢማና። 20 ኑ ፆሳው፥ ኑ ኣዎ ሜꬊናፔ ሜꬊና ጋካናው ቦንቹ ጊዶ። ኣሜንዒ።

21 ኪሪስቶሲ ዬሱሳዋ ጊዲያ ፆሳ ኣሳቱዋ ኡባቱዋ ሳሮ ጊቴ። ታናና ሃዋን ዴዒያ ኢሻቱ ሂንቴና ሳሮ ጊኖ። 22 ሃዋን ዴዒያ ፆሳ ኣሳቱዋ ኡባቱ፥ ኡባፔካ ኣꬂዴ ካቲያ ቄሳሬ ጎሊያን ዴዒያዋንቱ ሂንቴና ሳሮ ጊኖ።

23 ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ጊዶ።

<- ፒሊጲሲዮሳ 3