1 መꬍና ጎዳይ ሙሳ፥ 2 “እስራኤልያ አሳ ድራዉ፥ ኔን ምድያማ አሳ ቦላ ጾሳ ሀሉዋ ከሳ፤ ሄዋፐ ጉይያን፥ ኔን ሀይቃና” ያጌዳ።

3 ሄዋ ድራዉ፥ ሙሴ አሳ፥ “ምድያማ አሳ ቦላ መꬍና ጎዳ ሀሉዋ ከሳና ማላ ኦላ ባናዉ፥ ህንተ አሳ ኦላ ሚሻ ዳንጭስተ። 4 እት እት እስራኤልያ ዛራቱዋፐ እት ሻአ አቱማ አሳ ኦላዉ የድተ” ያጌዳ።

5 እስራኤልያፐ ታማነ ላኡ ሻአ አቱማ አሳይ፥ እት እት ዛርያፐ እት ሻአ አሳይ፥ ኦላዉ ጊጌድኖ። 6 እት እት ዛርያፐ እት ሻአ አሳ ሙሴ ቄስያ ኤልኣዛራ ናኣ ፒንሃሳና ኦላዉ የዴዳ፤ ፒንሃስ ጌሻ ሚሻቱዋነ ማላታዉ ፑንያ ጹሩምባ ባረናና አኪደ ቤዳ። 7 መꬍና ጎዳይ ሙሳ አዛዜዳዋዳን፥ ኡንቱንቱ ምድያማ አሳና ኦለቲደ፥ አቱማ አሳ ኡባ ዎꬌድኖ። 8 ቃይ ምድያማ ካተቱዋ እቼሻቱዋ፥ ኤዋ፥ ረቄማ፥ ጹራ፥ ሁራነ ረባአ ግያዋንታ ዎꬌድኖ። ኡንቱንቱ ቃይ ብኦራ ናኣ ባላማካ ማሻን ሲፌድኖ። 9 እስራኤላቱ ምድያማ ማጫ አሳቱዋነ ናናቱዋ ኦሞዲደ፥ ኡንቱንቱ ሚዛ፥ ኡንቱንቱ ዶርሳ ዉድያነ ኡንቱንቱ ሚሻ ኡባ ቦንቄድኖ። 10 ምድያማ አሳቱ ደኤዳ ካታማቱዋ ኡባነ ኡንቱንቱ ሞꬃቱዋ ኡባ ታማን ጹጌድኖ። 11 ኡንቱንቱ አሳ፥ መህያነ ኦሞዴዳዋ ኡባ አክ አፌድኖ። 12 ኡንቱንቱ ኦሞዴዳ አሳቱዋነ ቦንቄዳባቱዋ ሙሴኮ፥ ቄስያ ኤልኣዛራኮነ እስራኤልያ ማባራኮ፥ ያርኮፐ ሄፍንꬃን፥ ዮርዳኖሳ ሻፋ ማታን ደእያ ሞኣባ ደምባን ኡንቱንቱ ዱንካኔዳሳ አሄድኖ።

13 ሙሴ፥ ቄሲ ኤልኣዛርነ ማባራ ካፓቱ ኡባይ ዱንካኔዳ ሳኣፐ ጋጻ ኡንቱንቱና ጋከታናዉ ከሴድኖ። 14 ኦላፐ ስሜዳ ጋዳዋቱ ቦላ፥ ሻላቃቱ ቦላነ ጼቱዋ ካፓቱ ቦላ ሙሴ ሀንቀቴዳ። 15 ሙሴ ኡንቱንታ ሀዋዳን ያጌዳ፤ “ማጫ አሳ ኡባ ህንተ አያዉ አሼድቴ? 16 ኡንቱንቱ ባላማ ዞርያን፥ ፓኦራ ግያ ሳን እስራኤልያ አሳይ መꬍና ጎዳ ናቂደ፥ ኤቃዉ ጎይናናዳን ኦꬄዳዋንታ፤ መꬍና ጎዳ አሳ ቦላ ቦሻይ ዬዳዌ ሄዋሳ። [a] 17 ሄዋ ድራዉ፥ ሀእ አቱማ ናናቱዋ ኡባ ዎꬍተ፤ ቃይ አቱማ አሳና ግሴዳ ማጫ አሳ ኡባ ዎꬍተ። 18 ሽን አቱማ አሳና ግሳቤና ማጫ ናናቱዋ ኡባ ህንተንቶ አሽተ። 19 ህንተ ግዶፐ አሳ ዎꬌዳ ኡራይ ዎይ አሃ ቦቼዳ ኡራይ ኦንነ ዱንካኔዳ ሳኣፐ ጋጻን ላፑን ጋላሳ ኡቶ፤ ሄዛንꬃ ጋላስነ ላፑንꬃ ጋላስ ህንተናነ ህንተ ኦሞዴዳዋንታ ጌሽተ። 20 ቃይ ማዮ ኡባነ ጋልባፐ፥ ዴሻ እክሰፐነ ምꬃፐ ኦሰቴዳዋንታ ኡባ ጌሽተ” ያጌዳ።

21 ቄሲ ኤልኣዛር ኦላፐ ስሜዳ ኦላንቻቱዋ ሀዋዳን ያጌዳ፤ “መꬍና ጎዳይ ሙሴዉ እሜዳ ህግያ ማራይ ሀዋ: 22 ዎርቃ፥ ብራ፥ ናሃስያ፥ ብራታ፥ ቆርቆሩዋነ እርሳስያ ግያ ብራታ 23 ታማን ሜተተናባቱዋ ኡባ ታማ ግዶና አꬅና፥ ሄዌ ጌያና። ሽን ሄዌ ቃይ ቱናተꬃፐ ጌይያ ሃꬃን ጌያናዉ ኮሼ። ቃይ ታማን ሜተትያባቱዋ ኡባ ቱናተꬃፐ ጌይያ ሃꬃን ጌሻናዉ ኮሼ። 24 ላፑንꬃ ጋላስ ህንተ ማዩዋ ሜጭተ፤ ህንተካ ጌይተ። ሄዋፐ ጉይያን፥ ዱንካኔዳሳ ገልተ” ያጌዳ።

25 መꬍና ጎዳይ ሙሳ ሀዋዳን ያጌዳ፤ 26 “ኔን፥ ቄሲ ኤልኣዛርነ ማባራ ካፓቱ ኦሞደቴዳ አሳነ መህያ ኡባ ፓይድተ። 27 ኦላን ኦለቴዳ ኦላንቻቶነ አቴዳ ማባራዉ ላኡ ከሲደ ሻክተ። 28 ኦለቴዳ ኦላንቻቱዋ ጋኬዳ ሻኩዋፐ፥ አሳ ግድና፥ ሚዛ ግድና፥ ሀረቱዋ፥ ዶርሳቱዋ ዎይ ዴሻቱዋ ግድና፥ እቼሹ ጼቱዋፐ እቱዋ መꬍና ጎዳዉ እሞታዳን እምተ። 29 ኡንቱንታ ጋኬዳ ባጋፐ አኬዳ ጊራ መꬍና ጎዳ ግሻዳን ቄስያ ኤልኣዛራዉ እምተ። 30 ህንኮ እስራኤላቱዋ ጋኬዳ ሻኩዋፐ፥ አሳ ግድና፥ ሚዛ ግድና፥ ሀረቱዋ፥ ዶርሳቱዋ፥ ዎይ ዴሻቱዋ ግድና፥ መህያ ኡባፐ እሻታሙዋፐ እቱዋ አኪደ ሄዋ መꬍና ጎዳ ዱንካንያዉ አዎትያ ሌዋቶ እምተ” ያጌዳ። 31 ሙሴነ ቄሲ ኤልኣዛር መꬍና ጎዳይ አዛዜዳዋዳን ኦꬄድኖ።

32-35 ኦላንቻቱ ባረንቶ አክና፥ አቴዳ ኦሞዱ 675,000 ዶርሳቱዋ፥ 72,000 ሚዛቱዋ፥ 61,000 ሀረቱዋነ አቱማ አሳና ግሳቤና 32,000 ማጫ ናናቱዋ። 36 ኦላን ኦለቴዳዋንታ ጋኬዳ ባጋ ሻኩ 337,500 ዶርሳቱዋ፤ 37 ኡንቱንቱፐ መꬍና ጎዳዉ እሞታ ከሴዳዋንቱ 675. 38 ሚዛቱ 36,000፤ ኡንቱንቱፐ መꬍና ጎዳዉ እሞታ ከሴዳዋንቱ 72. 39 ሀረቱ 30,500 ኡንቱንቱፐ መꬍና ጎዳዉ እሞታ ከሴዳዋንቱ 61. 40 ማጫ አሳቱ 16,000 ኡንቱንቱፐ መꬍና ጎዳዉ እሞታ ከሴዳዋንቱ፥ 32. 41 መꬍና ጎዳይ ሙሳ አዛዜዳዋዳን፥ መꬍና ጎዳ ጋክያ እሞታ ሙሴ ቄስያ ኤልኣዛራዉ እሜዳ።

42-46 ኦላንቻቱ አሄዳ ኦሞዱዋ ሙሴ ላኡ ከሲደ ሻክና፥ እስራኤልያ ማባራ ጋኬዳ ሻኩ 337,500 ዶርሳቱዋ፥ 36,000 ሚዛቱዋ፥ 30,500 ሀረቱዋነ 16,000 ማጫ አሳቱዋ። 47 እስራኤልያ ማባራ ጋኬዳ ሻኩዋፐ እሻታሙ እሻታሙ አሳፐ እቱዋነ እሻታሙ እሻታሙ መህያፐ እቱዋ ሙሴ አኪደ፥ መꬍና ጎዳይ ባረና አዛዜዳዋዳን፥ መꬍና ጎዳ ዱንካንያዉ አዎትያ ሌዋቶ እሜዳ።

48 ሄዋፐ ጉይያን፥ ኦላ ጋዳዋቱ፥ ሻላቃቱነ ጼቱዋ ካፓቱ ሙሴኮ ዬድኖ። 49 ኡንቱንቱ ሙሳ፥ “ኑን ነ ቆማቱ ኑ አዛዙዋ ጋርሳን ደእያ ኦላንቻቱዋ ፓይድና፥ እቱነ ፓጭቤና። 50 መꬍና ጎዳይ ኑ ሸምፑዋ አሼዳ ድራዉ፥ ኑን ሁጲያን ሁጲያን አኬዳ ዎርቃ አሌቆቱዋ፥ ኩሽያ ሳጋየቱዋ፥ ገድያ አልቦቱዋ፥ ምግዶቱዋ፥ ሀይꬃ ሎታቱዋነ ቆꬍያን አꬅያ አሌቁዋ መꬍና ጎዳዉ እሙዋ አሄዶ” ያጌድኖ። 51 ሙሴነ ቄሲ ኤልኣዛር ዎርቃ አሌቆቱዋ ኡባ ኡንቱንቱፐ አኬድኖ። 52 ሻኣ ካፓቱነ ጼቱዋ ካፓቱ አሂደ መꬍና ጎዳዉ እሜዳ ዎርቃይ ኡባይ ላኡ ጼቱ ኪሎ ግራመ ግድያዋ። 53 ሽን እት እት ኦላንቻቱ ኡባይ ባረንቱ ኦሞዱዋ ኦሞዱዋ ባረዉ አኬድኖ። 54 ሙሴነ ቄሲ ኤልኣዛር ሻኣ ካፓቱዋፐነ ጼቱዋ ካፓቱዋፐ አኬዳ ዎርቃ መꬍና ጎዳ ስንꬃን እስራኤልያ አሳ ሀሳይሳና ማላ፥ መꬍና ጎዳ ዱንካንያ ግዱዋ ገልሴድኖ።

<- ፓይዱዋ 30ፓይዱዋ 32 ->