1 እስራኤላቱ ሺጽማ ግያ ሳን ዱንካኔዳ ዎደ፥ አሳይ ሞኣባ ቢታ ማቼቱዋና ሻርሙጹዋ ዶሜዳ። 2 ሄ ማጫ አሳቱ ባረንቱ ጾሳቱዋ ያርሹዋ ማናዉ ኡንቱንታ ሾቤድኖ፤ ኡንቱንቱ ሚደ፥ ኡንቱንቱ ጾሳቶ ጎይኔድኖ። 3 እስራኤላቱ ፓኦራ ባኣላ ግያ ኤቃ ካሌዳ ድራዉ፥ መꬍና ጎዳ ሀንቁ ኡንቱንቱ ቦላን ኤጽ ከሴዳ። 4 ያትና መꬍና ጎዳይ ሙሳ፥ “መꬍና ጎዳ ሀንቁ እስራኤልያፐ ዎራ ስማና ማላ፥ ሀ አሳ ካለꬅያዋንታ ኡባ አፋደ፥ ሴታ ጋላስ መꬍና ጎዳ ስንꬃን ካቃ” ያጌዳ። 5 ሙሴ እስራኤልያ ዳናቱዋ፥ “ፓኦራ ባኣላ ግያ ኤቃዉ ጎይኔዳ ህንተ አሳ ኡባ ህንተ ሁጲያን ሁጲያን ዎꬍተ” ያጌዳ።

6 ሙሴነ እስራኤልያ ማባራይ ኡባይ ጋከትያ ዱንካንያ ፐንግያን ዬክሽን፥ እስራኤላቱዋፐ እቱ ምድያማ ቢታ ምሽራቶ ኡንቱንቱ ስንꬃና አꬂደ፥ ባረ ጎልያ አሳኮ አሄዳ። 7 ቄስያ አሮና ናኣ ኤልኣዛራ ናአይ ፒንሃስ ሄዋ በኤዳ ዎደ፥ ማባራ ግዶፐ ደንዲደ፥ ቶራ ባረ ኩሽያን ኦይቂደ፥ 8 ሄ እስራኤልያ ብታንያ ካሊደ፥ ዱንካንያ ግዶ ገሌዳ። እስራኤልያ ብታንያነ ምሽራቶነ ላኡዋካ ቶራን ጫዲደ፥ ካንꬅ ከሴዳ። ሄዋዳን ሀንና፥ ቦሻይ እስራኤላቱዋፐ ቃረቴዳ፤ 9 ሽን ሄ ቦሻን ሀይቄዳ አሳይ ላታማነ ኦይዱ ሻአ።

10 ሄዋፐ ጉይያን፥ መꬍና ጎዳይ ሙሳ ሀዋዳን ያጌዳ፤ 11 “ቄስያ አሮና ናኣ ኤልኣዛራ ናአይ ፒንሃስ እስራኤልያ አሳ ግዶን ታን ታ ቦንቾ ምሸትያዋዳን ምሸቴዳ ድራዉ፥ ኡንቱንቱ ቦላ ታን ሀንቀቴዳ ሀንቁ ዶቼዳ፤ ታንካ ኡንቱንታ ታ ሀንቁዋን ꬋይሳበይከ። 12 ሄዋ ድራዉ፥ ታን ታ ሳሮተꬃ ጫቁዋ አናና ጫቀትያዋ ፒንሃሳዉ ኔን ኦዳ። 13 እ ባረ ጾሳ ቦንቾ ምሸቴዳ ግሻዉነ እስራኤልያ አሳዉ አቶ ጊሴዳ ድራዉ፥ እነ አ ዘረꬃቱ መꬍናዉ ቄሰ ግዳናዋ” ያጌዳ።

14 ምድያማ ቢታ ምሽራትና ዎꬌዳ እስራኤልያ ብታንያ ሱንꬃይ ሳሉ ናኣ ዝምራ፤ ሳሉ ስሞና ዛራቱዋን እት ያራ ካፑዋ። 15 ሀይቄዳ ምድያማ ቢታ ምሽራት ሱንꬃይ ኮዝቦ፤ እ አዉ ጹር ምድያማቱ ያራ ካፑዋ።

16 መꬍና ጎዳይ ሙሳ ሀዋዳን ያጌዳ፤ 17 “ምድያማ ቢታ አሳቱዋ ሞርክተ፤ ኡንቱንታ ዎꬍተ። 18 አያዉ ጎፐ፥ ኡንቱንቱ ህንተና ፓኦራን ጭሚደ፥ ህንተዉ ሞርከ ግዴድኖ፤ ቃይ ቦሻ ጋላስ ፓኦራን ዎꬌዳ ምሽራት፥ ምድያማቱ ያራ ካፑዋ ናት ኮዝብ ጋሱዋን ኡንቱንቱ ህንተና ሞርኬድኖ” ያጌዳ።

<- ፓይዱዋ 24ፓይዱዋ 26 ->