1 መꬍና ጎዳይ ሙሳ ሀዋዳን ያጌዳ፤ 2 “ላኡ ጹሩምባቱዋ ብራፐ ቆጻደ ኦꬃ፤ ያታደ አሳ ሺቆ ጼጋናዉነ ቃይ ዱንካኔዳ ሳፐ ደንዳናዉ ደንꬃናዳን ፑና። 3 ሀ ላኡ ጹሩምባቱ ፑነትያ ዎደ፥ አሳይ ኡባይ ጋከትያ ዱንካንያ ፐንጊ ኔኮ ሺቆ። 4 ሽን እት ጹሩምባ ጻላላይ ፑነቶፐ፥ እስራኤልያ ዛራቱዋ ካፓቱ ነ ስንꬃ ሺቅኖ። 5 ኔን ጹሩምባ ꬎቁ ኦꬃደ ፑንያ ዎደ፥ አዋይ ዶልያ ባጋና ዱንካኔዳ ዛራቱ ደንድኖ። 6 ጹሩምባ ላኤንꬆ ꬎቁ ኦꬃደ ፑንያ ዎደ፥ ገድሳ ባጋና ዱንካኔዳ ዛራቱ ደንድኖ። ጹሩምባይ ꬎቁ ግ ፑነትያዌ ደንዳናዉ ማላ ግዶ። 7 ያአዉ አሳ ሺሻናዉ ጹሩምባ ፑና፤ ሽን ኮሻ ꬎቁ ኦꬃደ ፑኖፓ። 8 አሮና ናናይ ቄሳቱ ጹሩምባ ፑንኖ። ሀዌ ነዉነ ይያ የለታ ኡባዉ መꬍና ዎጋ ግዶ።

9 “ህንተ ጋድያን መቱዋ ደንꬅያ ህንተ ሞርክያና ህንተ ኦለታናዉ ከስያ ዎደ፥ ሄ ጹሩምባቱዋ ꬎቁ ኦꬂደ ፑንተ። ሄዋን መꬍና ጎዳይ ህንተ ጾሳይ ህንተና ሄ ዎደ ሀሳዪደ፥ ህንተ ሞርክያፐ ህንተና አሻና። 10 ሄዋዳንካ፥ ቃይ ህንተ ናሸትያ ጋላስ፥ ባላ ቦንቻናዉ ህንተ ኬሬዳ ጋላስነ አግናይ ጼርያ ባላን፥ ህንተ ጹግያ ያርሹዋ ያርሽያ ዎደነ ህንተ እትፐተꬃ ያርሹዋ ያርሽያ ዎደ ሄ ጹሩምባቱዋ ፑንተ፤ ሄዌ ጾሳ ስንꬃን ህንተና ሀሳይስያዋ ግዳና። ታን መꬍና ጎዳ፥ ህንተ ጾሳ” ያጌዳ።

11 ላኤንꬃ ላይꬃን ላኤንꬆ አግናን ላታማንꬃ ጋላስ፥ ሻሪ ማርካተꬃ ዱንካንያ ቦላፐ ደንዴዳ። 12 ሄዋፐ ጉይያን፥ እስራኤልያ አሳይ ሲና መላ ቢታፐ ደንዴዳ፤ ሻሪ ፓራና ግያ መላ ቢታ ጋኪደ ዎꬌዳ። 13 ኡንቱንቱ ሀ ኮይሮ ቡሳዉ መꬍና ጎዳይ ሙሴ ባጋና አዛዜዳዋዳን ደንዴድኖ።

14 ይሁዳ ዛራቱዋና ዱንካኔዳ ባጋይ ባረንቱ አርማ ኦይቂደ ኮይሮ ደንዴድኖ። ይሁዳ ዛራቱ ካፑ አምናዳባ ናኣ ናአሶና፤ 15 ይሳኮራ ዛራቱ ካፑ ጹኣራ ናኣ ናታንኤላ፤ 16 ዛብሎና ዛራቱ ካፑ ሄሎና ናኣ ኤልኣባ።

17 ሄዋፐ ጉይያን፥ ዱንካንያ ሾድና፥ ገርሾና ያራቱነ ማራራ ያራቱ ቶኪደ ደንዴድኖ።

18 ካሊደ ሮቤላ ዛራቱዋና ዱንካኔዳ ባጋይ ባረንቱ አርማ ኦይቂደ ደንዴዳ። ሮቤላ ዛራቱ ካፑ ሻደኡራ ናኣ ኤሊጹራ፤ 19 ስሞና ዛራቱ ካፑ ጹሪሻዳያ ናኣ ሻሉምኤላ፤ 20 ጋዳ ዛራቱ ካፑ ረኡኤላ ናኣ ኤልያሳፋ።

21 ሄዋፐ ጉይያን፥ ቃሃታ ያራቱ ጌሻ ሚሻቱዋ ቶኪደ ደንዴድኖ። ኡንቱንቱ ጋካናፐ ካሰቲደ፥ ዱንካኒ ቶለት ኡቴዳ።

22 ካሊደ ኤፍሬማ ዛራቱዋና ዱንካኔዳ ባጋይ ባረ አርማ ኦይቂደ ደንዴዳ። ኤፍሬማ ዛራቱ ካፑ አምሁዳ ናኣ ኤልሻማአ፤ 23 ምናሰ ዛራቱ ካፑ ፓዳጹራ ናኣ ጋማልኤላ፤ 24 ቢንያማ ዛራቱ ካፑ ጊድኦና ናኣ አብዳና።

25 ዉርሰꬃን፥ ሀ ጩጉዋ ኡባዉ ጉየ ባጋን ናግያ ዳና ዛራቱዋና ዱንካኔዳ ባጋይ ባረ አርማ ኦይቂደ ደንዴዳ። ዳና ዛራቱ ካፑ አምሻዳያ ናኣ አህኤዘራ፤ 26 አሴራ ዛራቱ ካፑ ኦክራና ናኣ ፓግኤላ፤ 27 ንፍታሌማ ዛራቱ ካፑ ኤናና ናኣ አህራአ። 28 እስራኤልያ አሳይ ባረ ባጋን ባጋን ደንዲደ ብያ ማራይ ሀዋዳና።

29 ሙሴ ምድያማ አሳ ግድያ ባረ ቦሉዋ ረኡኤላ ናኣ ሆባባ፥ “ኑን መꬍና ጎዳይ፥ ‘ታን ህንተንቶ እማና’ ጌዳ ሳኣ ቤቶ፤ መꬍና ጎዳይ እስራኤልያዉ ሎኦባ ኦꬃና ጌዳ ድራዉ፥ ኔን ኑናና ደንዳ። ኑን ነዉ ሎኦባ ኦꬃና” ያጌዳ።

30 ሆባብ፥ “ቱይት፥ ታን ቢከ፤ ታን ታ ቢታ ታ አሳኮ ባና” ያጌዳ።

31 ሙሴ አ፥ “ሀያና፥ ኑና የጋደ ቦፓርኪ! መላ ቢታን ኑን ዱንካናናዉ በስያሳ ኔን ኤራሳ፤ ኔን ኑ ብያ ኦግያ ኑና ካለꬃናዉካ ዳንዳያሳ። 32 ኔን ኑናና ቦፐ፥ መꬍና ጎዳይ ኑዉ እምያ አንጁዋ ኡባ ኑን ኔናና ሻካና” ያጌዳ።

33 ያትና ኡንቱንቱ መꬍና ጎዳ ደርያፐ ደንዲደ፥ ሄዙ ጋላሳ ኬሻ ኦግያ ቤድኖ። መꬍና ጎዳ ጫቁዋ ታቦታይ ኡንቱንቱ ሸምፕያ ሳኣ ደማናዉ ሄ ሄዙ ጋላሳን ኡንቱንቱፐ ስንꬃዉ ቤዳ። 34 ኡንቱንቱ ዱንካኔዳ ሳኣፐ ደንድያ ዎደ ኡባን፥ መꬍና ጎዳ ሻሪ ጋላስ ጋላስ ኡንቱንቱፐ ቦላና ደኤ። 35 ታቦታይ ደንድያ ዎደ ኡባን ሙሴ፥ “አቤት መꬍና ጎዳዉ፥ ደንዳ! ነ ሞርከቱ ላለትኖ፤ ኔና እጽያዋንቱካ ነ ስንꬃፐ ባቃትኖ” ያጌ። [a] 36 ታቦታይ ሸምፕያ ዎደ ኡባን ሙሴ፥ “አቤት መꬍና ጎዳዉ፥ ሀ ዳሮ ሻአን ፓይደትያ እስራኤልያ አሳኮ ኔን ስማ” ያጌ።

<- ፓይዱዋ 9ፓይዱዋ 11 ->