1 አርጸክስስ ካተቴዳ ላታማንꬆ ላይꬃን፥ ኒሳና ግያ አግናን፥ እት ጋላስ ካትያ ስንꬃን ዎይንያ ኤሳይ ደእያዋ አካደ፥ ታን አዉ እማድ። ሄ ጋላሳፐ አትና፥ ካሰ ኡባካ ካትያ ስንꬃን ካዮታ ኤርከ። 2 ሄዋ ድራዉ፥ ካቲ ታና፥ “ኔና ሳክያባይ ባዋ፤ ሽን ሀዋ ኬሻ አያዉ ካዮታዲ? ሀዌ ነ ዎዛና ካዮዬዳባይ እት አየንቶ ደእያዋ በሰ” ያጌዳ።

ሄዋፐ ጉየ ታን ሎይꬃ ያያ ዛራደ፥ 3 “ካቲ መꬍናዉ ደኦ! ታ ማይዛ አዎቱ ሞገቴዳ ካታማይ ኮለቲደ ꬋይና፥ ቃይ ሄ ካታማ ግምቢያ ድርሳ ፐንገቱካ ታማን ጹገትክችና፥ ታን አያዉ ካዮትክታ?” ያጋድ። [a]

4 ካቲካ ዛሪደ፥ “ያትና፥ ሀእ ታን ነዉ አያ ኦꬃናዳን ኮያይ?” ያጌዳ።

ታን ሳሉዋ ጾሳ ዎሳ ስማደ፥ 5 ካትያ ሀዋዳን ያጋድ፤ “ካትያዉ፥ ታን ኔና ናሸችያዋ ግዶፐ፥ ቃይ ታ ኦችያዋ ኔን እማናዉ ዶሶፐ፥ ይሁዳ ቢታ፥ ታ ማይዛ አዎቱ ሞገቴዳ ካታማ ባደ፥ ሄ ካታማ ዛራደ ኬጻና ማላ፥ ታና የዳርኪ”።

6 ሄ ዎደ፥ ካታታ ካትያ አርጸክሲሳ ኤለካ ኡት ደእሽን፥ ካቲ፥ “ነ ብያ ኦጊ ዎይሳ ዎድያ አካናዌ? ቃይ ኔን አዉደ ስማኒ?” ያጊደ ታና ኦቼዳ። ታንካ ታ ስማና ዎድያ አዉ ኦዳድ፤ ካቲ ናሸቲደ፥ ታና የዴዳ።

7 ቃይካ ካትያ ታን ሀዋዳን ያጋድ፤ “ካትያዉ፥ ኔና ናሸችያዋ ግዶፐ፥ ታን ይሁዳ ጋካናዉ፥ ሄ ቢታና አꬋደ ባና ማላ፥ ኤፍራጺሳ ሻፋፐ አዋይ ዉልያ ባጋ ቢታ ሞድያዋንቶ ዳብዳቢ ጻፈቶ። 8 ቃይ ጌሻ ጎልያ ግምቢያ ድርሳ ፐንግያ ጊግሳናዉ፥ ካታማ ግምቢያ ድርሳ ድራናዉነ ታን ደእያ ጎልያ ኬጻናዉ ታዉ ምꬃ እማና ማላ፥ ካትያ ዎራ ናግያ አሳፋዉካ ዳብዳቢ ጻፈቶ” ያጋድ። ጾሳ ሎኦ ኩሺ ታናና ደእያ ድራዉ፥ ካቲ ታን ኦቼዳዋ ኡባ እሜዳ።

9 ካቲ ታናና አማሬዳ ኦላ ጋዳዋቱዋነ ፓራ አሳቱዋ የዴዳ፤ ኡንቱንቱና እትፐ ኤፍራጺሳ ሻፋፐ አዋይ ዉልያ ባጋ ቢታ ባደ ጋካደ፥ ካቲ የዴዳ ዳብዳቢያ ሄ ጋድያ ሞድያዋንቶ እማድ። 10 ሽን ቤት-ሆሮና ጋደ አሳ ግዴዳ ሳንባላጽነ አሞና ጋድያ ካፑዋ ግዴዳ ጾቢ፥ “እስራኤልያ አሳዉ ሎኦባ ኦꬅያ አሳይ ዬዳ” ግያዋ ስሴዳ ዎደ፥ ሎይꬅ ሀንቀቴድኖ።

11 ታን የሩሳላመ ያደ ሄዙ ጋላሳ ያን ጋምኣድ። 12 ግዶ ሽን፥ የሩሳላመዉ ታን ኦꬃናዳን ታ ጾሳይ ታ ዎዛናን ዎꬄዳ ቆፋ ኦነ ኦዳበይከ። ሄዋፐ ጉይያን፥ ታናና ደእያ አሳፐ አማሬዳዋንታ አካደ፥ ቃማን ደንዳደ ባድ። ሄ ዎደ ታን ቶጌዳዋፐ ሀራ ቶጋ መሂ ኑዉ ባዋ። 13 ታን ብላህያን ደንዳደ፥ ዛንጋራ ግምቢያ ድርሳ ፐንግያና ከሳደ፥ ዳዊያ ፑልቱዋ ጌተትያ ሳኣና አꬋደ፥ ፕቱዋ ኦልያ ግምቢያ ድርሳ ፐንግያ ጌተትያ ፐንግያ ጋካናዉ ባድ። ሄዋን ኮለቴዳ የሩሳላመ ግምቢያ ድርሳነ ቃይ ታማን ጹገቴዳ ግምቢያ ድርሳ ፐንገቱዋ አኬካደ ጼላድ። 14 ሄዋፐ ስማደ፥ ፑልቱዋ ግምቢያ ድርሳ ፐንግያኮነ ዳጋቴዳ ካትያ ሃꬃይ ደእያ ሳኣ ባድ። ግዶ ሽን፥ ታን ቶጌዳ ቶጋ መሂ አꬍያ ኦግያ ደማበይከ። 15 ሄዋ ድራዉ፥ ቃማን ሃꬃይ ጎግያ ካካ ግዱዋና አꬋ ግምቢያ ጼላድ። ሄዋፐ ጉይያን፥ ጉየ ስማደ ዛንጋራ ፐንግያና ካታማ ገላድ።

16 ሄዋን ደእያ ካፓቱዋፐ ኦንነ ታን ሀቃ ባድታንቶ፥ ዎይ ቃይ አያ ኦꬃድታንቶነ ኤርቤና። አያዉ ጎፐ፥ ታን አይሁዳቶ፥ ቄሳቶ፥ ቦንቼቴዳ አሳቶ፥ ካፓቶነ ኪታ ኪተታናዉ ደእያ አሳፐ ኦነ ታ ቆፋ ብሮ ኦዳበይከ። 17 ሄዋፐ ጉይያን፥ ታን ኡንቱንቶ ሀዋዳን ያጋድ፤ “ኑን አይ ማላ መቱዋ ግዱዋን ደእንቶ በኢታ፤ አያዉ ጎፐ፥ የሩሳላመ ካታማይ ኮለቴዳ፤ ቃይ ግምቢያ ድርሳ ፐንገቱካ ታማን ጹገቴድኖ። ሽን ሀዋፐ ስንꬃዉ ኑን ሀዋዳን ካዉሺደ ደኤናዳን፥ አነ ደንዲደ፥ የሩሳላመ ግምቢያ ድርሳ ዛረꬂደ ግምቦይተ” ያጋድ። 18 ቃይ ታ ጾሳ ሎኦ ኩሺ ታናና ደእያዋነ ካቲ ታዉ ኦዴዳዋ ኡባ ኡንቱንቶ ኦዳድ።

ኡንቱንቱካ፥ “አነ ደንዶይተነ ዛረꬂደ ግምቦይተ” ያጌድኖ። ባረንቱ ኩሽያ ሎኦ ኦሶ ምንሴድኖ።

19 ሽን ቤት-ሆሮና ጋድያ አሳ ግዴዳ ሳንባላጽ፥ አሞና ጋድያ ኦሳንቻ ግዴዳ ጾቢነ አራባ ጋድያ አሳ ግዴዳ ጌሼም ሀዋ ስሴዳ ዎደ፥ ኑ ቦላን ቅሊጪደ ሚጬድኖ። ቃይ፥ “ሀዌ ህንተንቱ ኦꬅያባይ አዬ? ዎይ ቃይ ካትያ ቦላን ማካላናዉ ኮዪቴ?” ያጊደ ኦቼድኖ።

20 ታን ዛራደ፥ “ሳሉዋ ጾሳይ ኑዉ እንጀያና፤ ኑን አ ቆማቱ ግምቢያ ዶማና። ሽን የሩሳላመን ደእያባፐ ህንተንታ ጋክያ ግሹዋ ግድና፥ ማታ ግድና፥ ዎይ ህንተንቱ ዶገተናዳን ቆፍስያባይ ህንተንቶ ባዋ” ያጋድ።

<- ናህምያ 1ናህምያ 3 ->