1 ዳሮ አሳ ሱꬃ ጉሴዳ ነነዌ ካታማትዉ አዬሮ! ዎርዱ እዝን ኩም ኡቴዳ። እዛ ዎልቃን አኬዳነ ቦንቄዳ ዱረታዉ ፓይዱ ባዋ። 2 ናናዌ ካታማትን ልሱዋ አርፔሉ፥ ፓራ ጋርያ ገድያ ጉንꬃይ፥ ፓራቱዋ አንዳራሱነ ፓራ ጋረቱዋ ጉፋይ ስሰቴ። 3 ፓራ አሳቱ ነ ቦላ ዬድኖ፤ ማሻይ ጶሉጶሌ፤ ቶራቱካ ጶሊኖ። ዳሮ አሳይ ሀይቄዳ! አሃይ አሃ ቦላ ዶረቴዳ! ሀይቄዳባዉ ፓይዱ ባዋ! ሄዋና አꬊደ ብያ አሳይካ አሃን ꬉበቴ። 4 ሀዌ ኡባይ ሀኔዳዌ ዛዋይ ባይና ነነዌ ጫራተꬃ ጋሱዋና። እዛ ጮራ ሙሩኖ አቶ፤ ካዉተꬃቱዋ ባረ ጫራተꬃን፥ አሳካ ባረ ሙሩኑዋን አይለያዱ።

5 ኡባፐ ዎልቃማ መꬍና ጎዳይ፥ “በአ፥ ታን ነ ቦላን ደንዳድ! ታን ነ ማዩዋ ነ ቦላፐ ቃራና፤ ነ ካሉዋ ጋደ አሳ፥ ነ ፖኩዋካ ካዉተꬃቱዋ በሳና። 6 ታን ኔና ፕቱዋ ኦልያ ሳ ከሳና፤ ታን ኔና ካꬋና፤ ቃይ አሳይ ኡባይ ኔናን ቅሊጭያዋ ኦꬃና። 7 ኔና በእያ ኡባይ ኔፐ ሸልእ ጊደ፥ ‘በእተ፥ ናናዌ ካታማታ መላ ግዳዱ። እዝዉ ካዮትያዌ ኦኔ? እዞ ምንꬅያዌካ ሀቃፐ ቤታንዴሻ!’ ያጋና” ያጌ።

8 ኔኖ ነነዌ ካታማቴ፥ ኔን ቴብሶ ግያ ግብጼ ካታማትፐ ዳራይ? እዞ ናይለ ሻፋይ ዶድ ዎꬄዳ። ሻፋይ እዝዉ ተእያ ግምቢያ፤ ሃꬃቱካ እዝዉ ድርሳ። 9 ቶጲነ ግብጼ እዝዉ ዛዋይ ባይና ዎልቃ፤ ፑጸነ ሊቢ እዞ ማድያዋንታ። 10 ግዶፐነ፥ እዛ ኦሞደታደ ባዱ፤ እዝን ደእያ ጉꬃ ናናይካ ዳራጸቲደ፥ ኦግያ ጋጻን ኡባን ኩንዴድኖ። እዝ ቦንቼቴዳ አሳቱዋ ቦላን ሳማይ የገቴዳ፤ እዝ ዎልቃማ አሳቱ ኡባይካ ሳንꬃላታን ቃሸቴድኖ።

11 ኔኖ ነነዌ ካታማቴ፥ ኔን ቃይ ማꬆቲደ ጋንድጋርያ አሳዳን ሀናና። ነ ሞርከቱዋ ስንꬃፐ ቆሰታደ አትያሳ ኔን ኮያና። 12 ነ ጌሳቱ ኡባይ ኮይሮ ቴሬዳ ቴራይ ጋዉጨቴዳ ባላስያ ምꬃቱዋ ማላ፤ ሄ ባላስያ ምꬃ ቃꬅያ ዎደ፥ ቴራይ ምያዎ ዶናን ዎꬌ። 13 በአ፥ ነ ኦላንቻቱ ኡባይ ማጫ አሳ ማላ። ነ ዛዋ ፐንገቱካ ነ ሞርከቶ አኪደ ዶየቴድኖ፤ ጎርድያ ምꬃካ ታማይ ም ድጌዳ።

14 ነ ሞርከቱ ኔና ዶዲደ ኡንኤꬅያ ዎደ ኡሻናዉ ሃꬃ ትካ። ነ ጌሱዋካ ምንሳ፤ ኡርቃ የꬋ፤ አፐ ጹብያ መꬍያ ሚሻን ጹብያ ጊግሳ። 15 ኔና ያን ታማይ ማና፤ ቦሊ ካꬃ ምያዋዳን፥ ኔና ማሻን ቃንጸሬꬃና።

ኔን ቦልያዳን ዳራ፤ ቦልያዋዳንካ ጮራታ። 16 ኔን ነ ዛልአንቻቱዋ ሳሉዋ ጾልንተቱዋፐ አꬃደ ጮራያዳ። ሽን ሄዋንቱ ኡባይ ቦልያዳን ኡባባ ም ድጊደ፥ ፓል ꬋያና። 17 ነ ካፓቱነ ማታይ ደእያዋንቱ፥ ሜጎ ጋላስ ድርሳ ቦላን ኡቲደ፥ አዋይ ከስያ ዎደ ፓል ꬋይያ ቦለቱዋ ማላ፤ ኡንቱንቱ ቤዳ ሳካ ኤርያዌ ባዋ።

18 ኔኖ አሶረ ካተዉ፥ ነ ሄንꬃንቻቱ ገምእሼድኖ፤ ነ ቦንቼቴዳ አሳቱካ ጌሮቴድኖ። ነ አሳይ ደረቱዋ ቦላን ላለቴዳ፤ ኡንቱንታ ሺሽያዌካ ባዋ። 19 ነ መኡ ኮለተና፤ ነ ማዱꬃይካ ፓጸና። ነባ ስሴዳ ኡባይ ናሸቲደ፥ ኩሽያ ባቃና። አያዉ ጎፐ፥ ነ ዛዋይ ባይና ኢታተꬃፐ ከስ አኬዳ አሳይ ሙለካ ባዋ።

<- ናሆማ 2