ማርቆሳ 8

ዬሱሲ ኦይዱ ሻዓ ኣሳ ሚዜዳ

(ማት 15፡32-39)

1 ሄዎዴ፥ ጮራ ኣሳይ ቃሲ ዬሱሳኮ ሺቄዳ፤ ኣሳው ሚያባይ ꬋዪና፥ ዬሱሲ ባሬና ካሊያዋንታ ባሬኮ ፄሲዴ፥ 2 «ሃ ጮራ ኣሳይ ታናና ሄዙ ጋላሳይ ጋካናው ጋሚዒዴ፥ ሚያባ ኣይኔ ዴሚቤና ዲራው፥ ታኒ ኡንቱንቶ ቃሬታይ። 3 ታኒ ኡንቱንታ ኮሻና ሶይ ዬዶፔ፥ ቢዴ ኦጊያን ዳቡሪዴ ኩንዳና፤ ኣዪሲ ጎፔ፥ ኢቱ ኢቱ ሃኮሳፔ ዬዳ» ያጌዳ።

4 ኣ ካሊያዋንቱ ዛሪዴ፥ «ሃ ኣሳይ ባዪና ሳን ሃ ኣሳ ኡባ ሚዛናው ጊዲያ ቁማ ዴማናው ዳንዳዪያዌ ኦኔ?» ያጌዲኖ።

5 ዬሱሲ ኡንቱንታ፥ «ሂንቴንቶ ኣፑን ዳቡ ዴዒ?» ያጊዴ ኦቼዳ።

ኡንቱንቱ፥ «ላፑ ዳቡ ዴዔ» ያጌዲኖ።

6 ዬሱሲ ኣሳ፥ «ሳዓን ኡቲቴ» ያጊዴ ኣዛዜዳ፤ ቃሲ ላፑ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንꬂዴ፥ ኣሳው ጊሻና ማላ፥ ባሬና ካሊያዋንቶ ኢሜዳ። ዬሱሳ ካሊያዋንቱ ሄ ጮራ ኣሳሲ ጊሼዲኖ። 7 ኡንቱንቶ ቃሲካ ኣማሬዳ ሱፓ ሞሌቱ ዴዒኖ፤ ዬሱሲ ሄዋንቶካ ፆሳ ጋላቲዴ፥ ኣሳው ጊሻና ማላ፥ ባሬና ካሊያዋንታ ኣዛዜዳ። 8 ኣሳይ ኡባይ ሚዴ ካሊና ኣቴዳ ዶካይ ላፑ ዛምቤሊያ ኩሜዳዋ ኣ ካሊያዋንቱ ዴንꬄዲኖ። 9 ቁማ ሜዳ ኣሳይ ኦይዱ ሻዓ ጊዳና፤ ሄዋፔ ጉዪያን፥ ዬሱሲ ኣሳ ዬዴዳ። 10 ኢ ቃሲ ባሬና ካሊያዋንቱና ኤሌካ ዎንጊሪያን ጌሊዴ፥ ዳልማኑታ [a] ጊያ ጋዲያ ቤዳ።

ፓሪሳዋቱ ባሬንቶ ማላታይ ኦሴታና ማላ ኦቼዲኖ

(ማት 16፡1-4)

11 ፓሪሳዋቱ ዪዴ፥ ዬሱሳና ፓሉማ ዶሜዲኖ።

ዬሱሳ ፓጫናው ኮዪዴ፥ ሳሉዋፔ ማላታ ባሬንታ ቤሳና ማላ ኦቼዲኖ። 12 ዬሱሲ ዳሪሲ ቶኪ ሼምፒዴ፥ «ሃ ዎዲያ ኣሳይ ኣዪሲ ማላታ ኮዪ? ታኒ ሂንቴንቶ ቱሙዋ ኦዳይ፤ ሃ ዎዲያ ኣሳው ማላታይ ኡባካ ኢሜቴና» ያጌዳ። 13 ቃሲ ኡንቱንታ ሄዋን ኣጊዴ፥ ዛሪ ዎንጊሪያን ጌሊዴ፥ ኣባፔ ሄፊንꬃ ፒኔዳ።

ፓሪሳዋቱዋ ኢርሹዋኔ ሄሮዲሳ ኢርሹዋ

(ማት 16፡5-12)

14 ዬሱሳ ካሊያዋንቱ ቁማ ኣፋናዋ ዶጌዲኖ፤ ኡንቱንቶ ዎንጊሪያ ጊዶን ኢቲ ኡኪꬃፔ ሃራይ ባዋ። 15 ዬሱሲ ኡንቱንታ፥ «ሂንቴንታ ኤሪቴ፤ ፓርሳዋቱዋ ኢርሹዋፔኔ ሄሮዲሳ [b] ኢርሹዋፔ ናጌቲቴ» ያጊዴ ኣዛዜዳ።

16 ኡንቱንቱ ባሬንቱ ጊዶን፥ «ኢ ሃዋ ጊያዌ ኑሲ ቁማይ ባይና ዲራሳ» ያጊዴ ሃሳያ ዶሜዲኖ።

17 ዬሱሲ ኡንቱንቱ ጊያዋ ኤሪዴ፥ «ሂንቴንቶ ዳቡ ባዪናዋ ኣዪሲ ሃሳዪቴ? ሃዒ ጋካናው ሂንቴው ጌሌኔ? ዎይ ኣኬኪኪቴ? ሂንቴ ዎዛናይ ጆሌዴ? 18 ሂንቴንቶ ኣይፊ ዴዔ፤ ቤዒኪቴ? ቃሲ ሃይꬃይ ዴዔ፤ ሲስኪቴ? ሂንቴንቶ ሃሳዬቴኔ? [c] 19 ታኒ ኢቼሹ ዳቡዋ ኢቼሹ ሻዓ ኣሳው ሜንꬃ ኢሜዳ ዎዴ፥ ኣፑን ዛምቤሊያ ኩሜዳ ዶካ ዴንꬄዲቴ?» ያጌዳ።

ኡንቱንቱ፥ «ታማኔ ላዑ ዛምቤሊያ ኩሜዳ ዶካ ዴንꬄዶ» ያጌዲኖ።

20 «ታኒ ቃሲካ ላፑ ዳቡዋ ኦይዱ ሻዓ ኣሳው ሜንꬃዴ ኢሜዳ ዎዴ፥ ኣፑን ዛምቤሊያ ኩሜዳ ዶካ ዴንꬄዲቴ?» ያጌዳ።

ኡንቱንቱ፥ «ላፑ ዛምቤሊያ ኩሜዳ ዶካ ዴንꬄዶ» ያጌዲኖ።

21 ኢ ቃሲ፥ «ሃዒካ ኣኬኪቤይኪቴ?» ያጌዳ።

ዬሱሲ ቤቴሳይዳን ኢቲ ቆቃ ፓꬄዳ

22 ዬሱሲኔ ኣ ካሊያዋንቱ ቤቴሳይዳ ጊያ ካታማ ቤዲኖ፤ ኣሳቱ ቆቃ ቢታኒያ ዬሱሳኮ ኣሂዴ፥ ሄ ቢታኒያ ቦቻና ማላ፥ ኣ ዎሴዲኖ። 23 ዬሱሲ ቆቃ ቢታኒያ ኩሺያ ኦይቂዴ፥ ሄራፔ ጋፃ ኬሴዳ፤ ኣ ኣይፊያን ጩቺዴ፥ ባሬ ኩሺያ ኣ ቦላ ዎꬂዴ፥ «ኔው ኣዬንቶ ቤቲ?» ያጊዴ ኦቼዳ።

24 ቢታኒ ꬎቂዴ፥ «ታኒ ኣሳ ቤዓይ፤ ሺን ኣሳይ ሃሜቲዴ፥ ሚꬃ ማላቴ» ያጌዳ።

25 ሄዋፔ ጉዪያን፥ ዬሱሲ ሺሬቲዴ ቢታኒያ ኣይፊያን ባሬ ኩሺያ ዎꬄዳ። ኣ ኣይፊ ፓፄዳ፤ ቢታኒካ ሎይꬂ ፄሌዳ፤ ቃሲ ኡባባካ ጌሺዴ ቤዔዳ። 26 ዬሱሲ ቢታኒያ፥ «ሄራ ጌሎፓ» ያጊ ኣ ሶይ ዬዴዳ።

ጴፂሮሳ ኣማኑዋኔ ኣ ማርካቴꬃ

(ማት 16፡13-20፤ ሉቅ 9፡18-21)

27 ዬሱሲ ባሬና ካሊያዋንቱና ቂሳሪያ ፒሊጶሳ ዴዒያ ቄሪ ሄራቱዋ ቤዳ፤ ኢ ቢሺን ኦጊያን ዬሱሲ፥ «ታና ኣሳይ ኦና ጊ?» ያጊዴ ባሬና ካሊያዋንታ ኦቼዳ።

28 ኣ ካሊያዋንቱ፥ «ኢቲ ኢቲ ኣሳይ ኔና፥ ‹ፃማቂያ ዮሃኒሳ› ጌ፤ ሃራንቱ፥ ‹ኤላሳ› ጊኖ፤ ቃሲ ሃራንቱ፥ ‹ናባቱዋፔ ኢቱዋ› ጊኖ» ያጌዲኖ።

29 ዬሱሲ ኡንቱንታ፥ «ሂንቴሺ ታና ኦና ጊቴ?» ያጊዴ ኦቼዳ።

ጴፂሮሲ፥ «ኔኒ ዶሬቴዳ ኪሪስቶሳ» ያጊዴ ዛሬዳ።

30 ዬሱሲ፥ «ታባ ኦሲኔ ኦዶፒቴ» ያጊዴ ኡንቱንታ ኣዛዜዳ።

ዬሱሲ ባሬና ጋካና ሜቱዋባኔ ዋዪያባ ኮይሩዋ ሃሳዬ

(ማት 16፡21-28፤ ሉቅ 9፡22-27)

31 ዬሱሲ ባሬና ካሊያዋንታ፥ «ታኒ፥ ኣሳ ናዓይ፥ ዳሪ ዋዬታናው ቤሴ፤ ጪማቱ፥ ቄሳቱዋ ካፓቱኔ ሂጊያ ታማርሲያዋንቱ ታና ኢፃናው ቤሴ፤ ኡንቱንቱ ታና ዎꬋናዉኔ ታኒ ሄዜንꬂያ ጋላሳፔ ጉዪያን፥ ሃይቁዋፔ ዴንዳናው ቤሴ» ያጊዴ ታማሪሱዋ ዶሜዳ። 32 ሄዋ ኢ ኡንቱንቶ ጌሺዴ ኦዴዳ፤ ጴፂሮሲ ኣ ኢቲ ባጋ ዛሪዴ፥ ዞሬታ ዶሜዳ።

33 ሺን ዬሱሲ ጉዬ ሲሚዴ፥ ባሬና ካሊያዋንታ ፄሊዴ ጴፂሮሳ፥ «ሃ ሴፃናው፥ ኪቻ ታ ማታፔ! ኔን ኣሳይ ቆፒያዋ ቆፓሳፔ ኣቲን፥ ፆሳይ ቆፒያዋ ጊዴና» ያጌዳ።

ዬሱሳ ካሉሳይ ኦቺያ ጋቲያ

(ማት 10፡38-39፤ 16፡24-28፤ ሉቅ 9፡23-27፤ 14፡26-27)

34 ዬሱሲ ጮራ ኣሳኔ ባሬና ካሊያዋንታ ባሬኮ ፄሲዴ፥ «ታና ካላና ኮዪያ ኡራይ ዴዖፔ፥ ባሬና ካዶ፤ ያቲዴ ባሬ ማስቃሊያ ቶኪዴ፥ ታና ካሎ። 35 ኣዪሲ ጎፔ፥ ባሬ ሼምፑዋ [d] ኣሻና ኮዪያ ኡራይ ባዪዛናዋ፤ ሺን ታ ዲራዉኔ ዎንጋላ ሚሺራቹዋ ዲራው ባሬ ሼምፑዋ ባዪዚያ ኡራይ ኣሻናዋ። 36 ኢቲ ኡራይ ሳዓን ዴዒያ ኡባባ ባሬው ሺሺዴ፥ ባሬ ሼምፑዋ ባዪዞፔ፥ ኣ ኣያ ማዳኔ? 37 ኢቲ ኡራይ ባሬ ሼምፑዋ ዎዛናው ኣያ ኢማና ዳንዳዪ? 38 ፆሳ ኣማኔና ሃ ናጋራንቻ ዬሌታ ዎዲያን፥ ኢቲ ኡራይ ታናኒኔ ታ ቃላን ዬላቶፔ፥ ታኒካ፥ ኣሳ ናዓይ፥ ቃሲ ታ ኣዉዋ ቦንቹዋን ጌሻ ኪታንቻቱዋና ዪያ ዎዴካ፥ ኣኒ ዬላታና» ያጌዳ።

<- ማርቆሳ 7 ማርቆሳ 9 ->