1 መꬍና ጎዳይ ሙሳ ሀዋዳን ያጌዳ፤ 2 “አሮናዉ አ አቱማ ናናቶነ እስራኤልያ አሳ ኡባዉ ሀዋዳን ያጋደ ኦዳ፤ ‘መꬍና ጎዳይ አዛዜዳዌ ሀዋ: 3 እስራኤልያ አሳፐ ኦንነ ቦራ ዎይ ዶርሳ ዎይ ዴሻ ዱንካኔዳ ሳኣን ዎይ ዱንካኔዳ ሳኣፐ ጋጻና ሹኪደ፥ 4 መꬍና ጎዳዉ እሞታ ኦꬂደ እማናዉ መꬍና ጎዳ ዱንካንያ ፐንግያ መꬍና ጎዳ ስንꬃ አሀና ꬋዮፐ፥ ሄ ሱꬃን እ ኦሸቴ፤ ሄ አሳይ ሱꬃ ጉሴዳ። ሄዋ ድራዉ እ ባረ አሳ ግዶፐ ቦሄቶ። 5 ሄዋ ድራዉ እስራኤልያ አሳይ ባረንቱ ያርሹዋ መህያ ጮ ደምባን ሹክያዋ አጊደ፥ ሃ መꬍና ጎዳኮ፥ መꬍና ጎዳ ዱንካንያ ፐንግያን ደእያ ቄስያኮ አህኖ። ቄሲ ሄዋ አኪደ፥ መꬍና ጎዳዉ እትፐተꬃ ያርሹዋ ኦꬂደ ሹኮ። 6 ቃይ ቄሲ መꬍና ጎዳ ዱንካንያ ፐንግያን ደእያ መꬍና ጎዳዉ ያርሽያ ሳኣ ቦላን ሄ ሱꬃ ጫጫፎ፤ ሀንዳካ መꬍና ጎዳዉ ሳዉዋ ቶሹኩ ግያ ያርሹዋ ኦꬂደ ጹጎ። 7 እስራኤልያ አሳይ ጾሳ ካልያዋ አጊደ ካሌዳ ጻላሄቶ ላኤንꬆ ባረንቱ ያርሹዋ ያርሾፕኖ። ሀዌ ኡንቱንቶነ ይያ የለታ ኡባዉ መꬍናዉ ዎጋ ግዶ’ ያጋ።

8 “ኡንቱንታ ሀዋዳን ያጋ፤ ‘እስራኤልያ አሳፐ ግድና ዎይ ኡንቱንቱ ግዶን ደእያ ሀራ ቢታ አሳፐ ግድናካ፥ ኦንነ ጹግያ ያርሹዋ ዎይ ሀራ ያርሹዋ ሺሽያ ዎደ፥ 9 መꬍና ጎዳዉ ያርሻናዉ መꬍና ጎዳ ዱንካንያ ፐንግያ አሀና ꬋዮፐ፥ ሄ አሳይ ባረ አሳ ግዶፐ ቦሄቶ።

10 “ ‘እስራኤልያ አሳፐ ዎይ ኡንቱንቱ ግዶን ደእያ ሀራ ቢታ አሳፐ ኦንነ ሱꬃ ሞፐ፥ ሄ ሱꬃ ምያ አሳ ቦላን ታን ታ ዴሙዋ ቱካና፤ ታን ሄ ብታንያ አሳ ግዶን ቦሀና። [a] 11 አያዉ ጎፐ አሹዋ ማዬዳ ኡባ ደኡ አ ሱꬃ ግዶን ደኤ፤ ሱꬃይካ ቃይ ደኡዋ ሸምፑ አ ግዶን ደእያዋፐ ደንዴዳዋን ናጋራ አቶ ጊስያዋ ግድያ ድራዉ፥ ህንተ ናጋራ አቶ ጊሳናዳን፥ ታን ህንተንቶ ያርሽያ ሳኣ ቦላን ያርሻናዳን እማድ። [b] 12 ሄዋ ድራዉ ታን እስራኤልያ አሳ፥ “ህንተፐ ዎይ ህንተ ግዶን ደእያ ሀራ ቢታ አሳፐ ኦንነ ሱꬃ ሞፖ” ያጋድ።

13 “ ‘እስራኤልያ አሳፐ ዎይ ኡንቱንቱ ግዶን ደእያ ሀራ ቢታ አሳፐ ኦንነ ምያ ዶኣ ዎይ ካፉዋ ሻንካቲደ ዎꬎፐ፥ አ ሱꬃ ሳኣን ጉሲደ፥ ቢታ ካሞ። 14 አያዉ ጎፐ አሹዋ ማዬዳ ኡባ ሸምፑ አ ሱꬃ ግዶና። ሄዋ ድራዉ ታን እስራኤልያ አሳ፥ “አሹዋ ማዬዳ መታ ኡባ ሸምፑካ አ ሱꬃ ግዶን ደእያ ድራዉ፥ ሱꬃ ሞፕተ፤ ቃይ ምያ ኦንነ ባረ አሳ ግዶፐ ቦሄቶ” ያጋድ።

15 “ ‘እስራኤልያ አሳ ግድና ዎይ ኡንቱንቱ ግዶን ደእያ ሀራ ቢታ አሳ ግድና፥ ኦንነ ባኩታ ዎይ ዶአይ ኦይቂደ ዎꬌዳ አሹዋ ሞፐ፥ ባረ ማዩዋ ሜጮ፤ ባረ ቦላካ ሜጨቶ፤ ያቲደ ኦማርስ ጋካናዉ እ ቱና። ሄዋፐ ጉይያን፥ እ ጌሻ። 16 ባረ ማዩዋ ሜጫና ꬋዮፐ፥ ባረ ቦላካ ሜጨታና ꬋዮፐ፥ እ ባረ ናጋራን ኦሸቴ’ ያጋ” ያጌዳ።

<- ዎጋ 16ዎጋ 18 ->