1 መꬍና ጎዳይ ሙሴዉ ሀዋዳን ያጊደ ኦዴዳ፤ 2 “ዎልቃማ ጋልባ ሀርጊ ኦይቄዳ ብታኒ ጌይያ ጋላስ ኦꬃናዉ ኮሽያ ዎጋይ ሀዋ። ሄ ብታንያ ቄስያኮ አፋናዉ ኮሼ። [a] 3 ቄሲ አሳይ ዱንካኔዳ ሳኣፐ ጋጻ ከሲደ፥ አ ሀርግያ በኦ። ሄ ዎደ ዎልቃማ ጋልባ ሀርጊ ብታንያ ቦላፐ ꬋዬዳዋ ግዶፐ፥ 4 ቄሲ ፓጻ ደእያ ላኡ ጌሻ ካፎቱዋ፥ ጽድያ ምꬃ፥ ዞኦ ቃጭናነ ህሶጵያ ቦንጭያ ሄ ዎልቃማ ጋልባ ሀርግያፐ ጌይያ ብታንያ ድራዉ አሀናዳን ኡንቱንታ አዛዞ። 5 ሄዋፐ ጉይያን፥ ቃይ ቄሲ ላኡ ካፎቱዋፐ እቱዋ ከርያን ደእያ ፑልቶ ሃꬃ ቦላ ሹካናዳን አዛዞ። 6 ፓጻ ደእያ ካፉዋ፥ ቃይ ዝጋና፥ ዞኦ ቃጭናናነ ህሶጵያ ቦንጭያና አክ አፊደ፥ ከርያን ደእያ ፑልትያ ሃꬃ ቦላ ሹኬዳ ካፉዋ ሱꬃ ግዶ ናቆ። 7 ከሴዳ ሱꬃ ሄ ዎልቃማ ጋልባ ሀርግያፐ ፓጽያ ብታንያ ቦላ ላፑ ገደ ጫጫፎ፤ ያቲደ ሄ ብታኒ ጌሻ ግድያዋ ኤርሶ፤ ፓጻ ደእያ ካፉዋ ገደ ደምባ የዶ።

8 “ሄ ሀርግያፐ ጌዬዳ ብታኒ ባረ ማዩዋ ሜጮ፤ ባረ ቦላን ደእያ እስክያ ኡባ ሜደቶ፤ ባረ ቦላካ ሜጨቶ፤ ያቶፐ እ ጌሻ ግዳናዋ። ሄዋፐ ጉይያን፥ እ ዱንካኔዳ ሳኣ ዮ፤ ሽን ግዶፐነ ባረ ዱንካንያ ገለናን ላፑን ጋላሳ ካረና ጋምኦ። 9 ላፑንꬃ ጋላሳን ባረ ሁጲያ፥ ቡቻ፥ ጎማነ ባረ ቦላን ደእያ ሀራ እስክያ ኡባ ሜደቶ፤ ቃይ ባረ ማዩዋ ሜጮ፤ ባረ ቦላካ ሜጨቶ፤ ሄዋፐ ጉይያን፥ እ ጌሻ ግዳናዋ።

10 “ሆስፑንꬃ ጋላሳን ትላ ቦላና ደእያ ላኡ ዶርሳ ማራቱዋነ እት ላይꬃ ግዴዳ እት ዶርሳቶ አሆ፤ ቃይ ካꬃ ያርሾ ዛይትያን ሙናቀቴዳ ኡሱፑን ኪሎ ግራመ ꬊልያነ እት ሊትሮ ዎጋራ ዛይትያዉ ሄዘንꬆ ኩሽያ አሆ። 11 አ ጌሽያ ቄሲ ብታንያ እ አሄዳዋንቱና እትፐካ መꬍና ጎዳ ዱንካንያ ፐንገ መꬍና ጎዳ ስንꬃ ሺሾ።

12 “ቄሲካ ላኡ ዶርሳ ማራቱዋፐ እቱዋ አኪደ፥ ሊትሮ ሄዘንꬆ ኩሽያ ዛይትያና እትፐ ናቁዋ ያርሹዋ ኦꬂደ ሺሾ፤ ሄ ሺሼዳዋ ቃይ ቃꬅያ ያርሹዋ ኦꬂደ መꬍና ጎዳ ስንꬃን ቃꬆ። 13 ያቲደ እ ሄ ዶርሳ ማራ ናጋራ ያርሹዋነ ጹግያ ያርሹዋ ሹክያ ጌሻ ሳኣን ሹኮ፤ ናጋራ ያርሹዋዳን ናቁዋ ያርሹካ ቄስያዉ እመቴ፤ እካ ሎይꬅ ጌሻ። 14 ቄሲ ናቁዋ ያርሹዋ ሱꬃፐ ጉꬃ አኪደ፥ ሄ ጌይያ ብታንያዉ ኡሸቻ ባጋ ሀይꬃ ጼራ፥ ኡሸቻ ኩሽያዉ ዎጋ ብራꬍያነ ኡሸቻ ገድያዉ ዎጋ ብራꬍያ ኦኮ። 15 ሄዋፐ ጉይያን፥ ቄሲ ዎጋራ ዛይትያፐ ጉꬃ አኪደ፥ ባረ ሀድርሳ ኩሽያ ጎምፓን ትጎ።

16 “ሄ ሀድርሳ ኩሽያ ጎምፓን ደእያ ዎጋራ ዛይትያን ባረ ኡሸቻ ኩሽያ ብራꬍያ ናቂደ፥ መꬍና ጎዳ ስንꬃን ላፑ ገደ ጫጫፎ። 17 ያት ስሚደ ባረ ኩሽያ ጎምፓን አቴዳ ዛይትያፐ አኪደ፥ ጌይያ ብታንያዉ ኡሸቻ ሀይꬃ ጼራ፥ ኡሸቻ ኩሽያዉ ዎጋ ብራꬍያነ ኡሸቻ ገድያዉ ዎጋ ብራꬍያ ካሰ ናቁዋ ያርሹዋ ሱꬃ ኦከቴዳ ሳኣን ኦኮ። 18 ቃይ ባረ ኩሽያ ጎምፓን አቴዳ ዛይትያ ቄሲ ጌይያ ብታንያ ሁጲያን ጉሶ፤ ያቲደ መꬍና ጎዳ ስንꬃን ሄ ብታንያ ናጋራ አቶ ጊሶ።

19 “ሄዋፐ ጉይያን ቄሲ ባረ ቱናተꬃፐ ጌይያ ብታንያ ናጋራ አቶ ጊሳናዉ ናጋራ ያርሾ ሺሼዳ መህያ ሹኬ፤ ሄዋፐ ስሚደ ቃይ ጹግያ ያርሾ ሺሼዳ መህያ ያርሼ። 20 ቃይ ቄሲ ሄ ጹግያ ያርሹዋ ካꬃ ያርሹዋና እትፐ ያርሽያ ሳኣ ቦላን ዎꬂደ ጹጌ፤ ያቲደ ብታንያ ናጋራ አቶ ጊሴ፤ ብታኒካ ጌሻ ግዴ።

21 “ሽን ብታኒ ሄዋ ኡባ አሀናዉ ዳንዳየና ማንቆ ግዶፐ፥ ጾሳ ስንꬃን ቃꬂደ አ ናጋራ አቶ ጊሳናዉ፥ ባረ ናቁዋ ያርሾ እት ዶርሳ ማራ አሆ። ቃይ ካꬃ ያርሾካ ዎጋራ ዛይትያን ሙናቀቴዳ ላኡ ኪሎ ግራመ ሎኦ ꬊልያነ እት ሊትሮ ሄዘንꬆ ኩሽያ ዛይትያ እትፐ አሆ። 22 ቃይካ ባረዉ ዳንዳዬዳዋዳን ላኡ ማራ ሀራጰቱዋ ዎይ ላኡ ማራ ዶጎማቱዋ፥ እቱዋ ናጋራ ያርሾ፥ እቱዋ ቃይ ጹግያ ያርሾ አሆ።

23 “ሆስፑንꬃ ጋላሳን ባረ ናጋራፐ ጌያናዉ ብታኒ ሀዋንታ ቄስያኮ መꬍና ጎዳ ዱንካንያ ፐንገ መꬍና ጎዳ ስንꬃ አሆ። 24 ቄሲ ናቁዋ ያርሾ አሄዳ ዶርሳ ማራነ ልትሮ ሄዘንꬆ ኩሸ ዛይትያ አኪደ፥ ቃꬅያ ያርሹዋ ኦꬂደ መꬍና ጎዳ ስንꬃን ቃꬆ። 25 ያቲደ ናቁዋ ያርሾ አሄዳ ዶርሳ ማራ ሹኪደ ሄ ናቁዋ ያርሹዋ ሱꬃፐ ጉꬃ አኪደ፥ ሀ ጌይያ ብታንያዉ ኡሸቻ ሀይꬃ ጼራ፥ ኡሸቻ ኩሽያዉ ዎጋ ብራꬍያነ ኡሸቻ ገድያዉ ዎጋ ብራꬍያ ኦኮ። 26 ቃይ ቄሲ ዛይትያፐ ጉꬃ ባረ ሀድርሳ ኩሽያ ጎምፓን ትጎ። 27 ሄ ሀድርሳ ኩሽያ ጎምፓን ደእያ ዛይትያፐ ኡሸቻ ኩሽያ ጼራን ጉꬃ አኪደ፥ መꬍና ጎዳ ስንꬃን ላፑ ገደ ጫጫፎ። 28 ቃይካ ቄሲ ባረ ኩሽያ ጎምፓን ደእያ ዛይትያፐ ጉꬃ አኪደ፥ ጌይያ ብታንያዉ ኡሸቻ ሀይꬃ ጼራ፥ ኡሸቻ ኩሽያዉ ዎጋ ብራꬍያነ ኡሸቻ ገድያዉ ዎጋ ብራꬍያ ካሰ ናቁዋ ያርሹዋ ሱꬃ ኦከቴዳ ሳኣን ኦኮ። 29 ቃይ መꬍና ጎዳ ስንꬃን ብታንያ ናጋራ አቶ ጊሳናዉ፥ ቄሲ ባረ ኩሽያን አቴዳ ዛይትያ ጌይያ ብታንያ ሁጲያን ኦኮ። 30 ሄዋፐ ጉይያን፥ ሄ አዉ ባረዉ ዳንዳዬዳዋዳን ሀራጵያ ማራ ግድና ዎይ ማራ ዶጎሙዋ ግድና፥ 31 እቱዋ ናጋራ ያርሾ ላኤንꬁዋ ቃይ ጹግያ ያርሾ ካꬃ ያርሹዋና እትፐ ያርሾ። ቃይ ቄሲካ ሄ ጌይያ ብታንያዉ መꬍና ጎዳ ስንꬃን አ ናጋራ አቶ ጊሶ። 32 ባረ ቦላን ደእያ ዎልቃማ ጋልባ ሀርግያፐ ጌያናዉ ኮሽያ ዎጋ ፖላናዉ ማንቆታይ ድጌዳ ኡራዉ ደእያ ዎጋይ ስም ሀዋ” ያጌዳ።

33 መꬍና ጎዳይ ሙሳነ አሮና ሀዋዳን ያጌዳ፥ 34 “ታን ህንተንቶ አቆ ኦꬃደ እምያ ካናነ ቢታ ህንተ ገልያ ዎደ፥ ቃይ ሄ ጋድያን ደእያ ህንተ ኬꬃፐ እቱዋን ታን ቦሮቁዋ የድያ ዎደ፥ 35 ሄ ጎልያዉ ቄስያኮ ቢደ፥ ‘ታ ሶን አያ ቦሮቀንቶ ደኤ’ ያጊደ ኦዶ። 36 ጎለን ደእያባይ ኡባይ ቱና ጌተተናዳን፥ ቄሲ ቦሮቁዋ በአናዉ ገላናፐ ካሰቲደ፥ ሶን ደእያዋ ኡባ ካረ ከሳናዳን አዛዞ፤ ያት ስምና ቄሲ በአናዉ ጎለ ገሎ። 37 ሄዋን በእያ ዎደ፥ ቦሮቆ ሳአይ ጎዳ ቦላን ማታ ማላትያ፥ ዎይ ዞኦ ማላ በሶፐነ ቃይ ጎዳፐ ኦላቲደ ግዶ ገሎፐ፥ 38 ቄሲ ጎለፐ ካረ ከሲደ፥ ጎልያ ላፑን ጋላሳ ጋካናዉ ጎርዶ። 39 ላፑንꬃ ጋላሳን ቄሲ ሄ ጎልያ ዛረꬂደ፤ ጼልያ ዎደ ሄ ቦሮቁ ጎልያ ጎዳ ቦላን አኮፐ፥ 40 ቦሮቁ ደእያ ሹቻቱዋ ኡባ ጎዳፐ ሾዲደ፥ ካታማፐ ጋጻ ያ ቱኔዳ ሳአዉ ኦላናዳን አዛዞ። 41 ቃይ ጎዳ ዱፌዳ ኡርቃ ሶ ባጋና ቦክሽን፥ ዩሽ አꬂደ ቆቆፋናዳን ኦꬆ፤ ያቲደ ሄ ቆቆፌዳ ኡርቃ ካታማፐ ጋጻን ደእያ ቱና ሳኣን ኦልኖ። 42 ሄዋፐ ጉይያን፥ ሄ ሾዴዳ ሹቻቱ ሳኣን ሀራ ሹቻቱዋ ዎꬅኖ፤ ቃይ ሀራ ኡርቃንካ ጎልያ ዱፍኖ።

43 “ሹቻቱዋ ሾድ ድግና፥ ቃይ ኡርቃካ ቆቆፊደ ሀራ ኡርቃ ዱፊ ስምና፥ ላኤንꬁዋ ስሚደ ቦሮቁ ጎልያ ግዶን አኮፐ፥ 44 ቄሲ ሄዋ በእያ ዎደ፤ ቦሮቁ ሄ ጎልያ ግዶን አኮፐ፥ ሄዌ እቱዋፐ እቱዋ ኦይቂያ ቦሮቆ ግድያ ድራዉ፥ ሄ ጎሊ ቱና። 45 ሄዋ ድራዉ እ ሄ ጎልያ፥ አ ሹቻ፥ አ ምꬃነ እ ዱፈቴዳ ኡርቃ ኡባ ኮሎ፤ ሄዋንታ ካታማፐ ጋጻ አፊደ፥ ቱና ሳኣን ኦሎ። 46 ቃይ ሄ ጎሊ ጎርዳን ታክያ ዎድያን አ ግዶ ገልያ ኦንነ ሳአይ ቃማና ጋካናዉ ቱና። 47 ሄ ጎልያን ግስያ ኡራይ ዎይ ቁማ ምያ ኡራይ ባረ ማዩዋ ሜጮ።

48 “ሽን ቄሲ ዪደ ጼልያ ዎደ፥ ጎሊ ዱፈት ስምና ላኤንꬁዋ ስሚደ አካና ꬋዮፐ፥ ቦሮቁ ꬋዬዳ ድራዉ፥ ሄ ጎሊ ጌሻ ግድያዋ ቄሲ ኤርሶ። 49 ጎልያ ጌሻናዉ ላኡ ካፎቱዋ፥ ጽድያ ምꬃ፥ ዞኦ ቃጭናነ ህሶጵያ ቦንጭያ አሆ። 50 ካፎቱዋፐ እቱዋ ከርያን ደእያ ፑልቱዋ ሃꬃ ቦላን ሹኮ። 51 ሄዋፐ ጉይያን ጽድያ፥ ህሶጵያ ቦንጭያ፥ ዞኦ ቃጭናነ ፓጻ ደእያ ካፉዋ እትፐ አኪደ፥ ከርያን ደእያ ሹኬዳ ካፉዋ ሱꬃንነ ፑልቱዋ ሃꬃን የግ ከሲደ፥ ላፑ ገደ ሄ ጎልያ ጫጫፎ። 52 ያቲደ ሄ ጎልያ ቄሲ ካፉዋ ሱꬃን፥ ፑልቱዋ ሃꬃን፥ ፓጻ ደእያ ካፉዋን፥ ጽድያን፥ ህሶጵያ ቦንጭያንነ ዞኦ ቃጭናን ጌሾ። 53 ቃይ ፓጻ ደእያ ካፉዋ ካታማፐ ጋጻ ህን ደምባ የዶ። ሄዋዳን ኦꬂደ፥ ጎልያ ጌሽያ ዎጋ ፖሌ፤ ጎሊካ ጌሻ ግዴ።

54 “አይ ዎልቃማ ጋልባ ሀርገ ግዶፐካ ሀዌ ዎጋ፤ ቃጨችያዋ ግድና፥ 55 ማዩዋ ቦላን ዎይ ጎልያ ቦላን ከስያ ቦሮቆ ግድና፥ 56 ጋፉዋ ግድና፥ ꬉሳ ማዱꬃ ግድና ዎይ እላሁዋ ግድናካ፥ 57 እትባይ ቱና ግድያዋነ ጌሻ ግድያዋ ኤርሳናዉ ዎልቃማ ጋልባ ሀርግያነ ቦሮቁዋ ዎጋይ ሀዋ” ያጌዳ።

<- ዎጋ 13ዎጋ 15 ->