7 “ታን፥ ‘ናቀታድ’ ያጋደ ዋስና፥ ታዉ አልያዌ ባዋ፤ ቃላ ꬎቁ ኦꬃደ፥ ሱረ ፕርዳዉ ዋስናካ፥ ስስያዌ ባዋ። 8 ታን አናዳን ጾሳይ ታ ኦግያ ድሬዳ፤ ታ ሀመትያሳካ ꬉማን ጎዜዳ። 9 ታ ዱረተꬃ ታፐ ቃሬዳ፤ ታ ቦንቹዋካ ታፐ ድጌዳ። 10 እ ታና ኡባ ባጋና መንሬꬅ የጌዳ፤ ታ ህዶታካ ጻጱዋና ꬎቆለቴዳ ምꬃ ማላ ኦꬄዳ። 11 አ ሀንቁ ታ ቦላ ኤጽ ከሴዳ፤ እ ታና ባረ ሞርክያዳን ፓይዴ። 12 ታ ቦላ ዶዳናዉ እ ባረ ኦላንቻቱዋ ኪቴ፤ ኡንቱንቱ ታና ኦላናዉ ኦግያ ጊግሲኖ፤ ታ ዱንካንያ ዩሹዋካ ዶዲኖ።
13 “ጾሳይ ታ እሻቱዋ ታፐ ሃሴዳ፤ ታና ኤርያዋንቱ ኡባና ታዉ አላጋ ግዴድኖ። 14 ታ ዳቦቱ ታፐ ሻከቴድኖ፤ ታ ላገቱካ ታና ዶጌድኖ። 15 ታ ሶን እማꬃተꬃን ሞኮዋንቱ ታና ዶጌድኖ፤ ታ ማጫ ቆማቱካ ታና እማꬃዳንነ በትያዳን ጼሊኖ። 16 ታን ታ ቆማ ጼግና፥ ታዉ ኮየና፤ ታን ዎስናካ፥ ታዉ ኤኖ ጌና። 17 ታ ማቻታ ታ ዶና ፔኑዋ እጻዱ፤ ታ እሻቱካ ታና ሸነቲኖ። 18 ሀራይ አትና፥ ጉꬃ ናናቱካ ታና ካꬊኖ፤ ታና ጼልያ ዎደ፥ ታ ቦላ ቅሊጪኖ። 19 ታ ማታ ላገꬃቱ ኡባይ ታና ሸነቲኖ፤ ታን ሲቅያዋንቱካ ታዉ ዞክያ ዛሬድኖ። 20 ታ መቀꬃይ ታ ጋልባና ኦይቀቴዳ፤ ሀይቁዋፐ ላፋሳን ታን አታድ።
21 “ህንተኖ ታ ላገቶ፥ ጾሳ ኩሺ ታና ደቼዳ ድራዉ፥ ታዉ ቃረትተ። 22 ጾሳይ ታና የደርስያዋዳን፥ ህንተ ታና አያዉ የደርሲተ? ሀኖ ጋካናዉ ህንተ ታና ቱጋዬዳዌ ግደኔ?
23 “ሀኖ ጋካናዉ ታን ሃሳዬዳ ቃላይ፥ ዎይ ሀሳየቴዳ ግዴረኔሻ! ማጻፋንካ ዎይ ጻፈቴዳ ግዴረኔሻ! 24 ዳሮ ጋምአና ማላ፥ ብራታ ማርሳን ዛላ ቦላን ዎጨቲደ ጻፈቴረኔሻ!
25 “ታና ዎዜዳዌ ፓጻ ደእያዋነ ዉርሰꬃን ቢታ ቦላን እ ኤቃናዋ ታን ኤራይ። 26 ታ ጋልባይ ሜተት ዉሮፐነ፥ ታን ታ አሹዋፐ ሻከታደ፥ ጾሳ በአናዋ ኤራይ። 27 ሀራ ኡራ ግደናን፥ ታን ታ ሁጲያን፥ ታ አይፍያን አ በአና። ሄዋ ድራዉ፥ ታ ዎዛናይ አያ ላሞቲ!
28 “ህንተ፥ ‘መቶ ኡንኩ አ ግዴዳ ድራዉ፥ አነ ሃይተ! አ የደርሴቶ!’ ጎፐ፥ 29 ማሻዉ ያይተ! ጾሳ ሀንቁ ማሻና ያና፤ ፕርዳይ ደእያዋካ ኤርተ” ያጌዳ።
<- ኢዮባ 18ኢዮባ 20 ->