ዮሃንሳ ምሽራቹዋ 18

የሱስ ባረ ሞርከቱዋ ኩሽያን ኦይቀቴዳ

(ማቶሳ 26:47-56፤ ማር. 14:43-50፤ ሉቃሳ 22:47-53)

1 የሱስ ሄዋ ጊደ፥ ጾሳ ዎሴዳዋፐ ጉይያን፥ ባረና ካልያዋንቱና ቀድሮና ግያ ዛንጋራ ፕኔዳ። ሄ ሳኣን አትክልትያ ሳአይ ደኤ፤ የሱስነ የሱሳ ካልያዋንቱ ገሌድኖ። 2 የሱሳ አꬅ እሜዳ ይሁዳይ ሄ ሳኣ ኤሬዳ፤ አያዉ ጎፐ፥ የሱስ ኡባ ዎደ ባረና ካልያዋንቱና ሄዋን ሺቄ። 3 ሄዋ ድራዉ፥ ካለꬅያ ቄሳቱዋ ካፓቱነ ፓርሳዋቱ ይሁዳና ባናዳን እሜዳ ሮማ ዎታዳራቱነ ጌሻ ጎልያ ናግያዋንቱ ኩራዝያ፥ ያቢያነ ቶራ ኦይቂደ ሄ ሳኣ ቤድኖ።

4 የሱስ ባረና ጋካናዉ ሀንያ ኡባባ ኤሪደ፥ ጋጻ ከሲደ፥ “ኦና ኮዪቴ?” ያጌዳ።

5 ኡንቱንቱ ዛሪደ፥ “ናዝሬትያ የሱሳ ኮዬቶ” ያጌድኖ።

የሱስ ዛሪደ፥ “ታን አ” ያጌዳ።

የሱሳ አꬅ እሜዳ ይሁዳይካ ሄዋን ኡንቱንቱና ኤቄዳ፤ 6 የሱስ፥ “ታን አ” ጌዳ ዎደ፥ ኡንቱንቱ ጉየኮ ሺቂደ፥ ሳኣን ኩንዴድኖ። 7 የሱስ ቃይካ፥ “ኦና ኮዪቴ?”

ያግ ኦችና ኡንቱንቱ፥ “ናዝሬትያ የሱሳ” ያጌድኖ።

8 የሱስ ዛሪደ፥ “ታን አ ግድያዋ ህንተንቶ ኦዳድ፤ ስም ህንተንቱ ታና ኮይያዋ ግዶፐ፥ ሀዋንታ የድተ” ያጌዳ። 9 እ፥ “ታ አቦ፥ ኔን ታዉ እሜዳዋንቱፐ ሀራይ አቶ፥ እቱዋካ ባይዛበይከ” ጌዳዌ ፖለታና ማላ፥ ሄዋ ጌዳ።

10 ስሞን ጰጽሮሳዉ ማሻይ ደኤ፤ እ ሄ ማሻ ሾድነ ቄሳቱዋ ኡባቱዋ ካፑዋ ቆማ ኡሸቻ ሀይꬃ ሾጪደ፥ ቃንጽ የጌዳ። ሄ ቆማ ሱንꬃይ ማልኮሳ። 11 የሱስ ጰጽሮሳ፥ “ነ ማሻ ሾኩዋን ዛራደ ዎꬃ! ታ አቡ ታዉ እሜዳ መቱዋ ጹኣ ታን ኡሽክታ?” ያጌዳ።

የሱስ ቄሳቱዋ ካፑዋ ሃና ስንꬃ ሺቄዳ

12 ሻላቃይ፥ ዳሮ ዎታዳራቱነ ቃይ ጌሻ ጎልያ ናግያዋንቱ የሱሳ ኦይቂደ ቃቼድኖ። 13 ኮይሮ የሱሳ ሃናኮ አፌድኖ፤ ሃን ሄ ላይꬅ ቄሳቱዋ ካፓቱዋ ግዴዳ ቃያፋ ቦሉዋ። 14 “አሳ ኡባ ድራዉ፥ እት አሳይ ሀይቂንቶ ሎአ” ጊደ አይሁዳቱዋ ዞሬዳዌ ቃያፋ።

ጰጽሮሰ የሱሳ ካዴዳ

(ማቶሳ 26:69-70፤ ማር. 14:66-68፤ ሉቃሳ 22:55-57)

15 ስሞን ጰጽሮስነ ሀራ እት ካልያዌ የሱሳ ካሊደ ቤድኖ። ሄ ሀራ ካልያዋ ቄሳቱዋ ካፑ ኤሬዳ፤ ሄዌ የሱሳና ቄሳቱዋ ካፑዋ ድርሳ ጋርሳ ገሌዳ። 16 ሽን ጰጽሮሰ ካረና ድርሳ ፐንግያን ኤቄዳ። ቄሳቱዋ ኡባቱዋ ካፑ ኤርያ ሀራ ካልያዌ ካረ ከሲደ፥ ፐንግያ ናግያ ናትዉ ኦዲደ፥ ጰጽሮሳ ድርሳ ጋርሳ ገልሴዳ። 17 ፐንግያ ናግያ ናታ ጰጽሮሳ፥ “ኔን ሀ ብታንያ ካልያዋንቱፐ እቱዋ ግድኪዬ?” ያጋዱ።

እ፥ “ቱይት፥ ታን ግድከ” ያጌዳ።

18 ሳአይ ሜግያ ድራዉ፥ አይላቱነ ጌሻ ጎልያ ናግያዋንቱ ታማ ኤጺደ፥ ቦንቄዳዋ ዩይ አꬍ ኤቂደ ካሺኖ፤ ጰጽሮስካ ኡንቱንቱና ኤቂደ፥ ሄ ታማ ካሼ።

ቄሳቱዋ ካፑ የሱሳ ኦቾ ኦሻ

(ማቶሳ 26:59-66፤ ማር. 14:55-64፤ ሉቃሳ 22:66-71)

19 ቄሳቱዋ ኡባቱዋ ካፑ፥ የሱሳ ካልያዋንቱባነ አ ትምርትያባ ኦቼዳ። 20 የሱስ አዉ ዛሪደ፥ “ታን አሳ ኡባዉ ቆንጭያን ኦዳድ። ታን አይሁዳ ኡባይ ሺቅያ አይሁዳ ዎሳ ጎለንነ ጌሻ ጎልያን ኡባ ዎደ ታማርሳድ፤ ጌማን አይነ ሃሳያበይከ። 21 ያትና፥ ኔን ታና አያዉ ኦቻይ? ታን ኦዴዳዋ ስሴዳ አሳ ኦቻ፤ ሄ አሳይ ታን ኦዴዳዋ ኤሬዳ” ያጌዳ።

22 የሱስ ሄዋ ጌዳ ዎደ፥ ሄዋን ኤቄዳ ዎታዳራቱዋፐ እቱ የሱሳ ባቂደ፥ “ቄሳቱዋ ኡባቱዋ ካፑዋ ቦላ ሀዋዳን ዛራይ?” ያጌዳ።

23 የሱስ ዛሪደ፥ “ታን ባላባ ሃሳዬዳዋ ግዶፐ፥ ሀዋን ደእያ አሳ ኡባዉ ኦዳ፤ ሽን ታን ቱሙዋ ሃሳዬዳዋ ግዶፐ፥ ታና አያዉ ባቃይ?” ያጌዳ።

24 ሄዋ ድራዉ፥ ሃን፥ ቃሸት ኡቴዳ የሱሳ፥ ቄሳቱዋ ኡባቱዋ ካፑዋ፥ ቃያፋኮ የዴዳ።

ጰጽሮስ የሱሳ ላኤንꬁዋ ካዴዳ

(ማቶሳ 26:71-75፤ ማር. 14:69-72፤ ሉቃሳ 22:58-62)

25 ጰጽሮስ ሄዋን ኤቂደ፥ ታማ ካሼ፤ ሀራንቱ አ፥ “ኔን ሀ ብታንያ ካልያዋንቱፐ እቱዋ ግድኪዬ?” ያጌዳ።

ጰጽሮሰ፥ “ቱይት፤ ታን ግድከ” ያጊደ ካዴዳ።

26 ቄሳቱዋ ኡባቱዋ ካፑዋ ቆማቱዋፐ እቱዋ፥ ጰጽሮሰ ሀይꬃ ቃንጼዳ ብታንያ ዳቡ ጰጽሮሳ፥ “ታን ኔና አናና ዳሮ አታክልትያ ግዶን በአበይክታዬ?” ያጊደ ኦቼዳ።

27 ጰጽሮሰ ቃይካ ካዴዳ፤ ኤለካ ኩቱ ዋስ አጌዳ።

የሱስ ጵላጾሳ ስንꬃ ሺቄዳ

(ማቶሳ 27:1-2፣ 11-14፤ ማር. 15:1-5፤ ሉቃሳ 23:1-5)

28 ኡንቱንቱ የሱሳ ቃያፋ ጎለፐ ሮመ አሳ አይስያዋ ኦሶ ጎልያ አፌድኖ። ሳአይ ዎንታ ጉራ፤ አይሁዳቱ ፓስጋ ቦንችያ ጋላሳ ቁማ ማናዉ፥ ባረንቱ ሁጲያዉ ቱነና ማላ፥ ሮመ አሳ አይስያዋ ኦሶ ጎልያ ገልበይክኖ። 29 ሄዋ ድራዉ፥ ጵላጾስ ኡንቱንቱኮ ካረ ከሲደ፥ “ሀ ብታንያ ህንተንቱ አያን ሞቲቴ?” ያጌዳ።

30 ኡንቱንቱ፥ “እ ኢታባ ኦꬅቤናዋ ግድንቶ፥ ኑን አ ኔኮ አሆኮ” ያጌድኖ።

31 ጵላጾስ ዛሪደ ኡንቱንቶ፥ “ህንተንቱ አ አፊደ፥ ህንተንቱ ህጊ ግያዋዳን፥ አ ቦላ ፕርድተ” ያጌዳ።

አይሁዳቱ፥ “ኦናነ ዎꬍያ ማታይ ኑዉ ባዋ” ያጌድኖ። 32 ሀዌ ሀኔዳዌ የሱስ አይ ማላ ሀይቁዋ ሀይቃነንቶ ኤርሳናዉ ሃሳዬዳዌ ፖለታናሳ።

33 ጵላጾስ ባረ ኦሱዋ ጎለ ላኤንꬁዋ ገሊደ፥ የሱሳ ጼሲደ፥ “ኔን አይሁዳ ካቴ?” ያጊደ አ ኦቼዳ።

34 የሱስ ጵላጾሳ፥ “ሀ ኦሻ ኔን ኔፐ ኦቻይዬ ዎይ ሀራ አሳይ ነዉ ታባ ኦዴዴ?” ያጌዳ።

35 ጵላጾስ ዛሪደ፥ “ታና አይሁዳ አሳ ጋይ? ነ ዛራቱነ ቄሳቱዋ ካፓቱ ኔና ታዉ አꬅ እሜድኖ፤ ኔን አያ ኦꬃዲ?” ያጌዳ።

36 የሱስ፥ “ታ ካዉተꬃይ ሀ አላምያና ግደና። ታ ካዉተꬃይ ሀ አላምያና ግዴደንቶ፥ ታና አይሁዳቶ አꬅ እመናዳን፥ ታዉ ኦꬅያዋንቱ ታዉ ኦለታና፤ ሽን ታ ካዉተꬃይ ሀ አላምያና ግደና” ያጌዳ።

37 ሄዋ ድራዉ፥ ጵላጾስ የሱሳ፥ “ያትና፥ ኔን ካቴየ?” ያጊደ ኦቼዳ።

የሱስ ዛሪደ፥ “ኔን ታና ካትያ ጋዳ። ታን ቱሙዋ ማርካታና ድራዉ የለታድ፤ ቃይ ሄዋ ድራዉ፥ ሀ አላምያ ያድ። ቱሙዋ ባጋ ግዴዳ ኦንነ ታን ግያዋ ስሴዳ” ያጌዳ።

38 ጵላጾስ፥ “ቱሙ አዬ?” ያጌዳ።

ጵላጾስ ሄዋ ጌዳዋፐ ጉይያን፥ አይሁዳቱዋኮ ካረ ከሲደ፥ “ታን አን አይ ባላነ ደማበይከ። 39 ሽን ፓስጋ ቦንችያ ጋላስ፥ እት አሳ ታን ህንተንቶ ቃሹዋፐ ብልያ ዶያይ ደኤ፤ ታን ህንተንቶ አይሁዳቱ ካትያ ብልያዋ ኮዪቴ?” ያጌዳ።

40 ኡንቱንቱ ዛሪደ፥ ባረንቱ ኮሻ ꬎቁ ኦꬂደ፥ “ባርባና ብላፐ አትን፥ አ ግደና!” ያጌድኖ። ሽን ባርባን ፓኑዋ።

<- ዮሃንሳ ምሽራቹዋ 17 ዮሃንሳ ምሽራቹዋ 19 ->