1 መꬍና ጎዳይ ሀዋዳን ያጌ፤ “እት አሳይ ባረ ማቻቶ የድና፥ እዛ ባደ ሀራ አስና ገሎፐ፥ ሄ ብታኒ ላኤንꬆ እዞ ዛሪ? ዛሮፐ ሄ ቢታይ አꬌዳ ቱና ቱኔ! ሽን ኔን ሻርሙጻዳን፥ ጮራ ላገꬃቱዋና ደኣዳ፤ ያናደካ ሀእ ኔን ታኮ ስማኒ! 2 አነ ꬎቁ ጋደ፥ አያይነ ባይና ደረቱዋ ጼላ። ኔን ሻርሙጻዳን ግሳቤናሳይ ሄዋን ደኢ? አራብያ አሳይ ባዙዋን ኡቲደ ናግያዋዳን፥ ኔን ላገꬃቱዋ ናጋደ ኦግያ ጋጻን ኡታዳ። ያታደ ነ ሻርሙጻንነ ነ ኢታተꬃን ቢታ ቱንሳዳ። 3 ሄዋ ድራዉ፥ ባꬌሳይ ተኤቴዳ፤ ባልጉዋ እራይካ ቡከናን አጌዳ። ሄዋ ሀኖፐካ፥ ነዉ ሻርሙጽያ ማላይ ደኤ፤ ኔን ዬላተናን እጻዳ።

4 “ሀእ ኔን ታና፥ ‘ታ አዎ፥ ታ ናአተꬃደፐ ዶምና፥ ኔን ታና ሲቃሳ። 5 ኔን ኡባ ገደ ታ ቦላ ይሎታይ? ነ ሀንቁ መꬍናዉካ አገኔ?’ ያጋሳ። ኤ፥ ኔን ሀዋ ያጋሳ፤ ሽን ኔን ኦꬃናዉ ዳንዳይያ ኢታ ኡባ ኦꬃሳ” ያጌ።

6 ካቲ እዮስያስ ካተቴዳ ላይꬅ፥ መꬍና ጎዳይ ታና ሀዋዳን ያጌዳ፤ “ሀና አማኑ ባይና እስራኤላታ ኦꬄዳዋ ኔን በኣድ? አ ደርያ ኡባ ቦላነ ዳሻ ምꬃቱ ኡባ ጋርሳ ባደ፥ ያን ሻርሙጻዱ። [a] 7 እዛ ሀዋ ኡባ ኦꬃደካ፥ ታኮ ስማናኑ ጋደ ቆፓድ፥ ሽን ስማበይኩ። ቃይ እ ምቻታ፥ አማነተና ይሁዳካ ሄዋ በኣዱ። 8 አማኑ ባይና እስራኤሊ ዳሮ ገደ ሻርሙጼዳ ድራዉ፥ ፓራማ እማደ እዞ የዳድ። ሄዋ ግድናካ እስራኤሊ ምቻታ፥ አማነተና ይሁዳ ያየናዋ ታን በኣድ፤ አካ ከሳደ ሻርሙጻዱ። 9 ሻርሙጽያዌ እዉ ጺ ላፋባ ግድያ ድራዉ፥ ምꬃናነ ሹቻና ሻርሙጻደ ቢታ ቱንሳዱ። 10 ሄዋን ኡባንካ እ ምቻታ፥ አማነተና ይሁዳ፥ ጮ ስሜዳዋ ማላታዉፐ አትና፥ ኩመንꬃ ዎዛናፐ ታኮ ስማበይኩ። ታን መꬍና ጎዳይ ሀዋ ኦዳድ” ያጌዳ።

11 መꬍና ጎዳይ ታዉ ሀዋዳን ያጌዳ፤ “አማነተና ይሁዳትፐ አማኑ ባይና እስራኤላታ ጽላ። 12 ባ፤ ሁጲሳ ባጋዉ ሀዋዳን ያጋደ አዋያ፤ መꬍና ጎዳይ ሀዋዳን ያጌ፤ ‘ሀነ፥ አማኑ ባይና እስራኤላቴ፥ ስማ! ታን ማሮታይ ኩሜዳዋ ግድያ ድራዉ፥ ታን ኔና ኢታ አይፍያን ጼልከ። መꬍናዉ ሀንቀትከ። 13 ግዶፐነ፥ ኔን፥ ታን መꬍና ጎዳ ታ ጾሳ ቦላ ማካላድ። አላጋ ጾሳቱዋና ዳሻ ምꬃ ኡባ ጋርሳን ሻርሙጻድ። ነ ቃላዉ አዛዘታበይከ’ ጋደ ነ ባይዙዋ አማናናዉ ኮሼ። ታን መꬍና ጎዳይ ሀዋ ኦዳድ” ያጌ ያጋ ያጌዳ።

14 “ቃይካ መꬍና ጎዳይ ሀዋዳን ያጌ፤ ‘ህንተኖ፥ አማነተና አሳቶ፥ ስምተ፤ አያዉ ጎፐ፥ ታን ህንተ አስና። ህንተና እቱዋ እት ካታማፐ፥ ላኡዋ እት ያራፐ ዶራደ አካና፤ ህንተና ጽዮነ አሀና። 15 ሄዋፐ ጉይያን፥ ታን ታ ዎዛናዳን፥ ህንተና ሄምያ ሄንꬃንቻቱዋ ህንተዉ እማና። ኡንቱንቱ ህንተና ኤራተꬃንነ አኬካን ሄማና’ ” ያጌ።

16 ቃይካ መꬍና ጎዳይ፥ “ሄ ጋላሳቱዋን ህንተ ሄ ቢታን ጮራትያ ዎደ፥ አሳቱ፥ ‘መꬍና ጎዳ ጫቁዋ ታቦታ’ ጊደ ሃሳይክኖ። እ ኡንቱንቶ ካርህነ ጌና፥ ዎይ ሀሳየተና፥ ዎይ ባይናዌካ ኡንቱንቶ ቆፈተና፤ ቃይ ሀራይ ኦሰተና። 17 ሄ ዎድያን ኡንቱንቱ የሩሳላመ መꬍና ጎዳ ካተቱዋ አራታ ጊደ ጼሳና። ካዉተꬃ ኡባፐ አሳይ መꬍና ጎዳ ሱንꬃ ቦንቻናዉ የሩሳላመ ሺቃና። ሄዋፐ ስንꬃን ኡንቱንቱ እጼዳ ጊደ፥ ባረንቱ ኢታ ቆፋ ካልክኖ። 18 ሄ ጋላሳቱዋን ይሁዳ አሳቱ እስራኤልያ አሳቱዋና እትፐ ጋከቲደ፥ ሁጲሳ ባጋ ቢታፐ ታን ካሰ ህንተ አዎቱዋ ላትሴዳ ቢታ እትፐ ያና” ያጌ።

19 መꬍና ጎዳይ፤ “ታን ህንተና አቱማ ናናቱዋዳን ዎታ ዎꬃነንቶነ፥ ፓጻ ቢታ፥ ካዉተꬃ ኡባፐ አꬊደ፥ ሎእያ ቢታ ዎታ ላትሳነንቶነ ቆፓድ። ቃይ ታና፥ ‘ታ አቦ’ ጊደ ጼሳናነ ታና ካልያሳፐ ጉየ ስምክኖ ጋደ ቆፓድ። 20 ሽን እስራኤልያ አሳቶ፥ ህንተ ባረ አስናዉ አማነተና ማቻቲዳን ታዉ አማነትበይክታ” ያጌ።

21 አየንቶ ባይና ꬎቃ ደረቱዋ ቦላን ኮሻይ ስሰቴ፤ ሄዌነ፥ እስራኤልያ አሳ ዬኩዋነ ዋትዋቱዋ። አያዉ ጎፐ፥ ኡንቱንቱ ባረንቱ ኦግያ ጌላዬድኖነ መꬍና ጎዳ ባረንቱ ጾሳ ዶጌድኖ። 22 ጾሳይ ኡንቱንታ፥ “ህንተኖ፥ አማኑ ባይና አሳቶ፥ ታኮ ስምተ። ህንተ አማነታና ማላ፥ ታን ህንተና ፓꬃና” ያጌዳ።

ኡንቱንቱ፥ “ኤኖ፥ ኑን ኔኮ ስማና። አያዉ ጎፐ፥ ኔን መꬍና ጎዳ ኑ ጾሳ። 23 ኑን ዞዘቱዋ ሁጲያንነ ደረቱዋ ሁጲያን ኤቃዉ ጎይንያዌ ቱሙዋፐ ጭሙዋ። ቱሙፐ ኑዉ፥ እስራኤላቶ አቶተꬃይ መꬍና ጎዳና፥ ኑ ጾሳና። 24 ኑ ያላጋተꬃደፐ ዶምና፥ ኑ አዎቱ ዳቡሪደ ደሜዳዋ፥ ኡንቱንቱ ዶርሳነ ሚዛ፥ ኡንቱንቱ ማጫነ አቱማ ናናቱዋ፥ ዬላይያ ኤቃቱ ም ꬋይሴድኖ። 25 ኑ ያላጋተꬃደፐ ዶሚደ፥ ሀች ጋካናዉ፥ ኑንካ ኑ አዎቱካ መꬍና ጎዳ ኑ ጾሳ ቦላ ናጋራ ኦꬄዶ። መꬍና ጎዳ ኑ ጾሳ ቃላዉ አዛዘትበይኮ። ሄዋ ድራዉ፥ አነ ኑን ዬላዉ ዱገ ጉፋኔቶ፤ ቃይ ካዉሻይ ኑና አፍላዳን ካሞ” ያጊኖ።

<- ኤርማሳ 2ኤርማሳ 4 ->