1 መꬍና ጎዳፐ ኤርማሳዉ ዬዳ ቃላይ ሀዋ፤ 2 “ደንዳ፤ ኡርቃ መꬍያ ብታንያ ጎለ ባ። ያን ታን ኔና ታ ቃላ ስሳና” ያጌዳ። 3 ታን ዱገ ኡርቃ መꬍያ ብታንያ ጎለ ባደ፥ እ ባረ መꬍያ ይንግርያዋን ኡርቃ መꬍያዋ በኣድ። 4 እ መꬍሽና፥ ሚሻይ አ ኩሽያን ባዬዳ። እ ሄ ኡርቃ ዛሪደ ሙናቂደ፥ ባረና ሎእያ ሀራ ሚሻ ከሲደ መꬌዳ።

5 ሄ ዎድያን መꬍና ጎዳ ቃላይ፥ ሀዋዳን ያጊደ፥ ታኮ ዬዳ፤ 6 “እስራኤልያ አሳቶ፥ ሀ ኡርቃ መꬍያ ብታኒ ኦꬅያዋዳን፥ ታን ህንተና ኦꬃናዉ ዳንዳይክታ? ያጌ መꬍና ጎዳይ። እስራኤልያ አሳቶ፥ በእተ፤ ኡርቃይ ባረና መꬍያዋ ኩሽያን ደእያዋዳን፥ ህንተካ ታ ኩሽያን ደኢታ። 7 አይ ዎደ ግዶፐነ፥ ታን እት ቢታባ ዎይ እት ካዉተꬃባ፥ ‘ታን ህንተና ꬎቆላና፥ ዮዳናነ ꬋይሳና’ ጋደ ኦድና፥ 8 ሄ ታን ኦዴዳ ካዉተꬃይ ባረ ኢታተꬃፐ አጊደ ስሞፐ፥ ታን ኡንቱንቱ ቦላ አሀና ጌዳ ኢታባ አሄናን አጋ ባሻና። 9 ቃይ አይ ዎደ ግዶፐነ፥ ታን እት ቢታባ ዎይ እት ካዉተꬃባ፥ ታን ህንተና ኬጻናነ ቶካና ጋደ ኦድና፥ 10 ሄ ካዉተꬃይ ታን ኦድያዋ ስሰናን እጾፐ ታ ስንꬃን ኢታባ ኦꬆፐ፥ ታን ኦꬃና ጌዳ ሎኦባ ኦናን አጋሻና።

11 “ሄዋ ድራዉ፥ ሀእ ይሁዳ አሳቶነ የሩሳላመን ደእያዋንቱ ሀዋዳን ያጋ፤ መꬍና ጎዳይ ያጌ፤ በእተ፥ ታን ህንተ ቦላ ኢታባ መꬋይነ ሀልቻድ። ህንተ ኡባይካ ህንተ ኢታ ኦግያፐ ስምተ፤ ህንተ ኦግያነ ህንተ ኦሱዋ ላምተ ያጌ ያጋ። 12 ሽን ኡንቱንቱ፥ ‘ሄዌ አይነ ማደና! ኑን ኑ ሀልቼዳዋዳን ሀናና፤ ኑን ሁጲያን ሁጲያን ኑ ኢታ ዎዛና ሙመተꬃዳን ኦꬃና’ ያጋና” ያጌዳ።

18 አሳቱ ሀዋዳን ያጌድኖ፤ “ሃ ዪተ፤ አነ ኤርማሳ ቦላ ማቀቴቶ። አያዉ ጎፐ፥ ቄሳቱ ታማርስያ ህጊ፥ አꬌዳ ኤራንቻቱ እምያ ዞሪ፥ ትምቢትያ ኦድያዋንቱ ኦድያ ቃላይ ꬋየና። ሃ ዪተ፤ አነ አ ኑ እንጻርሳን ጲሮይተ። እ ኦድያ ቃላ ስሰናን አጌቶ” ያጌድኖ።

19 አቤት መꬍና ጎዳዉ፥ ታ ኦድያዋ ስሳ፤ ታ ሞርከቱ ታ ቦላ ሃሳይያዋ ሀይዛ። 20 ሎኦ ኦꬄዳ አሳዉ ኢታ ዛሪእ? ሽን ኡንቱንቱ ታዉ ኦላ ቦኪኖ። ታን ነ ሀንቁ ኡንቱንቱፐ ስማና ማላ፥ ኡንቱንቱ ድራዉ ሎኦባ ሃሳያናዉ ነ ስንꬃን ኤቄዳዋ ቆፓ። 21 ሄዋ ድራዉ፥ ኡንቱንቱ ናናቱዋ ኮሻዉ አꬃደ እማ፤ ኡንቱንታካ ማሻዉ አꬃደ እማ። ኡንቱንቱ ማጫ አሳቱካ ናአይ ባይናዋንታነ አምኤ ግድኖ። ኡንቱንቱ አቱማ አሳቱካ ዎꬍያ ሀርግያን ጋከትኖ፤ ኡንቱንቱ ዎዳላቱካ ኦላን ሲፈትኖ። 22 ኡንቱንቱ ቆፐናን ኔን ኡንቱንቱ ቦላ ቦንቂያዋንታ የድና፥ ኡንቱንቱ ጎልያን ዋሱ ከሶ። አያዉ ጎፐ፥ ኡንቱንቱ ታና ኩንድሳናዉ ኦላ ቦኬድኖ፤ ታ ገድያዉካ ጲርያ ዎꬄድኖ። 23 ሽን አቤት መꬍና ጎዳዉ፥ ኡንቱንቱ ታና ዎꬋናዉ ማቀቴዳዋ ኡባ ኔን ኤራሳ። ኔን ኡንቱንቱ ኢታተꬃ አቶ ጎፓ፥ ዎይ ኡንቱንቱ ናጋራ ነ ስንꬃፐ ቁጮፓ። ኡንቱንቱ ነ ስንꬃን ጾነቲደ ኩንድኖ። ነ ሀንቁዋ ዎደ ኔን ኡንቱንታ ሀዋዳን ኦꬃ።

<- ኤርማሳ 17ኤርማሳ 19 ->