1 መꬍና ጎዳፐ ኤርማሳዉ ዬዳ ቃላይ ሀዋ፤ 2 “ሀ ጫቁዋ ቃላቱዋ ስሳ፤ ይሁዳ አሳዉነ የሩሳላመ ካታማን ደእያዋንቶ ኦዳ። 3 መꬍና ጎዳይ እስራኤልያ ጾሳይ ሀዋዳን ያጌ ጋደ ኦዳ። ሀ ጫቁዋ ቃላዉ አዛዘተናዌ ሸቀቴዳዋ ግዶ። 4 ታን ካሰ ህንተ አዎቱዋ ግብጼ ቢታፐ፥ ብራታ ሴርስያ ጮጭያፐ ከስያ ዎደ፥ ታዉ ኤኖ ጊተ፤ ታ ህንተና አዛዝያዋ ኡባ ኦꬅተ። ያቶፐ፥ ህንተ ታ አሳ ግዳና፤ ታንካ ህንተ ጾሳ ግዳና ያጋድ። 5 ሄዋዳንካ፥ ማꬃነ ኤሳ ጎግያ ቢታ ካሰ ህንተ አዋቶ እማናዉ፥ ታን ጫቄዳ ጫቁዋ ፖላና ያጋድ። ሄዌነ፥ ሀች ህንተ ላቴዳ ቢታ ያጋ” ያጌ።

ታን፥ “ኤኖ፥ መꬍና ጎዳዉ፥ አመንእ” ያጋድ።

6 መꬍና ጎዳይ ታዉ ሀዋዳን ያጌዳ፤ “ሀዋ ታ ቃላ ኡባ ይሁዳ ካታማቱዋንነ የሩሳላመ ኦገቱዋን ሀዋዳን ያጋደ አዋያ፤ ‘ሀ ጫቁዋ ቃላ ስስተ፤ አ ካልተ። 7 ካሰ ህንተ አዎቱዋ ታን ግብጼ ቢታፐ ከሶደፐ ሀች ጋካናዉ፥ ዛራ ዛራደ፥ “ታዉ አዛዘትተ!” ጋደ ሴራድ። 8 ሽን ኡንቱንቱ ታ ቃላ ስስበይክኖ ዎይ ሀይዝበይክኖ። ሄዋ አጊደ፥ ኡንቱንቱ ባረንቱ ኢታ ዎዛና ሙመተꬃ ካሌድኖ። ታን ታ ጫቁዋ ቃላ ኡንቱንቱ ናጋና ማላ አዛዛድ፤ ሽን ኡንቱንቱ እጼድኖ። ሄዋ ድራዉ፥ ሄ ጫቁዋ ግዶን ጻፈቴዳ ሸቃ ኡባ ኡንቱንቱ ቦላ አሃድ’ ያጋ” ያጌዳ።

9 ዛሪደካ መꬍና ጎዳይ ታዉ ሀዋዳን ያጌዳ፤ “ይሁዳ አሳ ግዶንነ የሩሳላመን ደእያዋንቱ ግዶን ማቁ ደኤ። 10 ኡንቱንቱ ካሰ ታ ቃላ ስሰናን እጼዳ ባረንቱ ማይዛ አዎቱዋ ናጋራዉ ጉየ ስሜድኖ። ኡንቱንቱ ሀራ ጾሳቶ ጎይኔድኖነ ኡንቱንቶ ኦꬄድኖ። እስራኤልያ አሳቱካ ይሁዳ አሳቱካ ታን ካሰ ኡንቱንቱ ማይዛ አዎቱዋና ጫቀቴዳ ጫቁዋ ካንꬄድኖ። 11 ሄዋ ድራዉ፥ መꬍና ጎዳይ ኡንቱንታ ሀዋዳን ያጌ፤ ‘ኡንቱንቱ ባቃቲደ አታናዉ ዳንዳየና መቱዋ ታን ኡንቱንቱ ቦላ አሀና። ኡንቱንቱ ታዉ ዋስናካ፥ ታን ኡንቱንቶ ስስከ። 12 ሄ ዎደ ይሁዳ ካታማቱዋ አሳቱነ የሩሳላመ አሳቱ ቢደ፥ ባረንቱ እጻና ጩዋይያ ጾሳቶ ዋሳና። ሽን መቱዋ ዎደ ሄ ጾሳቱ ሙለካ ኡንቱንቱ ማድክኖ። 13 ህንተኖ፥ ይሁዳ አሳቶ፥ ህንተ ጾሳቱ ህንተ ካታማቱዋ ኬሻ ጮራ። ቃይ ባኣላ ግያ ሄ ዬላ ጾሳዉ እጻና ጩዋያናዉ ህንተ ኤሴዳ ያርሽያ ሳአቱ የሩሳላመ ኦገቱዋ ኬሻ ጮራ’ ያጌ።

14 “ኤርማሳ፥ ሀ አሳቶ ታና አይነ ዎሶፓ፤ ኡንቱንቱ ድራዉ ጋናቶፓ ዎይ ኦቾፓ። አያዉ ጎፐ፥ ኡንቱንቱ ባረንቱ መቱዋ ጋላስ ታና ጼስያ ዎደ ታን ኡንቱንቶ ስስከ።

15 “ዳሮቱዋና ባረ ኢታ ማቁዋ ማቀትደ ታ ሲቅያ አሳይ ታ ጌሻ ጎልያን ቤታናዉ በሲ? ህንተ ህንተ ኢታ ኦሱዋ ኦꬅሽን፥ ያርሸቴዳ መህያ አሹ ህንተና ሙሩዋፐ አሻኔ? አሽንቶ ህንተ ናሸታና ሽን” ያጌዳ።

16 መꬍና ጎዳይ ኔና፥ ድጭያ፥ ሎኦ አይፍያ አይፍያ ዎጋራ ያጊደ ሱንꬄዳ። ሽን እ ሀ ዎጋራ ዎልቃማ ዳዳ ጉንꬃን፥ ታማን ጹጋና፤ አ ቃንካቱካ መኤረታና።

17 ታን፥ ህንተና ቶኬዳ ኡባፐ ዎልቃማ መꬍና ጎዳይ ህንተ ቦላ ኢታባ አሀናዉ አዋያድ። አያዉ ጎፐ፥ እስራኤልያ አሳቱነ ይሁዳ አሳቱ ባኣላዉ እጻና ጩዋዪደ፥ ታና ይሎዬድኖ።

18 መꬍና ጎዳይ ኡንቱንቱ ማቁዋ ታዉ ቆንጭሴዳ ድራዉ፥ ታን ኤራድ። ሄ ዎደ ኡንቱንቱ ኢታ ኦꬅያዋ እ ታና በሴዳ። 19 ታን ሹካዉ ካለꬂደ አፍያ አዳ ዶርሳ ማራ ማላ ግዳድ። ኡንቱንቱ ታ ቦላ፥ “አነ ኑን ምꬃካ አ አይፍያካ ꬋይሴቶ። አ ሱንꬃይ ሙለካ ሀሳየተና ማላ፥ አነ ኑን አ ፓጻ ደእያዋንቱ ግዶፐ ꬎቆሊደ ꬋይሴቶ” ያጊደ ማቀቴዳዋ ታን ኤራበይከ። 20 ሽን አቤት ኡባፐ ዎልቃማ መꬍና ጎዳዉ፥ ጽሉዋ ፕርድያዎ፥ አሳ ዎዛና ካሃ ቆርያዎ፥ ኔን ኡንቱንቱ ቦላ ነ ሀሉዋ ከስያዋ ታና በሳ። አያዉ ጎፐ፥ ታን ታ ቆሁዋ ነዉ ማጋናድ።

21 ሄዋ ድራዉ፥ “መꬍና ጎዳ ሱንꬃን ትምቢትያ ኦዶፓ፤ ኔን ኑ ኩሽያን ሀይቃና” ያጊደ፥ ኔና ዎꬋናዉ ኮይያ አናቶታ አሳዉ መꬍና ጎዳይ ግያዌ ሀዋ። 22 ኡባፐ ዎልቃማ መꬍና ጎዳይ ሀዋዳን ያጌ፤ “ታን ኡንቱንታ ሙራና። ኡንቱንቱ ዎዳላቱ ማሻን ሀይቃና፤ ኡንቱንቱ ማጫ ናናቱነ አቱማ ናናቱ ኮሻን ሀይቃና፤ 23 ኡንቱንቱፐ እቱነ ደኤና። አያዉ ጎፐ፥ ታን ሙርያ ላይꬅ አናቶታ አሳ ቦላ ኢታባ አሀና” ያጌ።

<- ኤርማሳ 10ኤርማሳ 12 ->