1 እት ጋላስ ሳምሶን ጋዛ ጌተትያ ፕልስጼማቱዋ ካታማ ቤዳ፤ ያን እት ሻርሙጻ ምሽራቶ በኢደ፥ እዝና አቃናዉ እ ጎልያ ገሌዳ። 2 ጋዛ ካታማን ደእያ አሳይ ሳምሶን ኡንቱንቱ ካታማ ዬዳዋ ስሲደ፥ ካታማ ዩይ አꬊደ፥ ቃማ ኡባ ካታማ ፐንግያ ናጊደ አቄዳ፤ “ሳአይ ዎንታናዉ ናጊደ፥ ኑን አ ዎꬋና” ያጊደ ቃማ ኡባ ጮኡ ጌድኖ። 3 ሽን ሳምሶን ያን ግሴዳዌ ብላሄ ጋካናዉ ጻላላ። ብላሄ ደንዲደ፥ ካታማ ድርሳ ፐንግያ ኦይኪደ፥ ሳንቃ፥ ጉባንያ፥ ማቃንያነ ጎርድያ ሽካላቱዋ ሾዴዳ። ሄ ኡባካ ሀሽያን ቶኪደ፥ ከብሮናፐ ስንꬃ ባጋና ደእያ ደርያ ሁጲያ ከሴዳ።

4 ሄዋፐ ጉይያን፥ ሳምሶን ሶሬቃ ግያ ዛንጋራን ደእያ እት ዳሊሎ ግያ ምሽራቶ ሲቄዳ። 5 ያትና፥ ፕልስጼማቱዋ ካፓቱ ኢኮ ዪደ፥ “ኔን አ ጭማደ፥ ሄ ዎልቃ ኡባ አያፐ እ ደሜደንቶነ ቃይ ኑን አ ዎት ጾኒደ ቃቻናዉ ዳንዳይንቶ ኦቻ። እቱ እቱ ኑን ነዉ እት ሻአነ እት ጼቱ ጻጋራ ብራ እማና” ያጌድኖ።

6 ዳሊላ ሳምሶና፥ “ሀዋ ኬሻ ዎልቃ ኔን ሀቃፐ ደማድንቶ፥ ሀያና ታዉ ኦዳርኪ! እት አሳይ ኔና ቃቺደ፥ ዋቲደ ነ ዎልቃ ዳቡርሳናዉ ዳንዳዪ?” ያጋዱ።

7 ሳምሶን፥ “ታና ላፑን እርጻ ዳፎቱዋን አሳይ ቃቾፐ፥ ዳቡራደ፥ ሀራ አሳዳን ሀናና” ያጊደ ዛሬዳ።

8 ሄዋፐ ጉይያን፥ ፕልስጼማቱዋ ካፓቱ ዳሊልዉ ላፑን እርጻ ዳፎቱዋ አህና አ ሳምሶና ቃቻዱ። 9 ባረ ቆልኦን አሳ ቆሳ ዎꬃደ፥ “ሳምሶና፥ ፕልስጼማቱ ይክቼድኖ” ጋደ ጼሳዱ። ሽን ሻሉ ታማይ ኦይቂና ዱጸረትያዋዳን፥ ዳፎቱዋ ዱሰረꬅ የጌዳ። ያትና፥ እ ዋን ዎልቃሚንቶ ጹራይ ኤረትቤና።

10 ያትና፥ ዳሊላ ሳምሶና፥ “ሄኮ ኔን ታናን ካኣሳ፤ ኔን ታዉ ዎርዱዋ ኦዳዳ። ሀእካ ኔን ቃሸታናዌ አያነንቶ፥ ሀያና ታዉ ኦዳርኪ!” ያጋዱ።

11 እ እዞ፥ “አሳይ ጎኤትቤና ኦራꬃ ዎዶሩዋን ታና ቃቾፐ፥ ዳቡራደ፥ ሀራ አሳዳን ሀናና” ያጌዳ።

12 ዳሊላ ኦራꬃ ዎዶሩዋ አካደ፥ ሳምሶና ቃቻዱ። ቃይካ ባረ ቆልኦን አሳ ቆሳ ዎꬃደ፥ “ሳምሶና፥ ፕልስጼማቱ ይክቼድኖ” ያጋዱ። ሽን እ ዎዶሩዋ ቀስያፐ ሻሉዋዳን ዱሰረꬅ የጌዳ።

13 ያትና፥ ዳሊላ ሳምሶና፥ “ሀእ ጋካናዉ ኔን ታናን ካኣዳ፤ ኔን ታዉ ዎርዱዋ ኦዳዳ። ሀእካ ኔን ቃሸታናዌ አያነንቶ ሀያና ታዉ ኦዳርኪ!” ያጋዱ።

ሄዋፐ ጉየ እ እዞ፥ “ታ ሁጲያ ላፑን ዳꬃ ብናና ቃጭናና ጋꬃደ፥ ሀርባን ዋላካደ፥ ሙኩካ ጾንጋ ጾንጋደ ዳዶፐ፥ ታን ዳቡራደ፥ ሀራ አሳዳን ሀናና” ያጌዳ።

14 ሄዋፐ ጉይያን፥ ሳምሶን ገምእሽሽን፥ ዳሊላ አ ሁጲያ ላፑን ዳꬃ ብናናናነ ቃጭናና ጋꬃ ዋላካደ ዳዳዱ። ሄዋፐ ጉይያን፥ “ሳምሶና፥ ፕልስጼማቱ ይክቼድኖ” ያጋዱ። ሄዋፐ ጉየ እ ገምእሹዋፐ ቤጎቲደ፥ ባረ ብናና ዳደቴዳ ማዩዋፐነ ሀርባፐ ሾድ አኬዳ።

15 ያትና አ፥ “ነ ዎዛናይ ታናና ደኤናን፥ ‘ታን ኔና ሲቃይ’ ዋታደ ጋይ? ታናን ሀዋና ሄዙ ገደ ካኣዳ። ኔን ሀ ዎልቃ አያፐ ደማድንቶ፥ ታዉ ኦዳባካ” ያጋዱ። 16 ሀቼ ሀቼ ዛራ ዛራ ኦቻደ ዋይስና፥ ሀንያባ ꬋዬዳ።

17 ያትና፥ “ታ አት ኡሉዋፐ ዶምና፥ ታን ጾሳዉ ዱማቴዳ ናዝራዌ አሳ ግዴዳ ድራዉ፥ ታ ሁጲያ ብናናይ ሜደት ኤረና። ታ ብናናይ ሜደቶፐ፥ ታ ዎልቃይ ታፐ ꬋይና፥ ታን ዳቡራደ፥ ሀራ አሳዳን ሀናና” ያጊደ፥ ባረ ዎዛናን ደእያዋ ኡባ እዝዉ ኦዴዳ።

18 ባረ ዎዛናን ደእያዋ ኡባ እ ኦዴዳዋ ዳሊላ በኤዳ ዎደ፥ “ባረ ዎዛናን ደእያዋ ኡባ ታዉ ኦዴዳ ድራዉ፥ አነ እት ገደ ስሚደ ዪተ” ያጋደ ፕልስጼማቱዋ ካፓቶ ኪታ የዳዱ። ኡንቱንቱ ብራ አኪደ፥ ኢኮ ዬድኖ። 19 ዳሊላ ሳምሶና ባረ ክዉዋን ገምእሽሳዱ፤ እት አሳ ጼስና ዪደ፥ አ ሁጲያ ላፑን ዳꬃ ብናና ሜዴዳ፤ አ ዎልቃይ አፐ ꬋዬዳ። ሄዋፐ ጉይያን፥ አ ዋይስያዋ ዶማዱ፤ 20 “ሳምሶና፥ ፕልስጼማቱ ይክቼድኖ!” ያጋዱ።

ገምእሹዋፐ ቤጎቲደ፥ ካሰዋዳን ዱሰሬꬃደ ባና ያጊደ ቆፔዳ፤ ሽን መꬍና ጎዳይ አፐ ሻከት ክቼዳዋ እ ኤርቤና።

21 ፕልስጼማቱ አ ኦይቄዳዋፐ ጉይያን፥ አ ላኡ አይፈቱዋ ዎጭ ከሲደ፥ ጋዛ ካታማ አፌድኖ። ሄዋፐ ካላ ናሃስያ ሳንሳላታን ቃቼድኖ፤ ቃሾ ጎለን ደእያ ዎጻን ካꬃ ጋጫናዳን ኦꬄድኖ። 22 ኡንቱንቱ አ ሁጲያ ብናና ሜዴዳዋፐ ጉይያን፥ ብናናይ ስሚደ ዶሉዋ ዶሜዳ።

23 ፕልስጼማቱዋ ካፓቱ፥ “ኑ ጾሳይ ኑ ሞርክያ ሳምሶና ኑ ኩሽያን አꬂደ እሜዳ” ያጊደ ባረንቱ ጾሳ ዳጎናዉ ዎልቃማ ያርሹዋ ያርሻናዉነ ናሸታናዉ እትፐ ሺቄድኖ።

24 አሳይ ኡባይ አ በኤዳ ዎደ፥ “ኑ ጋድያ ባይዜዳ፥ ኑ አሳፐ ዳሩዋ ዎꬌዳ ኑ ሞርክያ ኑ ጾሳይ ኑ ኩሽያን አꬂደ እሜዳ” ያጊደ ባረንቱ ጾሳ ጋላቴድኖ። 25 ኡንቱንቱ ሎይꬅ ናሸቴዳ ድራዉ፥ “ካኢደ ኑና ናሸቻና ማላ፥ ሳምሶና ጼስተ” ያጌድኖ። ሄዋፐ ጉየ ሳምሶና ቃሾ ጎልያፐ ጼሲደ አህና፥ እ ኡንቱንቱ ስንꬃን ካኤዳ፤ ካኤዳዋፐ ጉይያን፥ ቱሳቱዋፐ ግዱዋን ኤሴድኖ።

26 ሳምሶን አ ኩሽያ ኦይቂደ ካለꬅያ ናኣ፥ “ታን ኡንቱንቱን ዘምፓደ ኤቃና ማላ፥ ጎልያ ቶኬዳ ቱሳቱዋ ታና ቦሽሳ” ያጌዳ። 27 ጎልያ ግዱዋን አቱማ አሳቱነ ማጫ አሳቱ ኩም ኡቴድኖ፤ ቃይ ሄዋን ፕልስጼማቱዋ ካፓቱ ኡባቱካ ደኢኖ። ሳምሶን ካእሽን፥ ጎልያ ቦላን ደምባዪደ ኬጼዳ ሳኣን ኡቲደ፥ ሄዙ ሻአ ግድያ አቱማ አሳቱነ ማጫ አሳቱ በኢኖ።

28 ሄ ዎደ ሳምሶን መꬍና ጎዳ ዎሲደ፥ “አቤት ኡባ ሞድያ መꬍና ጎዳዉ፥ ሀይ ታና ሀሳያርኪ! አቤት ጾሳዉ፥ ፕልስጼማቱ ታ ላኡ አይፈቱዋ ከሴዳዋ፥ ሀሉዋ ታን ከሳናዳን፥ ሀይ ታና እት ገደ ምንꬃርኪ!” ያጌዳ። 29 ሳምሶን ጎልያ ቶኬዳ ግዶ ቱሳቱዋ ላኡዋካ ኦይቄዳ። ኡሸቻ ኩሽያን እቱዋ፥ ሀድርሳ ኩሽያን እቱዋ ኦይቄዳዋፐ ጉይያን፥ 30 “አነ ታን ፕልስጼማቱዋና እትፐ ሀይቃይ!” ያጊደ ዋሴዳ። ባረዉ ደእያ ዎልቃ ኡባን ሱግና፥ ኬꬃይ ካፓቱ ቦላነ ግዱዋን ደእያ አሳ ኡባ ቦላ ኩንዴዳ። ሳምሶን ሀይቂደ ዎꬌዳ አሳይ፥ እ ፓጻ ደኢደ ዎꬌዳ አሳፐ ዳሬዳ።

31 ያትና፥ አ እሻቱነ አ ዳቦቱ ኡባይ ዪደ፥ አ አሃ አፌድኖ፤ ጾርአ ካታማፐነ ኤሽታኦላ ካታማፐ ግዱዋን፥ አ አዉዋ ማኑሄ ዱፉዋን ሞጌድኖ። ሳምሶን እስራኤላን ላታሙ ላይꬃ ዳናቲደ ፕርዴዳ።

<- ዳናቱዋ 15ዳናቱዋ 17 ->