1 ጾሳይ ሀዋዳን ያጌ፤ “ታን ታና ኦችቤናዋንቶ ቆንጫድ፤ ቃይ ታና ኮይቤናዋንቶ ቤታድ። ታን ታ ሱንꬃ ጼስቤና ካዉተꬃዉ፥ ‘ታ ሀዋና! ታ ሀዋና!’ ያጋደ ኮያድ። [a] 2 ባረ ቆፋ ካሊድ፥ ሎኦ ግደና ኦግያን ሀመትያ ማካላንቻ አሳቱዋኮ ጋላሳ ኡባን ታ ኩሽያ ምጫድ። [b] 3 ሀ አሳይ አታክልትያ ግዶን ያርሺደነ ጹብያ ቦላን እጻና ጩዋዪደ፥ ታን ጼልሽን፥ ታና ኡባ ዎደ ሀንቀꬂኖ። 4 ቃይ ኡንቱንቱ ዱፉዋ ግዶን ኡትያዋንታ፤ ጌማ ሳኣን ቃማ አቅያዋንታ። ጉዱንꬃ አሹዋ ምያዋንታ፤ ኡንቱንቱ ጻሩዋን ቱና አሹዋ ጫባይ ደእያዋንታ። 5 ሄዋ ኦꬂደ፥ ኡንቱንቱ ቃይ ሀራቱዋ፥ ‘ያን ህንተንቶ ደእተ፤ ኑን ህንተፐ ጌሻ ግድያ ድራዉ፥ ኑኮ ሺቆፕተ!’ ያጊኖ። ኡንቱንቱ ታ ሲ ግዶፐ ከስያ ጩዋነ ጋላሳ ኡባ ኤጽያ ታማ።

6 “በእተ፥ ታ ስንꬃን ጻፈት ኡቴዳ፤ ታን ኡንቱንቶ ዛራናፐ አትና፥ ጮኡ ጊከ፤ ኡንቱንታ ሙራናዉ ቃቻድ። 7 ኤ፥ ታን ኡንቱንቱ ባይዙዋነ ኡንቱንቱ አዎቱዋ ባይዙዋ አጩዋ እትፐ ኡንቱንቶ ዛራና። አያዉ ጎፐ፥ ኡንቱንቱ ደርያ ቦላን እጻና ጩዋዬድኖ፤ ቃይ ዞዘቱዋ ቦላን ታና ቦሬድኖ። ኡንቱንቱ ካሰ ኦꬄዳ ኦሱዋ አጩዋ ታን ኡንቱንቶ ዛራና” ያጌ መꬍና ጎዳይ።

8 መꬍና ጎዳይ ሀዋዳን ያጌ፤ “ዎይንያ አይፊ ዎይንያ ቱራን ደእያ ዎደ አሳይ፥ ‘አ ግዶን አንጁ ደእያ ድራዉ፥ አ ꬋይሶፕተ’ ግያዋዳን፥ ታን ታ ቆማቱ ድራዉ፥ ሄዋዳን ኦꬃና፤ ታን ኡንቱንቱ ኡባ ꬋይስከ። 9 ታን ያቆባፐ ዘረꬃ፥ ይሁዳፐካ ታ ደረቱዋ ላትያዋንታ ከሳና፤ ታን ዶሬዳዋንቱ አ ላታና፤ ታ ቆማቱካ ያን ደአና። 10 ታና ኮዬዶ ታ አሳዉ ሳሮና ግያ ደምባይ ዶርሳ ዉድያ ሄምያ ሳ ግዳናዋ፤ ቃይ አኮራ ዎምባይ ሚዛ ዉድያ አላጽስያ ሳ ግዳናዋ። [c]

11 “ሽን ህንተኖ፥ መꬍና ጎዳ አጌዳዋንቶ፥ ታ ጌሻ ደርያ ዶጌዳዋንቶ፥ ካጫ ግያ ኤቃዉ ማዳ ጊግሴዳዋንቶ፥ ቃይ ህንተ ዉርሰꬃ ኤራናዉ፥ ሳማ ግያ ኤቃዉ ዋላካ ዎይንያ ኤሳ ዋንጫን ኩንꬄዳዋንቶ፥ 12 ታን ህንተ ዉርሰꬃ ማሻዉ አꬃደ እማና፤ ህንተ ኡባይካ ጎራኤታናዉ ሆካና። አያዉ ጎፐ፥ ታን ህንተና ጼስና ኮይበይክታ፤ ሃሳዪደ ስስበይክታ” ያጌ። ህንተ ታ ስንꬃን ኢታባ ኦꬄድታ፤ ታን ዶሰናባካ ዶሬድታ።

13 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “በእተ፥ ታ ቆማቱ ማና፤ ሽን ህንተ ኮሻታና። ታ ቆማቱ ኡሻና፤ ሽን ህንተ ሳመታና። ታ ቆማቱ ናሸታና፤ ሽን ህንተ ዬላታና። 14 በእተ፥ ታ ቆማቱ ዎዛናን ናሸቲደ የጻና፤ ሽን ህንተ ዎዛናን ካዮቲደ ዋሳና። ቃይ ህንተ አያናይ መኤዳ ድራዉ፥ ህንተ ዝላሊደ ዬካና። 15 ህንተ ህንተ ሱንꬃ ታ ዶረቴዳዋንቶ ሸቃዉ እማና። ኡባ ሞድያ መꬍና ጎዳይ ህንተና ዎꬋና፤ ሽን እ ባረ ቆማቱዋ ዱማ ሱንꬃን ጼሳና። 16 ሄ ጋድያን አንጁዋ ኮይያ ኡባይ ቱማተꬃ ጾሳይ አንጃናዳን ዎሳና። ሄ ጋድያን ጫቁዋ ጫቂያ ኡባይካ ቱማተꬃ ጾሳን ጫቃና፤ አያዉ ጎፐ፥ ካሰ መቶቱ ዶገቴድኖ፤ ታ አይፍያ ስንꬃፐካ ጌሜድኖ” ያጌ።

17 ጾሳይ ሀዋዳን ያጌ፤ “በእተ፥ ታን ኦራꬃ ሳሎቱዋነ ኦራꬃ ሳኣ መꬋይ፤ ካሰባይ ኡባይ ሀሳየተናነ ቆፈተና። [d] 18 ሽን ታን መꬍያባን መꬍናዉ ናሸትተነ ሀሹ ጊተ። አያዉ ጎፐ፥ ታን መꬌዳ የሩሳላማ ናሸቻን ኩሜዳኖ ግዳና፤ የሩሳላመ አስካ ሀሹተነ ግያዋ ግዳና። 19 ታን የሩሳላመን ናሸታና፤ ታ አሳንካ ሀሹ ጋና። ሀዋፐ ስንꬃናዉ ዬክያዋ ኮሻይነ ኡንኤቲደ ዋስያዋ ኮሻይ ያን ስሰተና። [e]

20 “የሩሳላመ ግዶን ሀዋፐ ስንꬃናዉ፥ ጉꬃ ዎደ ጻላላ ደኢደ ሀይቂያ ቄር ናእ፥ ዎይ ባረ ላይꬃ ዉርሰናን ሀይቂያ ጭማ አሳይ ደኤና። ጼቱ ላይꬃና ሀይቂያ ኡራይ ዳሮ ያላጋን ሀይቄዳ ጌተታና፤ ጼቱ ላይꬃ ጋናን ሀይቂያዌ ሼቀቴዳዋዳን ፓይደታና። 21 ሄ ዎደቱዋን አሳቱ ጎለቱዋ ኬጺደ፥ ኡንቱንቱን ደአና፤ ዎይንያ ቱራቱዋካ ቶኪደ፥ ኡንቱንቱ አይፍያ ማና። 22 ኡንቱንቱ ኬጽና፥ ሀራይ ደኤና፤ ሀራይ ማናዉ ቶክያዋ ቶክክኖ። ታ አሳ ላይꬃይ ምꬃ ላይꬃዳን አዱቃና፤ ቃይ ታን ዶሬዳዋንቱ ባረንቱ አዱሳ ዎድያዉ ባረንቱ ኩሽያ ኦሱዋን ናሸታና። 23 ኡንቱንቱ ጮ ዳቡርክኖ፤ ዎይ ናናቱዋ ቦሻዉ የልክኖ፤ አያዉ ጎፐ፥ ኡንቱንቱ ባረንቱ ናናቱዋናካ መꬍና ጎዳን አንጀቴዳ ዘረꬃ ግዳናዋ። 24 ኡንቱንቱ ታና ጼሳናፐ ካሰታደ ታን ኡንቱንቶ ኮያና፤ ቃይ ኡንቱንቱ ብሮ ሃሳይሽን፥ ታን ኡንቱንታ ስሳና። 25 ኦኮሩነ ዶርሳ ማራይ እትፐ ሄመታና፤ ጋሙካ ቦራዳን፥ ኡቱላ ማና። ቃይ ሾሻዉ ባናይ ቁማ ግዳናዋ። ሄ ዎደቱዋን ታ ጌሻ ደርያን ኡባን፥ ኡንቱንቱ ቆሄትክኖነ ባይክኖ። ታን መꬍና ጎዳይ ሀዋ ኦዳይ” ያጌ። [f]

<- ኢስያሳ 64ኢስያሳ 66 ->