1 ኤዶማ ጋድያን ደእያ ቦጽራ ግያ ካታማፐ ዞኦ ማዩዋ ማዪደ ይያዌ፥ ሄዌ እ ኦኔ? ሀ ፑላና ደእያ ማዩዋ ማዪደ፥ ባረ ዎልቃ ምኖተꬃን ስንꬃዉ ሀመትያዌ ኦኔ?[a]

ጾሳይ፥ “ሄዌ ጽሉዋ ሃሳይያዌነ ዎልቃን አሽያዌ ታና ግድክታ!” ያጌ።

2 ዎይንያ ጉምኢያሳን ዎይንያ የꬍያ ብታንያ ማዩዋዳን፥ ነ ማዩ አያዉ ዞኤዴ?

3 ጾሳይ ሀዋዳን ያጊደ ዛራና፤ “ዎይንያ ጉምኢያሳ ታን ታረካ የꬋድ፤ ካዉተꬃቱዋፐ እት አሳይነ ታናና ባዋ። ታን ኡንቱንታ ታ ሀንቁዋን የꬋድ፤ ታ ይሉዋንካ ኡንቱንታ ድርጸረꬃድ። ኡንቱንቱ ሱꬃይ ታ ማዩዋ ቦላን ꬋጨትና፥ ታ ማዩ ኡባይ ባዬዳ። [b] 4 ታን ታ አሳ ዎዝያ ጋላሳይነ ኡንቱንቱ ሞርከቶ ሀሉዋ ከስያ ላይꬃይ ጋኬዳ። 5 ታን ጼላድ፤ ሽን ታና ማድያ እት አሳይነ ቤትቤና። ማድያዌ ꬋዬዳ ድራዉ፥ ታን ማላለታድ። ሄዋ ድራዉ፥ ታ ቀሲ ታዉ ጾኑዋ አሄዳ፤ ታ ሀንቁካ ታና ማዴዳ። [c] 6 ታን ታ ሀንቁዋን ካዉተꬃቱዋ የꬋድ፤ ታ ይሉዋንካ ኡንቱንታ መንሬꬃድ፤ ኡንቱንቱ ሱꬃካ ታን ጋድያን ጉሳድ” ያጋና።

7 መꬍና ጎዳይ ኑዉ ኦꬄዳ ኦሱዋ ኡባ ድራዉ፥ መꬍና ጎዳ አገና ሲቁዋነ አ ጋላታ ታን ኦዳና፤ ኤ፥ ባረ ማሮታንነ ባረ ኬካተꬃ ዳሩዋን እስራኤልያ አሳዉ እ እሜዳ ጮራ ሎኦባ ታን ኦዳና። 8 ጾሳይ ኦዲደ፥ “ኡንቱንቱ ቱሙ ታ አሳቱዋነ ታ ናናቱዋ ግድያ ድራዉ፥ ታና ጭማናዉ ኮይክኖ” ያጌዳ። ሄዋ ድራዉ፥ እ ኡንቱንታ አሽያዋ ግዴዳ። 9 ኡንቱንቱ ዋይያ ኡባን እ ዋየቴዳ። አ ደኡሳ ኪታንቻይ ኡንቱንታ አሼዳ። እ ኡንቱንታ ባረ ሲቁዋንነ ባረ ማሮታን ዎዜዳ። ካሰ አꬌዳ ዎደቱዋ ኡባን እ ኡንቱንታ ደንꬂደ ቶኬዳ።

10 ሽን ኡንቱንቱ ማካሌድኖ፤ አ ጌሻ አያናካ ካዮዬድኖ። ሄዋ ድራዉ፥ እ ስሚደ፥ ኡንቱንቶ ሞርከ ግዴዳ፤ ኡንቱንቱናካ ኦለቴዳ።

11 ሄዋፐ ጉይያን አሳይ በንዋ፥ እ ባረ ቆማ ሙሴ ዎደ ኦꬄዳዋ ሀሳዪደ፥ ሀዋዳን ያጌዳ፤ “ባረ ዉድያ ሄንꬃንቻቱዋናካ ኡባ አባ ግዶና አꬂደ ከሴዳዌ ሀቃን ደኢ? ቃይ ሄ ዎደ ባረ ጌሻ አያና ኡንቱንቱ ግዶን ዎꬄዳዌ ሀእ ሀቃን ደኢ? 12 ባረ ቦንቹዋ ቀስያ ዎልቃማ ዎልቃ ሙሴዉ ኡሸቻ ኩሽያ ግዳናዳን ኪቴዳዌ፥ ባረ መꬍና ሀይꬃ ከሳናዉ፥ ኡንቱንቱ ስንꬃን ደእያ ሃꬃ ሻኬዳዌ፥ [d] 13 ኡንቱንቱ ጪሙዋ ግዶና ፕንꬄዳዌ ሀቃን ደኢ?” ያጌድኖ።

ባዙዋና አꬍያ ፓራዳን፥ ኡንቱንቱ ꬉበትበይክኖ። 14 ዎምባ ዱገ ዎꬍያ መህያዳን፥ መꬍና ጎዳ አያናይ ኡንቱንታ ሸምፕሴዳ። ሄዋዳን ኔን ነ ሱንꬃ ቦንችሳናዉ ነ አሳ ካለꬃዳ።

15 አቤት ጾሳዉ፥ ሳሉዋና ዱገ ጼላ፤ ኔን ደእያ ጌሻነ ቦንቾ ግዴዳ ሳፐ ኤለካ በአ። ኔን ምሸትያ ምሹነ ነ ዎልቃይ አኔ? ነ ዎዛናይ ኑና ላሞትያ ላሞታይነ ነ ቃረታይ ኑፐ ሃኬዳ። 16 አብራሃመ ኑና ኤራና ꬋዮፐካ፥ ያቆብ ኑና አኬከናን ꬋዮፐካ፥ አቤት መꬍና ጎዳዉ፥ ኔን ኑ አዉዋ። በን ዎደፐካ ዶሚደ፥ ነ ሱንꬃይ ኑና ዎዝያዋ። 17 አቤት መꬍና ጎዳዉ፥ ኑን ነ ኦግያፐ ባያናዳን፥ አያዉ ኦꬃዲ? ቃይ ኑን ነዉ ያየናዳን፥ ኑ ዎዛና አያዉ ꬉሌፋያዴ? ጾሳዉ፥ ነ ቆማቱ ድራዉ፥ ነ ቢታ ላቴዳ ዛራቱዋ ድራዉ፥ ኑኮ ስማ። 18 ነ ጌሻ አሳይ ነ ጌሻ ጎልያ ጉꬃ ዎድያዉ ላቴድኖ፤ ሽን ኑ ሞርከቱ አ ዱገ ዛሪደ የꬌድኖ። 19 ኑን በንፐካ ነዋንታ፤ ኡንቱንታ ኔን ሞዳባካ፤ ኡንቱንቱ ነ ሱንꬃን ጼሰትበይክኖ።

<- ኢስያሳ 62ኢስያሳ 64 ->