1 ጽሎ አሳይ ሀይቄ፤ ሽን ሄዋ አኬኪደ ቆፕያዌ ባዋ። ባረና ጾሳዉ እሜዳ አሳቱ ጋድያፐ ꬋዪኖ፤ ሽን ጽሎ አሳይ ባሻይ ያናፐ ካሰቲደ አከትያዋ ኦንነ አኬከና። 2 እ ቢደ ሳሮተꬃይ ደእያ ሳኣ ገሌ። ሱረተꬃን ሀመትያዋንቱ ሀይቂደ ሸምፑዋ ደሚኖ።

3 ጾሳይ ሀዋዳን ያጌ፤ “ህንተኖ፥ ሻሬቻት ናቶ፥ ህንተኖ ዎሹምያንነ ሻርሙጽያን ዘረꬃቶ፥ ሃይተ። 4 ህንተ ኦ ቦላ ቅሊጪቴ? ህንተ ኦና ህንተ ዶናን ቦቺቴ? ህንተ እንጻርሳካ ኦ ቦላ ከሲቴ? ህንተ ማካላንቻቱዋ ናናቱዋነ ዎርዳንቻቱዋ ናናቱዋ ግድክቴ? 5 ህንተ ዎላ ግዱዋንነ ዳሻ ምꬃ ኡባ ጋርሳን አሙዋን ጹገቲታነ ቱናባ ኦꬂታ፤ ህንተ ናናቱዋካ ዛንጋራ ሾባንነ ሹቻ ጎንጎሉዋን ሹኪደ ያርሺታ። 6 ዛንጋራ ሾባን ደእያ ሊቆ ሹቻቱ ህንተ ጾሳቱዋ። ህንተ ኡንቱንቶ ኡሻ ያርሹዋ ትጌድታ፤ ካꬃ ያርሹዋካ እሜድታ። ያትና፥ ታን ሀዋን ኡባን ናሸትያዋ ህንተንቶ ማላቲ? 7 ሎይꬅ ꬎቃነ አዱሳ ደርያ ሁጲያን ህንተ ግሱዋ የጌድታ፤ ያን ያርሻናዉ ፑደ ከሴድታ። 8 ህንተ ፐንግያፐነ ቆስለꬃፐ ሶ ባጋና ኤቃ ምስለቱዋ ኤሴድታ። ታና አግ ባሺደ፥ ህንተ አርሳ አሲደ፥ ያ ፑደ ከሴድታ። ኡንቱንቱና ጫቁዋ ጫቀቴድታ፤ ያቲደ ኡንቱንቱ አርሳ ዶሴድታ፤ ኡንቱንቱ ካሉዋካ በኤድታ። 9 ዛይትያ አኪደ፥ ሞሎካ ግያ ኤቃኮ ቤድታ፤ ህንተ ሽቱዋካ ዳርሴድታ፤ ህንተዉ ኪተትያዋንታ ሃኮ ሳ ኪቴድታ፤ ሀራይ አትና፥ ስኦልያ ጋካናዉ ዎꬌድታ። 10 ህንተ ሀራ ጾሳቱዋ ኮዪደ ዳቡሬድታ፤ ሽን፥ ‘ህዶት ባዋ’ ያግበይክታ። ህንተ ዎልቃይ ሃ ኦራጼዳ፤ ሄዋ ድራዉ፥ ላባኒደ ኩንድበይክታ።

11 “ህንተ ኦስ ያዪደ፥ ታዉ ዎርዶቴድቴ? ህንተ ታና ሀሳይበይክታ፤ ህንተ ዎዛናንካ ቆፕበይክታ። ታን ዳሮ ዎድያ ጮኡ ጌዳ ድራዉ ግደኔ፥ ህንተ ታዉ ያየናን አጌዳዌ? 12 ታን ህንተ ጽሎተꬃነ ህንተ ኦሶቱዋ ቆንጭሳና፤ ሽን ህንተና አይነ ጎእክኖ። 13 ህንተ ዋስያ ዎደ፥ ህንተ ሺሼዳ ኤቃቱ ህንተና አሽኖ! ኡንቱንታ ኡባካ ጫርኩ አክ አፋና፤ እቶደን ሸምፕያ ሸምፑ ኡንቱንታ ፑን ꬋይሳና። ሽን ታና ባረዉ ባቃት አትያሳ ኦꬅያ አሳይ ቢታ ላታና፤ ታ ጌሻ ደርያካ እ አካና” ያጌ።

14 ጾሳይ ሀዋዳን ያጌ፤ “ግምቢተ፥ ግምቢተ! ኦግያካ ጊግስተ፤ ታ አሳ ኦግያፐ ꬉቢያዋ ኡባ ድግተ” ያጌ። 15 አያዉ ጎፐ፥ መꬍናዉ ደእያዌ፥ ግታይ፥ ꬎቃን ደእያዌ፥ አ ሱንꬃይካ ጌሻ ጌተትያዌ፥ ሀዋዳን ያጌ፤ “ታን ꬎቁ ጌዳነ ጌሻ ሳኣን ደአይ፤ ግዶፐነ፥ ባረንቱ ኦꬄዳ ናጋራዉ ካዮቲደ ስምያዋንቱናነ ባረና ዝቂ ኦꬅያዋንቱና ደአይ። ያታደ ታን ባረንቱ ኦꬄዳ ናጋራዉ ካዮቲደ ስምያዋንቱ አያናነ ባረና ዝቂ ኦꬅያዋንቱ ዎዛና ኦራጽሳይ። 16 ታን መꬍናዉ ሞትከ፤ ኡባ ገደካ ሀንቀትከ። አሳ አያናይ፥ ታን መꬌዳ አሳ ሸምፑ ዳቡራና። 17 ኡንቱንቱ ናጋራ ጋሱዋንነ ኡንቱንቱ ያርያ ጋሱዋን፥ ታን ኡንቱንታ ሀንቀታድ። ኡንቱንታ ሾጫድ፤ ታ ስንꬃካ ኡንቱንቱፐ ገንꬃድ። ሽን ኡንቱንቱ ሀእካ ስሚደ፥ ባረንቱ ዎዛና ቆፋን ቤድኖ። 18 ታን ኡንቱንቱ ኦገቱዋ በኣድ፤ ሽን ታን ኡንቱንታ ፓꬃና፥ ካለꬃናነ ዬክያዋንታ ምንꬃና። 19 እስራኤልያ ጋድያን ዬክያዋንቱ መተርሻን ጋላታ ዎꬃና። ሃኩዋንነ ማታን ደእያዋንቶ ሳሩ ግዶ። ታን ኡንቱንታ ፓꬃና” ያጌ መꬍና ጎዳይ። [a] 20 ሽን ኢታቱ ቡሉቂያነ ኡርቃ ፑደ ፑሻክያ፥ ዎፑ ጋናዉካ ዳንዳየና አባ ቤታ ማላ። 21 ታ ጾሳይ፥ “ኢታቶ ሳሩ ባዋ” ያጌ። [b]

<- ኢስያሳ 56ኢስያሳ 58 ->