8 ሳአይ ꬋይና፥ ህንተ ጻላላይ ጋድያ ቦላ ደአና ጋካናዉ፥ ጎልያ ጎልያ ቦላ ጉጅያዋንቶ፥ ጋድያ ጋድያና ጋꬅያዋንቶ፥ ህንተንቶ አየ አና! 9 ኡባፐ ዎልቃማ መꬍና ጎዳይ ታና ሀዋዳን ያጌዳ፤ “ሄ ዎልቃማ ጎለቱ ኦናና፤ ሄ ሎኦ ጎለቱዋን ደአናዉ አሳይ ꬋያና። 10 ታሙ ዋꬃ ቦራቱዋን ቶኬዳ ዎይንያ አይፍያፐ እት ኦቶ ግድያ ጉምኤቴዳ ዎይንያ ኤሳ ጻላላይ ከሳና፤ ታሙ ቁንአ ካꬃ ዘርና፥ እት ቁንአ ካꬃ ጻላላ አይፋና” ያጌዳ።

11 ማꬆይያ ኡሻ ኮያናዉ ዎንታ ጉራና ደንድያዋንቶነ ዎይንያ ኤሳን ጹገታና ጋካናዉ፥ ሳኣ ቃምስያዋንቶ አየ አና! 12 ኡንቱንቱ ሾብያን ማስንቁ፥ ዲꬃይ፥ ዳርቢ፥ ህጽጺነ ዎይንያ ኤሳይ ደኤ፤ ሽን ኡንቱንቱ መꬍና ጎዳ ኦሱዋ ጋተ ጊክኖ፤ እ ባረ ኩሽያን ኦꬄዳዋ ቦንችክኖ። 13 ያትና፥ ታ አሳይ አኬካ ꬋዬዳ ድራዉ፥ ኦሞደቲደ ባና፤ ኡንቱንቱ ጋድያ አይስያዋንቱካ ኮሻን ሀይቃና፤ ኡንቱንቱ አኮ አሳይካ ኮፕሳ መላና። 14 ዱፉ ባረ ጎምፓ አሴ፤ ባረ ዶናካ ዛዋይ ባይናዋ ሀንጌ፤ የሩሳላመን ደእያ ዎልቃማ አሳነ የንኮ ዳሮ አሳ፥ ዋጭያዋንታነ ናሸትያዋንታ ምታና።

15 አሳይ ኡባይ ቶሸታናነ ካዉሻና፤ ኦቶረትያዋንቱ ኡባይካ ካዉሻና። 16 ሽን ኡባፐ ዎልቃማ መꬍና ጎዳይ፥ ሱረ ፕርዳን ꬎቁ ꬎቁ ጋና፤ ጌሻ ጾሳይ ጌሻ ግድያዋ ባረ ጽሎተꬃን በሳና። 17 ሄ ዎደ ዶርሳቱ ባረንቱ ቆሩዋን ሄመትያዋዳን ሄመታና፤ ዶርሳ ማራቱ ኮለቴዳ ዱረቱዋ ጎልያ ሳኣ ማና።

18 ጭሙዋ ዎዶሩዋን ናጋራ፥ ጋርያ ዎዶሩዋን ኢታተꬃ ጎችያዋንቶ አየ አና! 19 “አነ ጾሳይ ኤሌሎ! ኑን በአና ማላ፥ ባረ ኦሱዋ ኤሌልሶ! ጋꬆ! ኤ፥ ኑን ኤራና ማላ፥ እስራኤልያ ጌሻይ ቆፔዳ ቆፋይ ፖለቶ” ያግያዋንቶ አየ አና!

20 ኢታ ሎአ ሎኡዋ ኢታ ያግያዋንቶ፥ ꬉማ ፖኦ ፖኡዋ ꬉማ ኦꬅያዋንቶነ ጫምያዋ ማልእያዋ ማልእያዋ ጫምያዋ ኦꬅያዋንቶ አየ አና!

21 ባረና፥ “ታን አꬌዳ ኤራንቻ! ታን ጭንጫ ግድክታ!” ያግ ቆፕያዋንቶ አየ አና!

22 ዎይንያ ኤሳ ኡሽያዋን ኤረቴዳዋንቶነ ማꬆይያ ኡሻ ዋላካናዉ ጎብያዋንቶ አየ አና! 23 ማታይያ አኪደ፥ ባይዜዳዋንታ ጽልስያዋንቶነ ጽሎ አሳቶ ሱረ ፕርዳ ድግያዋንቶ አየ አና! 24 ታማ ላጩ ዳላ ኦይቂያዋዳንነ መላ ማታይ ኤጽ ꬋይያዋዳን፥ ሄዋዳን ኡንቱንቱ ጻጱ ዎቃና፤ ኡንቱንቱ ጪሻይካ ባናዳን ላለት ꬋያና፤ አያዉ ጎፐ፥ ኡንቱንቱ ኡባፐ ዎልቃማ መꬍና ጎዳ ህግያ እጼድኖ፤ እስራኤልያ ጌሻ ቃላካ ካꬌድኖ። 25 ሄዋ ድራዉ፥ መꬍና ጎዳ ሀንቁ አ አሳ ቦላ ኤጽ ከሴ፤ እ ባረ ኩሽያ ኡንቱንቱ ቦላ ደንꬂደ፥ ኡንቱንታ ሾጨዳ። ደረቱ ቃጺኖ፤ ሀይቄዳ አሳ አሃይ ኦግያን ቡራ ማላ ግዴ፤ ያንናካ አ ሀንቁ ስመና፤ አ ኩሺ ሀእካ ደንዴዳሳን ደኤ።

26 ጾሳይ ሃኩዋን ደእያ ካዉተꬃቶ ማላታ ꬎቃን ኤሴ፤ ሳኣ ጋጻን ደእያ ሞርከቱካ ሱይቄ። ኡንቱንቱካ ኤለካ ጃሚደ፥ ፑቱ ጊኖ። 27 ኡንቱንቱ ግዶን ዳቡርያባይነ ዎቢያባይ ባዋ፤ ኡንቱንቱፐ እቱነ ገምእሸና ዎይ ግሰና። ጼሳን ዳንጭያ ሳቂካ ብለተና፤ ኡንቱንቱ ጫማ ዳፉካ ዱጸና። 28 ኡንቱንቱ ቶራይ ሳታና ደኤ፤ ኡንቱንቱ ዎንዳፊካ ዋጸቴዳ። ኡንቱንቱ ፓራቱዋ ጹጉንꬃይ ዛላ ሹቻ ማላ፤ ኡንቱንቱ ፓራ ጋረቱዋ ይንግረꬃይ ጎትያ ማላ። 29 ኡንቱንቱ ጉዱካ ጋሞ ማላ፤ ዎዳላ ጋሞቱዋዳን ጉዲኖ፤ ኡንቱንቱ ዳሪደ፥ ባረዉ ምያዋ ኦይቂኖ፤ ቶክ አኪደ ቢኖ፤ ኡንቱንቱፐ ዎꬅ አካናዌ ኦንነ ባዋ።

30 ሄ ጋላስ ኡንቱንቱ ዎልቃማ አባ ጉንꬃዳን፥ እስራኤልያ ቦላ ጉማና፤ እት አሳይ ሄ ጋድያ ጼሎፐ፥ ꬉማነ ዋይያ በአና፤ ፖኡካ ሻርያን ምተታና።