1 “ህንተኖ ያቆባ ዛረቶ፥ እስራኤልያ ሱንꬃን ጼሰትያዋንቶ፥ ቃይ ይሁዳ ዘረꬃፐ ዬዳዋንቶ፥ ሀዋ ስስተ። ህንተ መꬍና ጎዳ ሱንꬃን ጫቂታ፤ እስራኤልያ ጾሳ ጼሲታ፤ ሽን ቱማተꬃንነ ጽሎተꬃን ግደና። 2 ህንተ ህንተና ጌሻ ካታማ ሱንꬃን ጼሲታ፤ እስራኤልያ ጾሳን ዘምፒታ፤ አ ሱንꬃይ ኡባፐ ዎልቃማ መꬍና ጎዳ።

3 “ታን ካሰ ሀኔዳዋንታ ዳሮ ዎድያፐ ካሰ ኦዳድ፤ ታ ዶናፐ ኡንቱንቱ ከሴድኖ። ኡንቱንቱ ኤለካ ፖለታናዳን፥ ታን ኦꬃድ። 4 አያዉ ጎፐ፥ ኔን ኦድና ስሰናዋ፥ ነ ሞርጊ ብራታ ማላ ግድያዋ፥ ነ ሶምኢካ ናሃስያ ግያ ብራታዳን ሌቃመናዋ ታን ኤራድ። 5 ሄዋ ድራዉ፥ ኔን፥ ‘ሀዋ ታ ኤቃይ ኦꬄዳ፤ ቃይ ታ ማሰቴዳ ምስለቱነ ታ ሲልሲደ ኦꬄዳ ምስሊ ኦꬄዳ’ ጌናዳን፥ ታን ሄዋ ነዉ በንፐ ዶማደ ኦዳድ። ቃይ ኡንቱንቱ ሀናናፐ ካሰታደ፥ ታን ኡንቱንታ ነዉ አዋያድ።

6 “ኔን ካሰ ስሳዳ፤ ሀእ ስም ሀዋ ኡባ በአ። ያትና፥ ኔን ሀዋ ኡባ ቱማ ጊኪ? ሀእፐ ዶማደ ስንꬃዉ ኔን ኦራꬃባ ስሳናዳን፥ ታን ኦꬃና። 7 ኡንቱንቱ ሀእ መቴድኖፐ አትና፥ በን መትበይክኖ። ኔን፥ ‘በአ፥ ታን ኡንቱንታ ኤራይ’ ጌናዳን፥ ሀችፐ ካሰ ኔን ሙለካ ኡንቱንቱባ ስሳባካ። 8 ኔን ሙለካ ስሳባካ፤ ቃይ ሙለካ ኤራባካ። ነ ሀይꬃይ በንፐካ ዶየትቤና። አያዉ ጎፐ፥ ኔን ጭምያዋ ግድያዋ ታን ኤራይ፤ ቃይ የለቶደፐካ ኔን ማካላንቻ ጌተታደ ጼሰታዳ።

9 “ታ ሱንꬃ ድራዉ፥ ታን ታ ሀንቁዋ ዛራና፤ ታን ኔና ꬋይሰናዳን፥ ታ ሀንቁዋ ተአና። 10 በአ፥ ታን ኔና ፓጫድ፤ ሽን ብራዳን ግደና፤ ታን ኔና መቱዋ ታማን ፓጫድ። 11 ታን ታ ድራዉ፥ ሀዋ ኦꬃይ። አያዉ ጎፐ፥ ታ ሱንꬃይ ቶሸታናዉ ታን ኮይከ። ታን ታ ቦንቹዋ ሀራዉ እምከ።

12 “ኔኖ ያቆባ፥ ታን ጼሴዳ እስራኤልያዉ፥ ታን ግያዋ ስሳ። [a] ታን አ፤ ኮይሩካ ታና ዉርሰꬃይካ ታና። 13 ቢታ ባሱዋ ታ ኩሺ ባሴዳ። ሳሎቱዋካ ታ ኡሸቻ ኩሺ ምጬዳ። ታን ኡንቱንታ ጼስያ ዎደ፥ ኡንቱንቱ እትፐ ኤቂኖ።

14 “ህንተ ኡባይ እትፐ ሺቂደ ስስተ፤ ኤቃቱዋፐ ሀዌ ሀናናዋ ካሰቲደ ኦዴዳዌ ኦኔ? መꬍና ጎዳይ ዶሬዳዌ አ ቆፋ ባብሎነ ቦላ ፖላና፤ አ ቀሲካ ባብሎነ ቢታ አሳ ቦላ ግዳናዋ። 15 ታን ታ ሁጲያዉ አ ጼሳድነ አዉ ኦዳድ፤ አ አሄዳዌ ታና። ቃይ እ ኦꬅያባይ ኡባይ አዉ እንጀታና።

16 “ታኮ ሃ ሺቂደ፥ ሀዋ ስስተ፤ ታን ኮይሮፐ ዶማደካ ጌማን ሃሳያበይከ፤ ሄዌ ሀኔዳ ዎድያፐካ ዶማደ ታን ያን ደአይ” ያጌ።

ቃይ ኡባ ሞድያ መꬍና ጎዳይነ አ አያናይ ሀእ ታና ኪቴድኖ።

17 መꬍና ጎዳይ፥ ኔና ዎዝያዌ፥ እስራኤልያ ጌሻይ ሀዋዳን ያጌ፤ “ታን መꬍና ጎዳይ፥ ነ ጾሳይ፥ ኔና ማድያዋ ታማርስያዋ። ኔን ባናዉ በስያ ኦግያንካ ኔና ካለꬅያዌ ታና። 18 ኔን ታ አዛዙዋ ስሴዳዋ ግድንቶነ፥ ነ ሳሮተꬃይ ሻፋ ሃꬃዳን ጎጋና ሽን፤ ነ ጽሎተꬃይካ አባ ቤታዳን ሀናና ሽን። 19 ነ ዛሪ አባ ሻፍያዳን፥ ነ ናናይካ ፓይዱ ባይና ሳኣ ባናዳን ጮራታና ሽን፤ ኡንቱንቱ ሱንꬃይካ ታ ስንꬃፐ ꬋየናን ዎይ ክቼናን አጋና ሽን” ያጌ።

20 ባብሎነ ጋድያፐ ከስተ፤ ባብሎነ አሳፐካ ባቃትተ![b] ቃላ ꬎቁ ኦꬂደ፥ ናሸቻን ሀዋ ሃሳይተ፤ ሳኣፐ ሳኣ ጋጻ ጋካናዉ፥ ሀዋ ኪትተ። “መꬍና ጎዳይ ባረ ቆማ ያቆባ ዎዜዳ” ያጊደ ኦድተ። 21 እ ኡንቱንታ መላ ቢታ ግዶና ካለꬄዳ ዎደ፥ ኡንቱንቱ ሳመትበይክኖ። ዛላፐ ሃꬃካ ኡንቱንቶ ፑልትሴዳ፤ ዛላ እ ጳልቂና፥ ሃꬃይ ꬉቄዳ።

22 መꬍና ጎዳይ፥ “ኢታቶ ሳሩ ባዋ” ያጌ። [c]

<- ኢስያሳ 47ኢስያሳ 49 ->